ពានរង្វាន់បាល់ទាត់លីគកំពូលកម្ពុជា Metfone Cambodian League 2018 (MCL 2018) នឹងត្រូវប្រកួតគ្នាក្នុងសប្ដាហ៍ទី១០ហើយ នៅចុងសប្ដាហ៍នេះ ខណៈនៅល្ងាចថ្ងៃសៅរ៍ ទី១៦ ខែមិថុនា ឆ្នាំ២០១៨ មានការប្រកួតចំនួន៣គូគឺក្រុមអាស៊ីអឺរ៉ុប ទទួលក្រុមព្រះខ័នរាជស្វាយរៀង ហើយក្រុមក្រសួងការពារជាតិ (ទ័ព) ជួបក្រុមសូលទីឡូអង្គរ និងក្រុមអគ្គស្នងការដ្ឋាននគរបាលជាតិ (ប៉ូលីស) ប៉ះក្រមអង្គរថាយហ្គឺរ។
*អាស៊ីអឺរ៉ុប ប៉ះព្រះខ័នរាជស្វាយរៀង
ក្រុមម្ចាស់ផ្ទះអាស៊ីអឺរ៉ុប នឹងបើកទ្វាកីឡដ្ឋាន AEU Sport Park របស់ខ្លួនទទួលក្រុមបាល់ទាត់ព្រះខ័នរាជស្វាយរៀង នៅវេលាម៉ោង៣រសៀល។ ទំព័រហ្វេសប៊ុករបស់កម្ពុជាថ្មី នឹងធ្វើការផ្សាយផ្ទាល់ពីការប្រកួតនេះផងដែរ។ ក្រុមអាស៊ីអឺរ៉ុប កំពុងដឹកនាំដោយលោក សុក វាសនា ដោយពេលនេះកំពុងឈរចំណាត់ថ្នាក់លេខ៧បណ្តោះអាសន្នក្នុងតារាងរួមដែលមានក្រុមចំនួន១២ ក្រោយប្រកួតបាន៩លើក ឈ្នះបាន៣លើក ស្មើគ្នា៣លើក និងចាញ់៣លើក មាន១២ពិន្ទុក្នុងដៃ។ ខ្សែប្រយុទ្ធកាម៉េរូន Befolo Mbarga Privat ជាកីឡាករឆ្នើមម្នាក់ក្នុងក្រុមក្រោយរកគ្រាប់បាន១៣គ្រាប់ម្នាក់ឯងកន្លងមកនេះ។
ចំណែកក្រុមព្រះខ័នរាជស្វាយរៀង វិញមួយរយៈចុងក្រោយនេះហាក់ជួបបញ្ហារឿងកីឡាកររបួសនិងកីឡាករសំខាន់ៗជាប់ពិន័យពីសំណាក់គណៈកម្មការវិន័យរបស់សហព័ន្ធកីឡាបាល់ទាត់កម្ពុជា កាលពីពេលកន្លងទៅ។ លោក Conor Nestor គ្រូបង្គោលក្លិបព្រះខ័នរាជស្វាយរៀង កំពុងតែឈឺក្បាលរឿងលទ្ធផលមិនសូវល្អរបស់ក្រុមក្នុងប៉ុន្មានប្រកួតចុងក្រោយជាពិសេសគឺក្រុមកំពុងតែឈរចំណាត់ថ្នាក់លេខ៩បណ្តោះអាសន្នក្នុងចំណោមក្លិបទាំង១២ បន្ទាប់ពីឈ្នះបាន៣លើកស្មើគ្នា២លើកនិងចាញ់៤លើក។
*ក្រសួងការពារជាតិ ជួបសូលទីឡូអង្គរ
ក្រុមក្រសួងការពារជាតិ ត្រូវទទួលក្រុមសូលទីឡូអង្គរ លើទីលានកីឡដ្ឋានកងយោធពលខេមរភូមិន្ទ (ស្តាតចាស់) វេលាម៉ោង៦ល្ងាច។ ផេកហ្វេសប៊ុករបស់គណៈកម្មការប្រកួតបាល់ទាត់ជាតិកម្ពុជា នឹងផ្សាយផ្ទាល់ពីការប្រកួតនេះផងដែរ។ ក្រសួងការពារជាតិ នឹងអវត្តមានគ្រូបង្វឹក លោក ភា សុភត្រា និងកីឡាករបរទេស២នាក់ផ្សេងទៀត ក្នុងការប្រកួតនេះដោយសារជាប់ពិន័យនិងរងរបួស។ ៩ប្រកួតមកនេះក្រុមក្រសួងការពារជាតិ ឈ្នះបាន៥លើក និងចាញ់៤លើក ឈរលេខ៤ បណ្តោះអាសន្ន។
ចំណែកក្រុមសូលទីឡូអង្គរ វិញក្រោមការដឹកនាំពីគ្រូបង្វឹកជនជាតិជប៉ុន Yuki Matsuda ជាគ្រូបង្គោលប្រចាំក្រុមទើបតែបញ្ចប់វគ្គសិក្សាគ្រូបង្វឹកបាល់ទាត់កម្រិត AFC A License នៅប្រទេសសិង្ហបុរី។ ៩ប្រកួតកន្លងមកក្រុមសូលទីឡូអង្គរ ឈ្នះបាន២លើក ស្មើគ្នា២លើកនិងចាញ់ដល់ទៅ៥លើក ខណៈជ័យជម្នះក្នុងប្រកួតនេះពិតជាចាំបាច់ក្នុងការរកពិន្ទុបន្ថែមដើម្បីគេចផុតពីតំបន់បាតតារាងផងដែរ។
*អគ្គស្នងការដ្ឋាននគរបាលជាតិ ប៉ះអង្គរថាយហ្គឺរ
ក្រុមអគ្គស្នងការដ្ឋាននគរបាលជាតិ នឹងត្រូវប៉ះក្រុមអង្គរថាយហ្គឺរ លើទីលានពហុកីឡដ្ឋានជាតិ វេលាម៉ោង៦និង៣០នាទីល្ងាច ខណៈការប្រកួតនេះមានផ្សាយផ្ទាល់តាមប៉ុស្តិ៍ BTV News។ ក្រុមប៉ូលីសកំពុងឈរលេខ៦ ក្នុងចំណោមក្លិបទាំង១២ បន្ទាប់ពីឈ្នះបាន៤លើក ស្មើគ្នា២លើកនិងចាញ់៣លើក។ លោក នុត សូនី គ្រូបង្វឹកក្រុមនេះរំពឹងថា កូនក្រុមនឹងធ្វើបានល្អបន្ថែមទៀតក្នុងប្រកួតនៅពេលខាងមុខៗ ស្របពេលមានកីឡាករស្ទើរតែពាក់កណ្ដាលក្រុម ទើបតែបញ្ចប់បំពេញកាតព្វកិច្ចនៅសាលាបណ្ឌិតសភានគរបាលជាតិ។
ចំពោះក្រុមអង្គរថាយហ្គឺរ ឆ្លងកាត់ប្រកួត៩លើកមកនេះឈ្នះបាន៣ លើកស្មើគ្នាបាន២លើក និងចាញ់៤លើកមាន១១ពិន្ទុ។ ក្រុមនេះកំពុងតែដឹកនាំដោយលោក Oriol Mahedano ដែលជាគ្រូបង្វឹកសញ្ជាតិអេស្ប៉ាញ កាន់អាជ្ញាប័ណ្ណគ្រូបង្វឹកកម្រិត UEFA A licence ដែលមានសមាជិក២៥នាក់។ លោក Akihiro Kato ដែលជាប្រធានក្លិបបានដាក់គោលដៅយកកៅអីនៅតំបន់ក្រុមខ្លាំងទាំង៤ប្រចាំរដូវកាល (Top4) នៅឆ្នាំនេះ ខណៈនៅឆ្នាំ២០២០ ក្លិបចង់ប្រជែងយកជើងឯក។
សម្រាប់កម្មវិធីប្រកួតផ្សេងទៀតប្រចាំសប្ដាហ៍ទី១០នេះនឹងបន្តធ្វើឡើងនៅថ្ងៃអាទិត្យ ទី១៧ ខែមិថុនា ដោយក្រុមវិសាខា ប៉ះបឹងកេត វេលាម៉ោង៣រសៀលលើទីលានកីឡដ្ឋានវេស្ទើន មានផ្សាយផ្ទាល់តាម BTV News ហើយក្រុមភ្នំពេញក្រោន ទទួលអគ្គីសនីកម្ពុជា វេលាម៉ោង៦ល្ងាច មានផ្សាយផ្ទាល់តាមផេកកម្ពុជា និងក្រុមណាហ្គាវើល ជួបវេស្ទើនភ្នំពេញ វេលាម៉ោង៦ល្ងាចលើទីលានពហុកីឡដ្ឋានជាតិ មានផ្សាយតាមផេករបស់ CNCC៕
Source: Kampuchea Thmey Daily
0 Comments