អ៊ឹម ជីវ៉ា គាំទ្រចំណាត់ការលោកជួន ណារិន ដែលបញ្ជាឲ្យប្រធានគណនីកាស៊ីណូQueencoសុំទោសម្តាយបុគ្គលិកម្នាក់

អ៊ឹម ជីវ៉ា គាំទ្រចំណាត់ការលោកជួន ណារិន ដែលបញ្ជាឲ្យប្រធានគណនីកាស៊ីណូQueencoសុំទោសម្តាយបុគ្គលិកម្នាក់
ភ្នំពេញ ៖ ថ្មីៗនេះមានការបែកធ្លាយ និងផ្ទុះការរិះគន់លើឃ្លីបវីដេអូមួយរវាងបុគ្គលិក និងប្រធានគណនីកាស៊ីណូQueencoនៅខេត្តព្រះសីហនុ ដែលបានជេរប្រមាថរហូតរាលដាលដល់ម្តាយបុគ្គលិកម្នាក់នោះ។ មិនតែប៉ុណ្ណោះថែមទាំងតាមចាប់ខ្លួនឲ្យបុគ្គលិកខាងលើមកសុំទោសនៅប៉ុស្តិ៍ប៉ូលីសរួមទាំងម្តាយផងដែរ។

ទង្វើនេះ បានធ្វើឲ្យមហាជននិងអ្នកលេងបណ្តាញសង្គមជាច្រើនសម្តែងការមិនចិត្តរហូតផ្ទុះការរិះគន់ និងស្នើឲ្យប្រធានគណនីកាស៊ីណូQueencoរូបនេះ ក៏ត្រូវតែចេញមុខមកសុំទោសលើកំហុសរបស់ខ្លួនដែលបានជេរប្រមាថម្តាយបុគ្គលិកម្នាក់នេះដូចគ្នា។ ប៉ុន្តែភ្លាមៗនោះ ពុំមានការចេញមុខសុំទោសនោះឡើយ។

ដោយមើលឃើញពីទង្វើខ្វះសីលធម៌របស់ប្រធានគណនីកាស៊ីណូQueencoនៅខេត្តព្រះសីហនុរួមទាំងមតិរិះគន់ពីមហាជនផងនោះ លោកឧត្ដមសេនីយ៍ទោជួន ណារិនស្នងការនគរបាលខេត្តព្រះសីហនុ បានប្រកាសចេញបញ្ជាឲ្យស្នងការរងទទួលបន្ទុកព្រហ្មទណ្ឌកោះហៅប្រធានគណនីឈ្មោះខេន ដារិន និងបុគ្គលិកសណ្ឋាគារនិងកាស៊ីណូQueencoនៅខេត្តព្រះសីហនុមកដោះស្រាយនិងសុំទោសគ្នាជាថ្មីនៅស្នងការដ្ឋាននគរបាលខេត្តព្រះសីហនុ។ ក្រោយពីមានការចេញបញ្ជាបែបនេះ ទីបំផុត នៅរសៀលថ្ងៃទី២ ខែមិថុនា នេះ លោក ខេន ដារិន ប្រធានគណនីកាស៊ីណូ Queenco បានធ្វើការសុំទោសម្ដាយរបស់បុគ្គលិកនៅកាស៊ីណូ ចំណែកយុវជនជាបុគ្គលិក ក៏បានសុំទោសលោក ខេន ដារិន វិញដែរ។

ជាមួយគ្នានេះ បានធ្វើឲ្យមហាជនមួយចំនួនធំបានគាំទ្រលើចំណាត់ការរបស់លោកឧត្ដមសេនីយ៍ទោ ជួន ណារិន ខណៈដែលតារាសម្តែងប្រុសរូបសង្ហាលោក អ៊ឹម ជីវ៉ា ក៏បានបង្ហាញអារម្មណ៍សាទររួមទាំងអរគុណចំពោះលោកឧត្ដមសេនីយ៍ទោ ជួន ណារិន ទៀតផង។

លោក អ៊ឹម ជីវ៉ា បានសរសេរថា ជូនលោកមេសណ្ឋាគារនៅខេត្តព្រះសីហនុលោកធ្វើខុសហើយអោយគេមកសុំទោសទៀត ដូចនេះលោកត្រូវសុំទោសម្តាយគេផង បើលោកមិនសុំទោសលោកជាមេដ៏សែនកំសាកញីនិងថោកទាបជាទីបំផុតសូមមើលច្បាប់ផង លោកសួរថាក្មេងនឹងសមនឹងលោកហៅទៅប៉ុស្តិ៍ប៉ូលិសទេ ?។ តែទោះជាយ៉ាងណាពេលនេះត្រូវបានលោកពូ ជួន ណារិន ចេញបញ្ជាមកហើយ។

តារាសម្តែងលោក អ៊ឹម ជីវ៉ា បានបន្ថែមថា សូមគាំទ្រនូវចំណាត់ការរបស់លោកឧត្ដមសេនីយ៍ទោ ជួន ណារិន ស្នងការនគរបាលខេត្តព្រះសីហនុ ដែលបានរកយុត្តិធម៌អោយម្ដាយបុគ្គលិកដែលរងការជេរប្រមាថពីឈ្មោះ ខេន ដារិន ប្រធានគណនីកាស៊ីណូQueencoនៅកំពង់សោម៕ ចាន់ ដារ៉ា