ភ្នំពេញ ៖ ស្ថានបេសកកម្មអចិន្ត្រៃយ៍របស់កម្ពុជាប្រចាំនៅ UN បានទាត់ចោលរាល់សេចក្តីថ្លែងការណ៍របស់ក្រុមជំនាញសិទ្ធិមនុស្សប្រចាំអង្គការសហប្រជាជាតិ ដែលបានចេញផ្សាយកាលពីថ្ងៃទី១៤ ខែមិថុនា ឆ្នាំ២០១៨ កន្លងទៅ ព្រមទាំងចាត់ទុកសេចក្តីថ្លែងការណ៍ ដែលមានទស្សនៈលម្អៀងទៅលើក្រមសីលធម៌សម្រាប់ប្រព័ន្ធផ្សព្វផ្សាយព័ត៌មាន ក្នុងដំណើរការបោះឆ្នោត ដែលចេញដោយ គ.ជ.ប ហើយថែមទាំងបកស្រាយច្បាប់ស្តីពីការបោះឆ្នោតជ្រើសតាំងតំណាងរាស្ត្រខុសថែមទៀតផង។
ការលើកឡើងរបស់ស្ថានបេសកកម្មអចិន្ត្រៃយ៍កម្ពុជាប្រចាំនៅ UN លើកឡើងបែបនេះ បន្ទាប់ពី ក្រុមសិទ្ធិមនុស្សអង្គការសហប្រជាជាតិ បានចេញសេចក្តីថ្លែងការណ៍មួយ កាលពីថ្ងៃទី១៤ ខែមិថុនា ឆ្នាំ២០១៨ បង្ហាញក្តីព្រួយបារម្ភមួយចំពោះក្រមសីលធម៌សម្រាប់ប្រព័ន្ធផ្សព្វផ្សាយព័ត៌មាន ដែលចេញដោយ គ.ជ.ប ហើយបានចាត់ទុកការចេញក្រមសីលធម៌នេះ ជាការធ្វើឲ្យប៉ះពាល់ដល់សិទ្ធិសេរីភាពព័ត៌មាន និងរាំងខ្ទប់សិទ្ធិបញ្ចេញមតិជាដើម។
សេចក្តីប្រកាសព័ត៌មានរបស់តំណាងស្ថានបេសកកម្មអចិន្ត្រៃយ៍របស់កម្ពុជាប្រចាំនៅអង្គការសហប្រជាជាតិ (UN) និងអង្គការអន្តរជាតិនានា នៅទីក្រុងហ្សឺណែវ ប្រទេសស្វីស ចុះថ្ងៃទី១៥ ខែមិថុនា ឆ្នាំ២០១៨ បានលើកឡើងថា តាមការពិតក្រមសីលធម៌សម្រាប់ប្រព័ន្ធផ្សព្វផ្សាយព័ត៌មានក្នុងដំណើរការបោះឆ្នោត ដែលចេញដោយ គ.ជ.ប មិនមានបញ្ញត្តិណាមួយដែលហាមឃាត់ប្រព័ន្ធផ្សព្វផ្សាយមិនឲ្យបំពេញកិច្ចការរបស់ខ្លួនស្របតាមច្បាប់ជាធរមាននោះឡើយ ហើយក្រមសីលធម៌នេះ មានគោលបំណងបង្កើតបរិយាកាសអំណោយផលដល់ការបោះឆ្នោតឲ្យដំណើរការទៅដោយរលូន និងមានសណ្តាប់ធ្នាប់។ ទោះនៅក្នុងសង្គមប្រជាធិបតេយ្យក៏ដោយ ប្រព័ន្ធផ្សព្វផ្សាយព័ត៌មានត្រូវប្រតិបត្តិវិជ្ជាជីវៈរបស់ខ្លួន ដោយស្ថិតនៅក្រោមច្បាប់ និងបទបញ្ញត្តិដែលពាក់ព័ន្ធ។ ដូចគ្នាផងដែរ អ្នកជំនាញសិទ្ធិមនុស្ស អាណត្តិរបស់ខ្លួនត្រូវស្ថិតនៅក្រោមក្រមសីលធម៌អ្នករាយការណ៍ពិសេស លក្ខខណ្ឌយោង និងសៀវភៅប្រតិបត្តិការងារ។
ស្ថានបេសកកម្មអចិន្ត្រៃយ៍របស់កម្ពុជាប្រចាំនៅ UN អះអាងថា វាជារឿងចម្លែក នឹងធ្វើឲ្យមានការភាន់ច្រឡំយ៉ាងខ្លាំង មិនចំពោះតែសាធារណជន និងរាជរដ្ឋាភិបាលកម្ពុជាប៉ុណ្ណោះទេ ប៉ុន្តែចំពោះសហគមន៍អន្តរជាតិផងដែរ ដែលអ្នកជំនាញសិទ្ធិមនុស្សបានចោទប្រកាន់ថា វិធានការបច្ចុប្បន្នរបស់ គ.ជ.ប អាចមានផលប៉ះពាល់អវិជ្ជមានទៅដល់សិទ្ធិសេរីភាពសមាគម និងការប្រមូលផ្ដុំដោយសន្តិវិធីសម្រាប់ការបោះឆ្នោតឆ្នាំនេះ។ ស្ថានបេសកកម្មអចិន្ត្រៃយ៍សូមរំលឹកអ្នកជំនាញសិទ្ធិមនុស្សថា វិធានការទាំងនេះ ដូចគ្នាទៅនឹងវិធានការ ដែលអនុវត្តនៅអំឡុងពេលបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០១៧ ហើយត្រូវបានសហគមន៍អន្តរជាតិស្វាគមន៍ និងសាទរដោយហេតុថា វិធានការទាំងនេះ អនុញ្ញាតឱ្យការបោះឆ្នោតប្រព្រឹត្តទៅប្រកបដោយសណ្តាប់ធ្នាប់ ដែលអាចជាគំរូល្អ សម្រាប់ការបោះឆ្នោតនាពេលអនាគត ហើយអ្វីដែល គ.ជ.ប មានបំណងហាមឃាត់នោះ គឺការផ្សព្វផ្សាយ ដែលញុះញង់ឲ្យមានកំហឹង និងការរើសអើងជាតិសាសន៍តាមគ្រប់រូបភាព។ មិនមានវិធានការណាមួយរបស់ គ.ជ.ប មានគោលបំណងកៀបសង្កត់សេរីភាពសមាគម និងការប្រមូលផ្ដុំ ដោយសន្តិវិធីនោះឡើយ។
ពាក់ព័ន្ធនឹងការអំពាវនាវមិនឲ្យប្រជាពលរដ្ឋទៅបោះឆ្នោត ឬការរារាំងមិនឲ្យទៅបោះឆ្នោតស្ថានបេសកកម្មអចិន្ត្រៃយ៍ មានការភ្ញាក់ផ្អើល ដែលអ្នកជំនាញសិទ្ធីមនុស្សមិនយោងតាមមាត្រាណាមួយនៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ ឲ្យបានច្បាស់លាស់ ដើម្បីធ្វើជាមូលដ្ឋានសម្រាប់ការចោទប្រកាន់មកលើរាជរដ្ឋាភិបាលកម្ពុជាអំពីការរំលោភបំពានសិទ្ធិប្រជាពលរដ្ឋក្នុងការបោះឆ្នោតឬមិនបោះឆ្នោត។ ស្ថានបេសកកម្មអចិន្ត្រៃយ៍កម្ពុជាបន្តថា សិទ្ធិបោះឆ្នោតរបស់ប្រជាពលរដ្ឋត្រូវបានធានាដោយច្បាប់ នឹងមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា ហើយត្រូវផ្ដន្ទាទោសចំពោះជនទាំងឡាយណា ដែលបំពានសិទ្ធិរបស់អ្នកដទៃ ឬបំផ្លាញទំនុកចិត្តសាធារណជនមកលើការបោះឆ្នោត។ មាត្រា១៤២ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ បានចែកថា ជនទាំងឡាយណា ដែលតាមគ្រប់មធ្យោបាយទុច្ចរិត រារាំងប្រជាពលរដ្ឋ ដែលមានសិទ្ធិបោះឆ្នោតមិនអោយទៅបោះឆ្នោត ឬធ្វើឲ្យមានការភាន់ច្រឡំ នាំឲ្យបាត់បង់ទំនុកចិត្តលើការបោះឆ្នោត ត្រូវទទួលការផាកពិន័យពី៥លានរៀលទៅ២០ លានរៀលដោយមិនទាន់គិតដល់បណ្ដឹងអាជ្ញាដែលអាចកើតមាន។
គួរកត់សម្គាល់ផងដែរថា សិទ្ធិរបស់ប្រជាពលរដ្ឋ មិនមែនជាសិទ្ធិអត្តនោម័តនោះទេ។ មាត្រា ១៩ នៃកតិកាសញ្ញាអន្តរជាតិ ស្តីពីសិទ្ធិពលរដ្ឋ និងសិទ្ធិនយោបាយចែងថា ការប្រើប្រាស់សេរីភាពនៃការបញ្ចេញមតិ តម្រូវឲ្យមានករណីយកិច្ច និងការទទួលខុសត្រូវពិសេស ដោយពិចារណាទៅលើសិទ្ធិរបស់អ្នកដទៃ សន្តិសុខជាតិ និងសណ្ដាប់ធ្នាប់សាធារណៈ។ បន្ថែមលើនេះទៀត ករណីយកិច្ចរបស់រូបវន្តបុគ្គល និងនីតិបុគ្គល ក្នុងការអនុវត្តសិទ្ធិរបស់ខ្លួន ដោយការទទួលខុសត្រូវ គឺជាលក្ខខណ្ឌតម្រូវ ដែលមានចែងក្នុងវិធាន និងបទដ្ឋានអន្តរជាតិ ស្តីពីសិទ្ធិមនុស្ស។ ដូច្នេះការផ្ដន្ទាទោសអ្នកប្រព្រឹត្តបទល្មើស ដោយអាជ្ញាធរ ដែលត្រូវបានទទួលស្គាល់តាមផ្លូវច្បាប់ ដើម្បីជាប្រយោជន៍នៃសាធារណៈជន មិនគួរត្រូវបានបកស្រាយថា ជាការគំរាមកំហែងសិទ្ធិមនុស្ស សេរីភាពនៃការបញ្ចេញមតិ ឬទស្សនៈ ឬគំនិតនយោបាយទេ ប៉ុន្តែគួរតែជាការអនុវត្តនីតិរដ្ឋ។
ជាចុងក្រោយ ពាក់ព័ន្ធនឹងការអំពាវនាវរបស់អ្នករាយការណ៍ពិសេសឲ្យដោះលែងអ្នកជាប់ឃុំ ស្ថានបេសកកម្មអចិន្ត្រៃយ៍យល់ឃើញថា អាណត្តិរបស់អ្នករាយការណ៍ពិសេស គឺជួយរាជរដ្ឋាភិបាលកម្ពុជា ក្នុងការលើកកម្ពស់ និងការពារសិទ្ធិមនុស្សមិនមែនចេញសេចក្តីថ្លែងការណ៍ ដែលជ្រៀតជ្រែកលើដំណើរការនៃនីតិវិធីតុលាការ ដែលកំពុងប្រព្រឹត្តទៅនៃរដ្ឋប្រជាធិបតេយ្យមួយឡើយ៕
Source: Kampuchea Thmey Daily
0 Comments