Watcharalek Site Kolab អ្នកប្រដាល់ជើងខ្លាំងរបស់ថៃ ដែលសុំឡើងសងសឹក នី សុភី អ្នកប្រដាល់កម្ពុជា ក្លិបសាលវ័ន្តកីឡា កាលពីយប់ថ្ងៃសុក្រទី០៨ ខែមិថុនា ឆ្នាំ២០១៨ នៅក្នុងកម្មវិធីប្រដាល់គូបូតាលើសង្វៀនបាយ័នស្ទឹងមានជ័យនោះ គឺពុំបានសម្រេចនោះឡើយ។
នី សុភី ដែលជាម្ចាស់ខ្សែក្រវាត់លីអូទម្ងន់៧០គីឡូក្រាម បានប្រើពេលមិនដល់២ទឹកទេ ផ្តួល Watcharalek អោយសន្លប់ក្រោកលែងរួច ។ នៅក្នុងការប្រកួតដើមទឹកទី២នោះ Watcharalek ត្រូវនី សុភី អុកជង្គង់ចូលពោះទឹកជាច្រើនជង្គង់ ដែលធ្វើឲ្យ Watcharalek ចង់គាំងទៅហើយ ។តែយ៉ាងណា អ្នកប្រដាល់ថៃរូបនេះ នៅស៊ូបន្តការប្រកួតទៀត ប៉ុន្តែមិនបានមួយដង្ហើមចង្រិតផង ក៏ត្រូវនី សុភី ពុះកែងត្រូវចំមុខមួយកែង បណ្តាលអោយដួលដេកលើរេញ ។លោកធន សុភា អាជ្ញាកណ្តាលបានបញ្ឈប់ការប្រកួត បន្ទាប់ពីមើលឃើញ Watcharalek មានលក្ខណះធ្ងន់ធ្ងរ មិនអាចបន្តការប្រកួតទៀតបាននោះ ហើយក៏បានផ្តល់ជ័យជម្នះអោយ នី សុភី ឈ្នះក្នុងទឹកទី២នេះតែម្តង ។
Watcharalek Site Kolab ធ្លាប់វាយចាញ់នី សុភី ដោយពិន្ទុពីរលើករួចទៅហើយកន្លងមក ។ តែ លើកទី៣នេះ Watcharalek ចាញ់រាងធ្ងន់ធ្ងរដោយសន្លប់ក្រោមកែងរបស់នី សុភី ។ អ្នកប្រដាល់ទាំងពីរជួបគ្នា ក្នុងប្រភេទទម្ងន់៧០គីឡូក្រាម ។
Watcharalekនេះ គេជាជើងខ្លាំងមួយរូបក្នុងចំណោមកីឡាករថៃ ដែលឡើងមកប្រកួតនៅស្រុកខ្មែរនោះ ។ គេទើបទទួលបានចំណាត់ថ្នាក់លេខ៣ខ្សែក្រវាត់លីអូទម្ងន់៧០គីឡូក្រាម ។អ្នកប្រដាល់ថៃរូបនេះ មានកំនត់ត្រាប្រកួតតែចំនួន១៥១លើក ឈ្នះ១២២លើក ចាញ់២៥លើក ស្មើ០៤លើក និងធ្លាប់វាយដៃគួអោយសន្លប់២៦លើកឯណោះ។
ចំណែក ចាន់ ប៊ុនហឿន អ្នកប្រដាល់ក្លិបនិរោធមានជ័យ បានចំណាយពេលរហូតដល់ទឹកទី៥ ទើបផ្តួលអ្នកប្រដាល់ថៃ Jakphetch Phor.Silak អោយសន្លប់ ។ ពីរនាក់នេះ ប្រកួតគ្នាក្នុងទម្ងន់៦០ គ.ក្រ ។
ក្នុងការប្រកួតទឹកទី២ ចាន់ ប៊ុនហឿន ប៉ិះតែសន្លប់ក្រោមកណ្តាប់ដៃរបស់ថៃ ដោយសារត្រូវមួយដៃរបស់Jakphetchចំមុខ ប៉ុន្តែក្រោយអាជ្ញាកណ្តាលរាប់ដល់៨ ប៊ុនហឿន គេអាចបន្តការប្រកួតទៀតបាន។ចាប់ពីទឹកទី៣ទៅ ចាន់ប៊ុនហឿន បានសម្រុកវាយកែង ជង្គង់និងដាល់ទៅលើ Jakphetch សឹងតែអ្នកប្រដាល់ថៃរូបនេះ តដៃមិនទាន់ ។
តែយ៉ាងណា Jakphetch គេអាចទប់ការវាយប្រហាររបស់ប៊ុនហឿន រហូតដល់ទឹកទី៥ ។ ទោះជាយ៉ាងនេះក្តី Jakphetch ក៏នៅតែគេចមិនផុតពីសន្លប់ក្រោមសន្ទុះជង្គង់និងកែងរបស់ចាន់ប៊ុនហឿន បានដែរ គឺត្រូវសន្លប់ដដែល បន្ទាប់ពីត្រូវជង្គង់និងកែងប៊ុនហឿនវាយចំពេញៗនោះ ។ជាលើកទី២០ របស់ប៊ុនហឿនហើយ ដែលគេបានវាយឈ្នះថៃនេះ ។
ចំពោះ ប៊ុន សុធា អ្នកប្រដាល់វ័យក្មេង នៃសមាគមកីលាប្រដាល់ក្រសួងការពារជាតិ បានផ្តួលបឺត សង្ឃឹម អ្នកប្រដាល់វ័យក្មេងក្លិបរ៉ាហាប់ស្វាយប៉ាក អោយសន្លប់ក្នុងទឹកទី២ ដោយសារកែង និងជង្គង់នោះ ។ ឯ អ្នកប្រដាល់ជុន សាវុធ ក្លិបកុសលកីឡា គេសន្លប់នៅក្នុងទឹកទី១ តែគេជាអ្នក ឈ្នះ ដោយសារដៃគូគឺ វុត្ថា ណាវី ក្លិបអង្គរធំគុនខ្មែរ បានវាយខុសលក្ខណះបច្ចេកទេស ដោយវាយកែងពីក្រោយក្បាលនោះ ដូច្នេះគេត្រូវចាញ់ដោយស្វ័យប្រវត្តិ ។ រិទ្ធ ផៃឡុក ក្លិបអាណាចក្រគុនខ្មែរប្រកួតស្មើពិន្ទុជាមួយ ប៉ុក វិបុល ក្លិបកងពលតូចទ័ពឆ័ត្រយោង៩១១៕
Source: Kampuchea Thmey Daily
0 Comments