អ្នកនយោបាយសង្គមនិយមអេស្ប៉ាញលោក Pedro Sanchez បានចាប់ផ្តើមកាន់កាប់អំណាចជំនួសអ្នកអភិរក្សជើងចាស់ Mariano Rajoy ដែលបានចាញ់ក្នុងញត្តិសម្តែងការមិនទុកចិត្តមួយបន្ទាប់ពីរឿងអាស្រូវពុករលួយ។
ក្រុមអ្នកតាក់តែងច្បាប់បានឈរអបអរសាទរនៅក្នុងរដ្ឋសភានៅពេលតំណាងរាស្ដ្រគាំទ្រអឺរ៉ុបវ័យ៤៦ឆ្នាំដែលមិនធ្លាប់ស្ថិតនៅក្នុងរដ្ឋាភិបាលរូបនេះបានក្លាយទៅជាប្រមុខរដ្ឋាភិបាលទី៧របស់ប្រទេសចាប់តាំងពីការវិលត្រលប់ទៅកាន់លទ្ធិប្រជាធិបតេយ្យនៅចុងទសវត្សរ៍ឆ្នាំ១៩៧០។
ការចាកចេញរបស់លោក Rajoy បន្ទាប់ពីកាន់តំណែងរយៈពេលប្រាំមួយឆ្នាំគឺអាចនាំឲ្យមានភាពមិនច្បាស់លាស់ផ្នែកនយោបាយនៅក្នុងប្រទេសសេដ្ឋកិច្ចធំបំផុតលំដាប់ទីបួនរបស់តំបន់ចាយប្រាក់អឺរ៉ូមួយនេះ។
លោក Sanchez បានប្រាប់ក្រុមអ្នកយកព័ត៌មានថា “ខ្ញុំដឹងពីការទទួលខុសត្រូវដែលខ្ញុំសន្មត់ ខ្ញុំដឹងពីពេលវេលានយោបាយដ៏ស្មុគស្មាញដែលប្រទេសយើងកំពុងឆ្លងកាត់ហើយខ្ញុំនឹងបង្កើនការតស៊ូទាំងអស់ជាមួយនឹងការបន្ទាបខ្លួននិងការយកចិត្តទុកដាក់”។
លោក Sanchez បានក្លាយជានាយករដ្ឋមន្ត្រីដោយមានតែអាសនៈត្រឹមតែ៨៤ប៉ុណ្ណោះសម្រាប់គណបក្សសង្គមនិយមរបស់គាត់នៅក្នុងសភាដែលមាន៣៥០អាសនៈ។ នេះដោយសារតែមានការគាំទ្រពីគណបក្សនិយមឆ្វេង Podemos និងគណបក្សជាតិនិយមតូចៗដទៃទៀត។ លោក Sanchez បាននិយាយថា លោកមានបំណងដឹកនាំប្រទេសរហូតដល់ពាក់កណ្តាលឆ្នាំ២០២០នៅពេលដែលអាណត្តិសភាត្រូវបញ្ចប់។
ការឡើងកាន់អំណាចរបស់គណបក្សសង្គមនិយមបានកើតឡើងបន្ទាប់ពីមានការកាត់ទោសដាក់ពន្ធនាគាររាប់ទសវត្សរ៍អំពីករណីអំពើពុករលួយចំពោះមនុស្សរាប់សិបនាក់ដែលជាប់ពាក់ព័ន្ធទៅនឹងគណបក្សប្រជាជនអភិរក្សរបស់លោក Rajoy។
កំហឹងចំពោះអំពើពុករលួយបានអនុញ្ញាតឲ្យលោក Sanchez ឈ្នះញត្តិសម្តែងការមិនទុកចិត្តកាលពីថ្ងៃសុក្រជាមួយនឹងសំឡេងគាំទ្រ១៨០ទល់នឹង១៦៩៕ REUTERS
[caption id="attachment_921193" align="aligncenter" width="960"]
[/caption]Source: Kampuchea Thmey Daily
0 Comments