នី សុភី អ្នកប្រដាល់ក្លិបសាលវ័ន្តកីឡា ត្រូវបានគេផ្គូអោយជួបប្រកួតជាមួយWatcharalek Site Kolab នៅក្នុងកម្មវិធីប្រដាល់គូបូតាលើសង្វៀនស្ទឹងមានជ័យ នាយប់ថ្ងៃសុក្រទី០៨ មិថុនា ២០១៨ នេះ។
នី សុភី ម្ចាស់ខ្សែក្រវាត់លីអូទម្ងន់៧០គីឡូក្រាម ដែលក្រោយពីយកឈ្នះម៉ឺន សុភា អ្នកប្រដាល់សមាគមកីឡាប្រដាល់ក្រសួងការពារជាតិក្នុងវគ្គផ្តាច់ព្រ័ត្រនោះ ពេលនេះគេត្រូវជួបគូសត្រូវចាស់គឺ Watcharalek Site Kolab ដែលធ្លាប់វាយចាញ់គេដោយពិន្ទុពីរលើកកន្លងមក ។អ្នកប្រដាល់ទាំងពីរជួបគ្នា ក្នុងប្រភេទទម្ងន់៧០គីឡូក្រាម។
Watcharalek នេះ គេជាជើងខ្លាំងមួយរូបក្នុងចំណោមកីឡាករថៃដែលឡើងមកប្រកួតនៅស្រុកខ្មែរនោះ ។ គេទើបទទួលបានចំណាត់ថ្នាក់លេខ៣ខ្សែក្រវាត់លីអូទម្ងន់៧០គីឡូក្រាម ។ក្នុងការប្រកួតវគ្គជម្រុះលីអូថ្ងៃទី០១មេសា២០១៨ Watcharalek បានវាយចាញ់សុភី ដោយពិន្ទុ ។អ្នកប្រដាល់ថៃរូបនេះ មានកំនត់ត្រាប្រកួតតែចំនួន១៣៥លើក ឈ្នះ៩៥លើក ចាញ់១៩លើក ស្មើ០១លើក និងធ្លាប់វាយដៃគួរអោយសន្លប់១៨លើកឯណោះ។ទោះជាយ៉ាងណា អ្នកប្រដាល់ថៃរូបនេះ មកជួបនី សុភី គឺ មិនប្រាកដថាស្រួលខ្លួនប៉ុន្មានដែរ ព្រោះខ្លួនគេធ្លាប់ចាញ់សុភី ដល់ទៅពីរលើករួចទៅហើយ ។
នី សុភី គេមានកំនត់ត្រាប្រកួតចំនួន១៥៨លើក ឈ្នះ១២០លើក ចាញ់២៨លើក ស្មើ ១០លើក និង ធ្លាប់ផ្តួលដៃគូអោយសន្លប់ចំនួន ២៥ ។ ការប្រកួតចុងក្រោយនេះ នី សុភី បានវាយឈ្នះម៉ឺន សុភា ដោយពិន្ទុក្នុងការជួបគ្នាផ្តាច់ព្រ័ត្រដណ្តើមខ្សែក្រវាត់លីអូទម្ងន់៧០គ.ក្រ កាលពីថ្ងៃទី១៣ឧសភា២០១៨ ។
នី សុភី មានចិត្តប្រដាល់ធំ មិនចេះខ្លាច មិនចេះញញើត ។ ប៉ុន្តែយ៉ាងណា សុភី មិនអាចមើលស្រាលអ្នកប្រដាល់ថៃនោះបានឡើយ ។ ចាំមើល តើ នី សុភី អាចយកឈ្នះ Watcharalek បានទៀតឬអត់។
ចំណែក ចាន់ ប៊ុនហឿន អ្នកប្រដាល់ក្លិបនិរោធមានជ័យ ត្រូវគេផ្គូផ្គងអោយជួបប្រកួតជាមួយអ្នកប្រដាល់ថៃ Chakphet Phor.Silak ដោយប្រកួតគ្នាក្នុងទម្ងន់៦០ គ.ក្រ ។ ពីរនាក់នេះ ពុំធ្លាប់ដែលប៉ះគ្នាម្តងណានៅឡើយទេកន្លងមក។
ចាន់ ប៊ុនហឿន ជើងខ្លាំងរបស់កម្ពុជានេះ គេទើបតែផ្តួលយកឈ្នះអ្នកប្រដាល់ថៃឈ្មោះPhat Chhayakphum ដោយពិន្ទុ កាលពីថ្ងៃទី១២ឧសភាកន្លងមកនេះ ។ ជាលើកទី២៩ របស់ប៊ុនហឿនហើយ ដែលគេជួបប្រកួតជាមួយថៃនេះ។ ប៊ុនហឿន ប្រកួតជាមួយថៃ២៨លើកកន្លងមកនេះ គឺឈ្នះ១៩លើក ចាញ់០៧លើក និងស្មើ០២លើក។
Chakphet Phor.Silak ដែលជាគូរបស់ចាន់ ប៊ុនហឿននេះ ក៏មិនធ្លាប់មកប្រកួតនៅកម្ពុជាដែរកន្លងមក។ អ្នកប្រដាល់ថៃនេះ ជាជើងខ្លាំងទម្ងន់៦០គីឡូក្រាមប្រចាំនៅស្រុកថៃ។ ឆ្លងកាត់ការប្រកួត៧៧លើក Chakphet Phor.Silak វាយឈ្នះ៦៣លើក ចាញ់១៣លើក និងស្មើ០១លើក។
ចាន់ ប៊ុនហឿន គេមានប្រវត្តិប្រកួតចំនួន៦៨លើក ឈ្នះ៥៧លើក និងចាញ់១០លើក និងស្មើ០១លើក ។ ប៊ុនហឿនគេមានថ្វីកែងនិងជង្គង់ល្អណាស់ តែយ៉ាងណាការឈ្នះចាញ់រវាងចាន់ ប៊ុនហឿន និង Chakphet Phor.Silak នេះ ពុំមាននរណាហ៊ានទាយមុនថាអ្នកណាឈ្នះនោះទេ ?៕
Source: Kampuchea Thmey Daily
0 Comments