អ្នកប្រដាល់ជើងខ្លាំងស្រករក្រោយឯម ឡេងលី ក្លិបថ្មគោលពោធិសែនជ័យ ត្រូវគេផ្គូឲ្យជួបជាមួយអ្នកប្រដាល់ថៃឈ្មោះLaypayak Phumpanmoung នាយប់ថ្ងៃអាទិត្យ ទី១០ ខែមិថុនា ឆ្នាំ២០១៨នេះ នៅលើសង្វៀនបាយ័នស្ទឹងមានជ័យ។ ពួកគេទាំងពីរនឹងប្រកួតគ្នាក្នុងទម្ងន់៧០គីឡូក្រាម។
Laypayak គេធ្លាប់មកប្រកួតនៅកម្ពុជាម្តងពីរដងហើយកន្លងមក ។ អ្នកប្រដាល់ថៃរូបនេះ បើប្រៀបជាមួយឯម ឡេងលី គឺមិនដឹងថាយ៉ាងណានោះទេ ព្រោះថាឡេងលី គេជាអ្នកប្រដាល់ស្រករក្រោយ ។ Laypayak គេមានកំនត់ត្រាប្រកួតចំនួន៦៩លើក ឈ្នះ៤៥លើក ចាញ់២០លើកនិងស្មើ០៤លើក ។
យ៉ាងណា Laypayak ប៉ះជាមួយឯម ឡេងលី ក៏ប្រហែលជាជួបការលំបាកដែរ ព្រោះថាឡេងលី ថ្វីត្បិតតែមានប្រវត្តិប្រកួតត្រឹមតែជាង៣០លើក តែគេមានស្នៀតប្រដាល់ល្អ និងទើបតែស្គាល់ចាញ់៥លើកប៉ុណ្ណោះ។ តែយ៉ាងណា ឯម ឡេងលី ក៏ត្រូវប្រយ័ត្នដែរ សម្រាប់ការប្រកួតលើកនេះ។ដូច្នេះចាំមើល តើនរណាឈ្នះរវាងឯមឡេងលី និង Laypayak នេះ ?។
ឡេងលី គេមានកំនត់ត្រាប្រកួតទើបតែ៣៥លើកប៉ុណ្ណោះ តែគេវាយឈ្នះ២៧លើកទៅហើយ ដោយចាញ់តែ ០៧ លើកនិងស្មើ០១លើកប៉ុណ្ណោះ ។ គេប្រកួតចុងក្រោយ បានផ្តួលអ្នកប្រដាល់រុស្សីArthur Shushinsky អោយបោះបង់ចោលការប្រកួតក្នុងទឹកទី៣ កាលពី ថ្ងៃទី១៩ឧសភាកន្លងទៅនេះ។
ចំពោះ រិទ្ធ ភូលូ អ្នកប្រដាល់ក្លិបថ្មគោលពោធិសែនជ័យ ត្រូវគេផ្គូផ្គងអោយជួបប្រកួតជាមួយអ្នកប្រដាល់ថៃ Senmuengnoy Por. Awthalebangsare ដោយប្រកួតគ្នាក្នុងទម្ងន់៦០ គ.ក្រ ។ ពីរនាក់នេះ ពុំធ្លាប់ដែលប៉ះគ្នាម្តងណានៅឡើយទេកន្លងមក។
រិទ្ធ ភូលូ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់ ។ គេបានឆ្លងកាត់ការប្រកួតជាមួយអ្នកប្រដាល់ថៃ៤លើក និងឡាវ២លើកប៉ុណ្ណោះ ។ដូច្នេះ លើកនេះជាលើកទី៥ ដែលគេជួបប្រកួតជាមួយថៃនោះ។
ភូលូ មានប្រវត្តិប្រកួតប្រមាណជា៦៩លើក ក្នុងនោះវាយឈ្នះ៥៤លើក ចាញ់១១ លើក និងស្មើ ០៤លើក ហើយគេធ្លាប់ផ្តួលដៃគូប្រកួតអោយសន្លប់បានចំនួន១៧លើក ។ គេជាអ្នកប្រដាល់ជើងខ្លាំងស្រករក្រោយ ដោយមានចិត្តធំ កម្លាំងខ្លាំង វាយមិនសំចៃដៃឡើយ ។ ប៉ុន្តែយ៉ាងណាការប្រកួតលើកនេះ មិនដឹងថា ភូលូអាចយកឈ្នះ Senmuengnoy បានឬក៏អត់នោះទេ?។
Senmuengnoy ជាជើងខ្លាំង ដែលមានស្នៀតទាត់ និងកណ្តាប់ដៃល្អ។ ដូច្នេះ រិទ្ធភូលូ ប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះមានស្នៀតប្រដាល់ល្អនិងខ្លាំង ។ តែបើអាចឈ្នះបាន គឺមានតែការវាយប្តូរកែងមួយមុខគត់ ដែលប្រថុយដូរជាមួយនឹងជ័យជំនះ ។ អ្នកប្រដាល់ថៃរូបនេះ មានប្រវត្តិប្រកួតចំនួន៧២លើក ឈ្នះ៦១លើក ចាញ់១០លើក និង ស្មើ០១លើក ។ ចាំមើល រវាងរិទ្ធ ភូលូ និង Senmuengnoy តើនរណាជាអ្នកឈ្នះនៅក្នុងការជួបគ្នានេះ ?៕
Source: Kampuchea Thmey Daily
0 Comments