ប្រធានាធិបតីចិនលោក Xi Jinping បានប្រាប់រដ្ឋមន្ត្រីការពារជាតិអាមេរិកលោក Jim Mattis កាលពីថ្ងៃពុធនៅក្នុងដំណើរទស្សនកិច្ចលើកដំបូងរបស់គាត់ទៅកាន់ទីក្រុងប៉េកាំងថា ប្រទេសចិនបានប្តេជ្ញាចិត្តចំពោះសន្តិភាព ប៉ុន្តែមិនអាចបោះបង់ចោលទឹកដី “សូម្បីតែមួយចង្អាម” ដែលបុព្វការីជនរបស់ប្រទេសនេះបានបន្សល់ទុកឲ្យនោះទេ។
ការកត់សម្គាល់របស់លោក Xi បានគូសបញ្ជាក់ពីភាពតានតឹងយ៉ាងខ្លាំងនៃចំណងទាក់ទងរវាងចិននិងអាមេរិកជាពិសេសអំពីអ្វីដែលមន្ទីរបញ្ចកោណចាត់ទុកថាជាការបង្កើនយោធារបស់ចិននៅសមុទ្រចិនខាងត្បូងដែលជាផ្លូវឆ្លងកាត់ដ៏សំខាន់មួយសម្រាប់ពាណិជ្ជកម្មពិភពលោក។
ក៏ប៉ុន្តែភាពតានតឹងនៅក្នុងទំនាក់ទំនងរវាងសហរដ្ឋអាមេរិកនិងចិនបានពង្រីកទៅដល់វិស័យផ្សេងៗទៀតដែលរួមមានទាំងភាពភ័យខ្លាចនៃសង្គ្រាមពាណិជ្ជកម្មរវាងមហាអំណាចសេដ្ឋកិច្ចពិភពលោកទាំងពីរផងដែរ។
ក្រុងប៉េកាំងក៏មានការសង្ស័យយ៉ាងខ្លាំងផងដែរអំពីចេតនារបស់អាមេរិកចំពោះកោះតៃវ៉ាន់ដែលត្រូវបានផ្គត់ផ្គង់អាវុធដោយសហរដ្ឋអាមេរិក។ ប្រទេសចិនចាត់ទុកកោះនេះថាជាផ្នែកដ៏ពិសិដ្ឋនៃទឹកដីរបស់ខ្លួន។
ទូរទស្សន៍រដ្ឋបានរាយការណ៍ថា ក្នុងកិច្ចប្រជុំនៅវិមានមហាសាលប្រជាជនរបស់ទីក្រុងប៉េកាំង លោក Xi បានប្រាប់លោក Mattis ថា ប្រទេសចិនមានបំណងចង់បានតែសន្តិភាពប៉ុណ្ណោះហើយនឹងមិនបង្ក “ភាពចលាចល” ទេ។
ទំនាក់ទំនងរវាងប្រទេសទាំងពីរត្រូវបានសាកល្បងនៅក្នុងរយៈពេលប៉ុន្មានខែថ្មីៗនេះ។ កាលពីខែឧសភា មន្ទីរបញ្ចកោណបានដកការអញ្ជើញប្រទេសចិនពីការចូលរួមក្នុងសមយុទ្ធកងទ័ពជើងទឹកពហុជាតិសាសន៍មួយដោយលើកឡើងពីសកម្មភាពយោធារបស់ចិននៅក្នុងសមុទ្រចិនខាងត្បូង។ ក្រុមមន្ត្រីបាននិយាយថា សេចក្តីសម្រេចរបស់អាមេរិកបានធ្វើឲ្យក្រុងប៉េកាំងខឹងសម្បាហើយត្រូវបានលើកឡើងមកពិភាក្សាក្នុងអំឡុងកិច្ចសន្ទនាជាមួយលោក Mattis ។
គួរបញ្ជាក់ថា លោក Mattis គឺជាប្រមុខមន្ទីរបញ្ចកោណដំបូងគេដែលធ្វើទស្សនកិច្ចនៅប្រទេសចិនចាប់តាំងពីឆ្នាំ២០១៤មក៕ REUTERS
Source: Kampuchea Thmey Daily
0 Comments