រឿង សារ័ត្ន អ្នកប្រដាល់ក្លិបកងពលតូចទ័ពឆ័ត្រយោង៩១១ និង លាភ រដ្ឋា អ្នកប្រដាល់ នៃក្លិបដីឡូតិ៍មានរិទ្ធខេត្តបន្ទាយមានជ័យ នឹងត្រូវអ្នករៀបចំកម្មវិធីប្រដាល់នៅប៉ុស្តិ៍អាស៊ីអាគ្នេយ៍ ផ្គូផ្គងអោយជួបប្រកួតជាមួយអ្នកប្រដាល់ថៃ។ ទាំង២គូនេះ នឹងប្រកួតគ្នានាព្រឹកថ្ងៃអាទិត្យទី១៧ ខែមិថុនា ឆ្នាំ២០១៨ នៅលើសង្វៀនWurkz របស់SEA-TV។
រឿង សារ័ត្ន អ្នកប្រដាល់ក្លិបកងពលតូចទ័ពឆ័ត្រយោង៩១១ នឹងជួបប្រកួតជាមួយអ្នកប្រដាល់ថៃឈ្មោះ Ou Ranou ។ ពីរនាក់នេះ ប្រកួតគ្នាក្នុងប្រភេទទម្ងន់ ៦៥ គីឡូក្រាម។
រឿង សារ័ត្ន ជាជើងខ្លាំងមួយរូប ដែលការប្រកួតរបស់គេទោះឈ្នះក្តី ចាញ់ក្តី មានមានលក្ខណះតឹងតែងបំផុត ពោលគឺមិនមាននរណាយកឈ្នះលើរូបគេដោយផុយស្រួលនោះឡើយ។
ប៉ុន្តែអ្នកប្រដាល់រូបនេះ មិនសូវដែលជួបប្រកួតជាមួយថៃនោះឡើយ ពោលគឺគេជួប ថៃបាន១០លើកប៉ុណ្ណោះ ដោយវាយឈ្នះ៥ចាញ់៥លើក។ អ្នកណាក៏គេដឹងថា រឿង សារ័ត្នជាជើងខ្លាំងដែរ ទោះបីជាវាយចាញ់ ក៏មិនអាចចាញ់ដោយងាយៗបានដែរ ។ យ៉ាងណា ពេលនេះ សារ័ត្ន ត្រូវបានជួបប្រកួតជាមួយ Ou Ranou ដែលជាអ្នកប្រដាល់ជើងខ្លាំងរបស់ថៃ មិនដឹងថាឈ្នះឬចាញ់នោះទេ ? ។ រឿង សារ័ត្ន មិនធ្លាប់ដែលជួបជាមួយ Ou Ranou នេះទេកន្លងមក។
រឿង សារ័ត្ន មានការស្រុតធ្លាក់ចុះនៅក្នុងការប្រកួតប៉ុន្មានប្រកួតចុងក្រោយនេះ។តែការឡើងប្រកួតចុងក្រោយនេះ គេបានវាយឈ្នះថៃPhat Ka ដោយពិន្ទុ កាលពីថ្ងៃទី០៥ ឧសភា កន្លងទៅនេះ ។ អ្នកប្រដាល់រូបនេះ វាយរាងមើលងាយគូប្រកួតបន្តិច នៅពេលដែលមើលឃើញគូប្រកួតរាងអន់ជាងខ្លួននោះ ។
សារ័ត្ន ជាអ្នកប្រដាល់ម្នាក់ ដែលប្រកួតនិងផ្តួលគូប្រកួតដោយសារទិចនិចកណ្តាប់ដៃ កែង និង ជង្គង់ ។ យ៉ាងណា ប៉ះជាមួយ Ou Ranou លើកនេះ ក៏រាងយ៉ាប់ដែរ ។
Ou Ranou គេក៏ជាជើងខ្លាំងមួយរូបដែរ ។ អ្នកប្រដាល់ថៃរូបនេះ ធ្លាប់មកប្រកួតម្តងហើយ ដោយវាយស្មើជាមួយយុគ យក្សគីល អ្នកប្រដាល់ក្លិបកងចក្ររាជសីហ៍មានរិទ្ធកាលពីថ្ងៃទី០៨មេសា២០១៨ ។ គេមានប្រវត្តិប្រកួត៦៣លើក ដោយវាយឈ្នះ៥៤លើក ចាញ់០៩លើក មិនដែលស្មើ ខណះដែលសារ័ត្ន មានប្រវត្តិប្រកួត៧៥លើក ឈ្នះ៥៩លើក ចាញ់១៣លើក និងស្មើ០៣លើក ។ចាំមើល រឿង សារ័ត្ន និង Ou Ranou តើនរណាជាអ្នកឈ្នះនោះ ? ។
ចំពោះការជួបគ្នារវាងលាភ រដ្ឋា និង A Norn វិញ គូនេះប្រហែលជាពិបាកទស្សន៍ទាយបន្តិចហើយ។ ត្បិតថា អ្នកប្រដាល់ A Norn ដែលធ្លាប់មកប្រកួតកន្លងមកនោះ ហាក់មានប្រៀបលើ លាភ រដ្ឋា ។
លាភ រដ្ឋា ជាអ្នកប្រដាល់ស្រករក្រោយ តែរបៀបវាយរបស់គេ ល្អនិងខ្លាំងព្រមទាំង រហ័សរហួន ហើយកម្លាំងនិងទឹកចិត្តរបស់គេក៏ខ្លាំងនិងធំណាស់ដែរ ។ លាភ រដ្ឋា មិនធ្លាប់ប្រកួតជាមួយអ្នកប្រដាល់បរទេសទេកន្លងមក។រដ្ឋា គេមានប្រវត្តិប្រកួតចំនួន៤៥លើកឈ្នះ៣៣ លើក ចាញ់១០លើក និងស្មើ០២លើក។ទោះជាយ៉ាងណា លាភ រដ្ឋា គេជាអ្នកប្រដាល់ដែលល្អនិងមានទំនុកចិត្ត ។
ចំពោះ A Norn វិញ គេមានប្រវត្តិប្រកួតចំនួន៦៥លើក ឈ្នះ៥៧លើក ចាញ់០៦លើក និងស្មើពិន្ទុ ០២ លើក ។ ទោះបីគេមិនធ្លាប់ជួបគ្នាក៏ពិតមែន តែមើលទៅ A Norn អាចជាអ្នកមានប្រៀបលើលាភ រដ្ឋា ហើយ ។ ចាំមើល រវាងលាភ រដ្ឋា និង A Norn តើនរណាឈ្នះ នោះ ? ។
ដោយឡែក ការប្រកួតរវាងអ្នកប្រដាល់រួមជាតិវិញ សួង សុវណ្ណថា អ្នកប្រដាល់សមាគមកីឡាប្រដាល់ក្រសួងការពារជាតិ ត្រូវគេផ្គូអោយជួបប្រកួតសងសឹកជាមួយ ជ័យ ស៊ីនេត អ្នកប្រដាល់ក្លិបឃ្លាំងមឿងកីឡា ដោយជួបគ្នាក្នុងទម្ងន់៦០គីឡូក្រាម ។ រវាងគូនេះ តាមការសន្និដ្ឋាននោះ សុវណ្ណថា ប្រហែលជាមិនអាចសម្រេចការសងសឹកបាននោះទេ ។
នឿន សាវឌី អ្នកប្រដាល់ក្លិបអេភូថងកីឡា នឹងត្រូវជួបប្រកួតជាមួយសេក ចៅជូត អ្នកប្រដាល់ក្លិបអង្គរមានជ័យ ក្នុងប្រភេទទម្ងន់៦០គីឡូក្រាមដែរ ។ ពីរនាក់នាក់នេះ មិនធ្លាប់ជួបគ្នាទេកន្លងមក ។ ដូច្នេះ ចាំមើលតើ នឿន សាវឌី គេអាចយកឈ្នះសេក ចៅជូត បានឬអត់ ?៕
Source: Kampuchea Thmey Daily
0 Comments