យោងតាមរបាយការណ៍សម្ងាត់មួយរបស់អង្គការសហប្រជាជាតិ ដែលត្រូវបានមើលឃើញដោយ AFP កាលពីថ្ងៃព្រហស្បតិ៍បានបង្ហាញថា ផ្នែកខ្លះនៃមីស៊ីលចំនួនប្រាំគ្រាប់ដែលបាញ់ដាក់អារ៉ាប៊ីសាអ៊ូឌីតដោយពួកឧទ្ទាម Huthi យេមែនគឺត្រូវបានផលិតនៅក្នុងប្រទេសអ៊ីរ៉ង់ ប៉ុន្តែមន្ត្រី UN មិនអាចកំណត់ពីពេលវេលាដែលពួកគេត្រូវបានបញ្ជូនទៅកាន់ប្រទេសយេមែនបានទេ។
អគ្គលេខាធិការអង្គការសហប្រជាជាតិលោក Antonio Guterres បានប្រាប់ក្រុមប្រឹក្សាសន្តិសុខក្នុងរបាយការណ៍១៤ទំព័រថា បំណែកចេញពីមីស៊ីលដែលបានបាញ់ចាប់តាំងពីខែកក្កដាឆ្នាំ២០១៧មកគឺរួមមានលក្ខណៈពិសេសនៃការរចនាសំខាន់ៗជាមួយមីស៊ីលមួយប្រភេទដែលគេដឹងថាផលិតដោយអ៊ីរ៉ង់។
របាយការណ៍ដែលត្រូវបានបញ្ជូនទៅក្រុមប្រឹក្សាកាលពីថ្ងៃអង្គារមួយនេះបានបន្ថែមថា “បំណែកខ្លះនៃកម្ទេចកម្ទីគឺត្រូវបានផលិតនៅសាធារណរដ្ឋឥស្លាមអ៊ីរ៉ង់” ប៉ុន្តែវានៅតែមិនច្បាស់ថាតើការផ្ទេរនេះគឺជាការរំលោភលើការរឹតបន្តឹងរបស់អង្គការសហប្រជាជាតិដែរឬក៏អត់។
មន្ត្រី UN មិនអាចកំណត់បានទេថាតើពេលណាដែលមីស៊ីលនេះត្រូវបានផ្ទេរចេញពីអ៊ីរ៉ង់។
ការរកឃើញនេះអាចបញ្ជាក់ពីការអះអាងរបស់ក្រុមអ្នកឯកទេស UN ដែលបានរាយការណ៍កាលពីខែមករាថា អ៊ីរ៉ង់បានរំលោភលើបំរាមដឹកជញ្ជូនអាវុធទៅឲ្យប្រទេសយេមែននិងមិនអាចទប់ស្កាត់ការផ្គត់ផ្គង់មីស៊ីលបាន។
របាយការណ៍នេះអាចដោះស្រាយការបរាជ័យរបស់សហរដ្ឋអាមេរិកដែលបានអំពាវនាវម្តងហើយម្តងទៀតឲ្យក្រុមប្រឹក្សាសន្តិសុខចាត់វិធានការប្រឆាំងនឹងអ៊ីរ៉ង់លើការផ្ទេរអាវុធខុសច្បាប់ទៅឲ្យយេមែននិងនៅកន្លែងផ្សេងទៀតក្នុងតំបន់។
ទោះបីជាយ៉ាងណាក៏ដោយ ប្រទេសអ៊ីរ៉ង់បានបដិសេធយ៉ាងដាច់អហង្ការចំពោះការបំពាក់អាវុធដល់ក្រុម Huthi បើទោះបីជាមានការចោទប្រកាន់ពីសហរដ្ឋអាមេរិកនិងអារ៉ាប៊ីសាអ៊ូឌីតថា មីស៊ីលដែលបានបាញ់ដាក់លើទីក្រុងរីយ៉ាដនិងទីក្រុងអារ៉ាប់ផ្សេងទៀតត្រូវបានផលិតឡើងដោយអ៊ីរ៉ង់ក៏ដោយ៕ AFP
Source: Kampuchea Thmey Daily
0 Comments