កែវ រំចង់ អ្នកប្រដាល់ក្លិបដំបងគ្រញូងមានរិទ្ធខេត្តបាត់ដំបង ត្រូវគេផ្គូផ្គងឲ្យជួបប្រកួតជាមួយអ្នកប្រដាល់ថៃ Petchmany Dabrunsarakarm នៅយប់ថ្ងៃអាទិត្យទី១៧ ខែមិថុនា ឆ្នាំ២០១៨នេះ លើសង្វៀនបាយ័នស្ទឹងមានជ័យ។ អ្នកប្រដាល់ទាំងពីរនេះ ជួបប្រកួតក្នុងប្រភេទទម្ងន់៧៥គីឡូក្រាម។
Petchmany នេះ គេមិនធ្លាប់មកប្រកួតនៅស្រុកខ្មែរទេកន្លងមក។ តែបើតាមអ្នកដឹកនាំមកប្រកួតថា អ្នកប្រដាល់ថៃរូបនេះ គេមិនធម្មតានោះឡើយ។ គេមានកំណត់ត្រាប្រកួតចំនួន៨៣លើក ឈ្នះ៦០ លើក ចាញ់២១លើកនិងស្មើ០២លើក ហើយគេធ្លាប់ផ្តួលដៃគូប្រកួតអោយសន្លប់បានចំនួន១៦លើក។
បើតាមប្រភពពីអ្នកតាមដានកីឡាប្រដាល់អោយដឹងនោះថា Petchmany ជាអ្នកប្រដាល់ជើងចាស់ធ្លាប់មានឈ្មោះបោះសម្លេងដែរនៅស្រុកថៃពីមុនមក តែសម្រាប់បច្ចុប្បន្នមិនជាខ្លាំងនោះឡើយ ព្រោះគេពុំមែនជាអ្នកប្រកួតជាប់លាប់និងហ្វឹកហាត់ដិតដល់ ដូចជាកែវ រំចង់ នោះឡើយ ។ ទោះជាយ៉ាងណា អ្នកប្រដាល់ថៃរូបនេះ មកជួបកែវរំចង់ ក៏មិនប្រាកដថាស្រួលខ្លួនប៉ុន្មានដែរ ព្រោះអ្នកប្រដាល់ថៃដែលកន្លងមកសុទ្ធតែអះអាងថាជាជើងខ្លាំងនោះ សុទ្ធតែត្រូវកែវរំចង់ ផ្តួលយកឈ្នះបានដែរ ។
កែវ រំចង់ គេមានកំនត់ត្រាប្រកួតចំនួន១៣៣លើក ក្នុងនោះឈ្នះ១១៧លើក ចាញ់១២លើក និងស្មើ៤លើក ហើយរំចង់ធ្លាប់ផ្តួលគូប្រកួតឲ្យសន្លប់បានចំនួន១៦លើក ។ ការប្រកួតចុងក្រោយនេះ រំចង់បានផ្តួលអ្នកប្រដាល់ថៃ Takunsingha អោយសន្លប់ក្នុងទឹកទី៤ កាលពីថ្ងៃទី១៧កុម្ភះ២០១៨ ។ កែវ រំចង់ គេខ្លាំងកណ្តាប់ដៃ និងវាយសម្រុកលឿន រហ័ស ដែលដៃគូពិបាកនឹងទប់ទល់ណាស់ ។ ដូច្នេះចាំមើល តើនរណាឈ្នះនៅក្នុងការជួបគ្នារវាង កែវ រំចង់ និង Petchmany នេះ ? ។
ចំពោះ អ្នកប្រដាល់ជើងខ្លាំងស្រករក្រោយ ជ័រ ពៅ ក្លិបថ្មគោលពោធិសែនជ័យ ត្រូវគេផ្គូឲ្យជួបប្រកួតជាមួយអ្នកប្រដាល់ថៃឈ្មោះ Linglom Por.Yuthaphumi ។ ពួកគេទាំងពីរ ប្រកួតគ្នាក្នុងទម្ងន់៦០គីឡូក្រាម ។
ជាលើកទី១ សម្រាប់ ជ័រ ពៅ ដែលបានជួបប្រកួតជាមួយថៃនេះ ។ ជ័រ ពៅ ទោះជាគេទើបបានផ្គូផ្គងឲ្យជួបបរទេសក៏ដោយ ក៏ចិត្តរបស់គេពុំមានភ័យខ្លាចសូម្បីបន្តិចដែរ ។ គេទើបឡើងប្រកួតបានប្រមាណជាង ៤០ លើកប៉ុណ្ណោះ ក្នុងនោះ វាយឈ្នះ៣០លើក ចាញ់០៨លើក និងស្មើ០៣លើក ហើយធ្លាប់ផ្តួលដៃគូឲ្យសន្លប់បានចំនួន១៦លើក ។
Linglom គេជាអ្នកប្រដាល់ចំណូលថ្មីដែរ។គេមិនធ្លាប់មកប្រកួតនៅកម្ពុជាយើងទេកន្លងមក។ យ៉ាងណា អ្នកប្រដាល់ថៃរូបនេះ គេខ្លាំងគួរសមដែរ ។ ព្រោះបើតាមការបង្ហើបឲ្យដឹងពីអ្នកដឹកនាំកី ឡាករថៃមកប្រកួតនោះ។ Linglom គេល្អនិងខ្លាំង ដែលមិនអាចមើលស្រាលបានឡើយ ។ Linglom មានកំនត់ត្រាប្រកួតចំនួន៥៨ លើក ឈ្នះ៤៥លើក ចាញ់១១លើក និងស្មើ០២លើក ហើយធ្លាប់ផ្តួលដៃគូឲ្យសន្លប់បានចំនួន០៦លើក ។
យ៉ាងណា ប៉ះជាមួយជ័រ ពៅ Linglomក៏មិនជាស្រួលប៉ុន្មានដែរ ព្រោះថា ជ័រ ពៅ គេវាយបុកខ្លាំង កណ្តាប់ដៃខ្លាំង ទម្ងន់ជើងក៏ធ្ងន់ដែរ ។ តែយ៉ាងណា ជ័រ ពៅ ក៏ត្រូវប្រយ័ត្នដែរ សម្រាប់ការប្រកួតលើកនេះ។ ដូច្នេះចាំមើល តើ ជ័រ ពៅ និង Linglom នរណាឈ្នះ ? ។
ដោយឡែក អ្នកប្រដាល់សំណាង សម្បត្តិ ក្លិបកងចក្ររាជសីហ៍មានរិទ្ធ ត្រូវជួបប្រកួតជាមួយ លន់ សៀកឡេង អ្នកប្រដាល់ក្លិបរស្មីភូមិគាបខេត្តបន្ទាយមានជ័យ។ ពីរនាក់នេះ ប្រកួតគ្នាក្នុងទម្ងន់៥៧ គីឡូក្រាម ។ រីឯ ធន់ វិច្ឆិកា អ្នកប្រដាល់ក្លិបមជ្ឈមណ្ឌលកីឡាខ.ភ.ម នឹងត្រូវជួបប្រកួតជាមួយ ហុង ឡាវី អ្នកប្រដាល់ក្លិបកុលបុត្រគុនខ្មែរខណ្ឌទួលគោក ដោយជួបប្រកួតគ្នាក្នុងប្រភេទទម្ងន់៦៥គីឡូក្រាម៕
Source: Kampuchea Thmey Daily
0 Comments