មនុស្សជិត២០០នាក់ កំពុងបាត់ខ្លួន ហើយយ៉ាងតិច៧៣នាក់ ត្រូវបានសម្លាប់ចាប់តាំងពីភ្នំភ្លើង Fuego របស់ប្រទេសហ្គាតេម៉ាឡា បានផ្ទុះឡើងកាលពីចុងសប្តាហ៍។
សហគមន៍ចំនួនប្រាំពីរដែលស្ថិតនៅក្នុងតំបន់រងការបំផ្លិចបំផ្លាញរួចទៅហើយនោះគឺត្រូវបានជម្លៀសចេញខណៈសកម្មភាពភ្នំភ្លើងបានកើនឡើងហើយប្រតិបត្តិការសង្គ្រោះត្រូវបានផ្អាក។
នៅទីក្រុង Escuintla ក្បែរភ្នំភ្លើង, ពលរដ្ឋដែលភ័យស្លន់ស្លោរបានប្រញាប់ប្រញាល់រត់ទៅរកឡានរបស់ពួកគេដើម្បីគេចចេញដែលជាហេតុធ្វើឲ្យមានការកកស្ទះចរាចរណ៍។
លោក Sergio Cabanas ប្រធានភ្នាក់ងារសង្គ្រោះគ្រោះមហន្តរាយបានប្រាប់ក្រុមអ្នកយកព័ត៌មានថា មនុស្សសរុប១៩២នាក់នៅតែកំពុងបាត់ខ្លួនចាប់តាំងពីការផ្ទុះឡើងកាលពីចុងសប្ដាហ៍។
ក្រុមមន្ត្រីបាននិយាយកាលពីមុនថា ការស្វែងរកសាកសពនៅក្នុងភូមិភ្នំដែលត្រូវបានបំផ្លាញដោយការផ្ទុះគឺបានដំណើរការយឺតយ៉ាវដោយសារលក្ខណៈភូមិសាស្ត្រនិងភ្នំភ្លើងដែលបានបញ្ចេញភក់ក្តៅរលាក ថ្មនិងផេះ។
លោក Cabanas បានប្រាប់ AFP ថា “យើងនឹងបន្តរហូតដល់យើងរកឃើញជនរងគ្រោះចុងក្រោយបើទោះបីជាយើងមិនដឹងថាមានមនុស្សប៉ុន្មាននាក់នៅទីនោះក៏ដោយ”។
យ៉ាងណាក្តី ការរំពឹងទុនៃការស្វែងរកអ្នកដែលនៅរស់រានមានជីវិតគឺមិនសូវមានទេ។
ជនរងគ្រោះចុងក្រោយបំផុតក្នុងចំណោមមនុស្សទាំង៧៣នាក់គឺជាស្ត្រីអាយុ៤២ឆ្នាំម្នាក់ដែលបានស្លាប់នៅក្នុងមន្ទីរពេទ្យដោយបាត់បង់ជើងទាំងពីរនិងដៃម្ខាងនៅក្នុងការផ្ទុះ។
តួលេខដែលផ្តល់ពេលមុនគឺមាន៧២នាក់។ មនុស្សប្រមាណ៤៦នាក់បានរងរបួសដោយពាក់កណ្តាលនៃពួកគេគឺស្ថិតក្នុងស្ថានភាពធ្ងន់ធ្ងរ។
ភ្នំភ្លើងកម្ពស់៣,៧៦៣ម៉ែត្រមួយនេះបានផ្ទុះឡើងកាលពីព្រឹកថ្ងៃអាទិត្យដោយព្រួសផេះនិងបំណែកថ្មជាមួយនឹងភក់ដែលមានកម្តៅក្តៅ។
អាជ្ញាធរបាននិយាយថា មនុស្សជាង១.៧លាននាក់ត្រូវរងផលប៉ះពាល់ដោយគ្រោះមហន្តរាយនេះដោយរាប់បញ្ចូលទាំងមនុស្សជាង៣,០០០នាក់ដែលគេបញ្ជាឲ្យជម្លៀសផងដែរ៕ AFP
Source: Kampuchea Thmey Daily
0 Comments