ប្រធានាធិបតីសហរដ្ឋអាមេរិកលោក Donald Trump បាននិយាយកាលពីថ្ងៃអាទិត្យថា មនុស្សដែលចូលក្នុងសហរដ្ឋអាមេរិកដោយខុសច្បាប់គួរតែត្រូវបញ្ជូនត្រឡប់ទៅវិញភ្លាមៗទៅកន្លែងដែលពួកគេមកដោយមិនចាំបាច់មានដំណើរការតុលាការនោះទេ។ លោកបានប្រៀបប្រដូចពួកគេទៅនឹងពួកឈ្លានពានដែលកំពុងព្យាយាមចូលទៅក្នុងប្រទេស។
សំណើរបស់គាត់បានទាក់ទាញការរិះគន់ភ្លាមៗពីក្រុមអ្នកវិភាគច្បាប់និងអ្នកតស៊ូមតិសិទ្ធិជនអន្តោប្រវេសន៍ដែលបាននិយាយថា វានឹងរំលោភលើការផ្តល់នីតិវិធីត្រឹមត្រូវរបស់រដ្ឋធម្មនុញ្ញសហរដ្ឋអាមេរិកដែលអនុវត្តចំពោះពលរដ្ឋនិងមិនមែនប្រជាពលរដ្ឋ។
នៅក្នុងការបង្ហោះ Twitter កាលពីថ្ងៃអាទិត្យ លោក Trump បាននិយាយថា “យើងមិនអាចអនុញ្ញាតឲ្យមនុស្សទាំងអស់នេះឈ្លានពានប្រទេសរបស់យើងបានទេ។ នៅពេលដែលមាននរណាម្នាក់ចូលមក យើងត្រូវតែនាំពួកគេត្រឡប់ទៅកន្លែងដែលពួកគេមកភ្លាមៗដោយគ្មានករណីចៅក្រមឬតុលាការឡើយ”។
សេតវិមានមិនបានឆ្លើយតបទៅនឹងសំណើសុំការបំភ្លឺអំពី Twitter របស់លោក Twitter ទេ។
លោក Sherrilyn Ifill ប្រធានមូលនិធិការពារច្បាប់ NAACP បានសរសេរនៅលើ Twitterថា “លោកប្រធានាធិបតីសហរដ្ឋអាមេរិកទើបតែបានស្នើសុំឲ្យបញ្ចប់ទីលំនៅនយោបាយហើយគ្មានដំណើរការត្រឹមត្រូវសម្រាប់ជនអន្តោប្រវេសន៍ទេ”។
ចំណែកលោក Lee Gelernt អនុប្រធានគម្រោងសិទិ្ធជនអន្តោប្រវេសន៍របស់ ACLU បានប្រាប់រ៉យទ័រថា “រដ្ឋបាលមិនអាចបញ្ឈប់ដំណើរការទាំងអស់សម្រាប់ជនអន្តោប្រវេសន៍បានទេ។ ដំណើរការនៃនីតិវិធីត្រឹមត្រូវត្រូវបានអនុវត្តយ៉ាងពិតប្រាកដ។ វាមិនមែនជាជម្រើសមួយទេ”។
ការបង្ហោះ Twitter របស់លោក Trump កាលពីថ្ងៃអាទិត្យបានកើតឡើងបន្ទាប់ពីមានការតវ៉ាមួយសប្តាហ៍នៅទូទាំងសកលលោកលើរូបភាពនិងវីដេអូនៃកុមារយំនិងឪពុកម្តាយរបស់ពួកគេ ដែលត្រូវបានបំបែកគ្នានៅព្រំដែនអាមេរិក - ម៉ិកស៊ិក។
អ្នករិះគន់នៅក្នុងគណបក្សសាធារណរដ្ឋរបស់លោក Trump ព្រមទាំងភរិយានិងកូនស្រីរបស់គាត់បានជំរុញឲ្យគាត់បោះបង់ចោលគោលនយោបាយនេះ៕ REUTERS
Source: Kampuchea Thmey Daily
0 Comments