ភ្នំពេញ ៖ បក្ខពួកចោរលួចម៉ូតូម្នាក់ក្នុងចំណោម២នាក់ ត្រូវបានសមត្ថកិច្ចចាប់ខ្លួនតាមបណ្ដឹងជាក់ស្តែងរបស់ជនរងគ្រោះ នៅព្រឹកថ្ងៃទី០៦ ខែមិថុនា ឆ្នាំ២០១៨ នៅក្នុងភូមិបាយ៉ាប សង្កាត់ភ្នំពេញថ្មី ដែលការចាប់ខ្លួនងាយៗនោះ ធ្វើឡើងដោយសារម៉ូតូរបស់ជនរងគ្រោះបំពាក់ប្រព័ន្ធសុវត្ថិភាពប្រភេទជីភីអេស (GPS)ភ្ជាប់ម៉ូតូ។
ជនសង្ស័យ ដែលត្រូវបានចាប់ខ្លួនខាងលើ ឈ្មោះ កែវ ម៉ាលីន ភេទប្រុស អាយុ៣៨ឆ្នាំ គ្មានមុខរបរពិតប្រាកដ ស្នាក់នៅ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ។
ប៉ូលិសមូលដ្ឋាននិយាយថា ជនសង្ស័យត្រូវបានចាប់ខ្លួនតាមបណ្តឹងរបស់ជនរងគ្រោះម្នាក់ជាម្ចាស់ម៉ូតូ ឈ្មោះ ឈុំ ភិតសុភា ភេទប្រុស អាយុ៣៨ឆ្នាំ មានទីលំនៅផ្ទះលេខ១១១អឺ២ (ជាន់ទី២) ភូមិ០៧សង្កាត់ជ័យជំនះ ខណ្ឌដូនពេញ។
តាមបណ្តឹងរៀបរាប់របស់ ឈុំ ភិតសុភា ជាម្ចាស់ម៉ូតូ បានឲ្យដឹងថា នៅល្ងាចថ្ងៃកើតហេតុ គាត់បានចាក់សោម៉ូតូរបស់គាត់ ដាក់នៅក្រោមជណ្តើរយ៉ាងត្រឹមត្រូវ ទើបឡើងទៅផ្ទះជាន់ទី២។
នៅពេលព្រឹកឡើងថ្ងៃទី០៦ ខែមិថុនា ឆ្នាំ២០១៨ ស្រាប់តែបាត់ម៉ូតូពេលនោះគាត់ក៏បានបើកប្រព័ន្ធកាមេរ៉ាសុវត្ថិភាពមើលឃើញជនសង្ស័យខាងលើកំពុងកាត់សោលួចយកម៉ូតូរបស់គាត់។
ជនរងគ្រោះបានបន្តថា ភ្លាមៗនោះគាត់ក៏បានបើកទូរស័ព្ទតាមរកមើលម៉ូតូរបស់គាត់ព្រោះបានបំពាក់ប្រព័ន្ធជីភីអេស ក៏តាមរកឃើញនៅក្នុងផ្ទះមួយនៅក្នុងភូមិបាយ៉ាប សង្កាត់ភ្នំពេញថ្មី ទើបសហការជាមួយប៉ូលិសមូលដ្ឋានមកចាប់តែម្តង។
នៅក្នុងការបង្ក្រាបនោះ ប៉ូលិសឃាត់ខ្លួនបុរសម្នាក់ ជាជនសង្ស័យខាងលើ និងបានរកឃើញម៉ូតូរបស់ជនរងគ្រោះយកមកវិញម៉ាកហុងដា ប្រភេទគុបជ្រុង អាគុយស្ងួតស៊េរីឆ្នាំ២០១៣ ពាក់ស្លាកលេខភ្នំពេញ 1AW-6877 ព្រមទាំងដកហូតម៉ូតូម៉ាកស្មាសមួយគ្រឿងទៀត នៅក្នុងផ្ទះកើតហេតុនោះ។
ជនសង្ស័យបានសារភាពថា នៅក្នុងពេលធ្វើសកម្មភាពនោះខ្លួនបានជិះម៉ូតូម៉ាកស្មាសនេះ ឌុបបក្ខពួកម្នាក់ឈ្មោះ អែម រដ្ឋា ហៅថា (គេចខ្លួន) ចូលរួមលួច។ ពេលលួចបានជាប់សោ.ក ខ្លួនក៏បានហៅរ៉ឺម៉កម៉ូតូកង់បីមកដឹកពីខណ្ឌដូនពេញយកទៅលាក់ទុកនៅភូមិបាយ៉ាប សង្កាត់ភ្នំពេញថ្មី ប៉ុន្តែពេលព្រឹកឡើងបែរជាត្រូវប៉ូលិសមកឡោមព័ទ្ធចាប់ខ្លួនតែម្តង៕
Source: Kampuchea Thmey Daily
0 Comments