ភ្នំពេញ ៖ តារាចម្រៀងពីរោះរណ្ដំចិត្តអ្នកនាង ម៉េង កែវពេជ្ជតា ខណៈពេលដែលឱកាសនៃការបោះឆ្នោតកំពុងតែឈានចូលមកដល់នាពេលឆាប់ៗខាងមុខនោះ នាងក៏បានបញ្ចេញសារនិងកំណាព្យបំផុសស្មារតីដល់ប្រជាពលរដ្ឋខ្មែរគ្រប់រូបត្រូវតែចេញស្រឡាញ់សាមគ្គីគ្នានិងជាពិសេសគឺការចូលរួមបោះឆ្នោតឲ្យបានគ្រប់ៗគ្នា។
អ្នកនាង ម៉េង កែវពេជ្ជតា បានទម្លាយសំណេរសរសេរភ្ជាប់ជាកំណាព្យចាក់ដោយអារម្មណ៍មហាជនបែបនេះថា សូមខ្មែរទាំងអស់កុំឈ្លោះកុំខឹង ពេលហ្នឹងម៉ោងហ្នឹងត្រូវប្រឹងបំពេញ ចូលរួមបោះឆ្នោតជួយជាតិយើងវិញ ទើបបានចំណេញដល់ទាំងអស់គ្នា។ ឈប់ចាក់ឈប់រុកឈប់ស៊កឈប់សៀត ឈប់បំពុលទៀតឈប់ចងកម្មពារគ្មានបរទេសណាជួយឈឺកម្ពុជា អ្នកដែលវេទនាគឺខ្មែរគ្នាឯង។
សង្រួមចិត្តកាយរំសាយជម្លោះ ដោយធម៌សប្បុរសសន្តោសលើកលែង គិតប្រយោជន៍រួមឲ្យយូរអង្វែង ខ្មែរផុតចំបែងដោយធម៌ខន្តី។ ចូលរួមឲ្យបានកុំខានបោះឆ្នោត ខ្មែរអឺយកុំឆោតដៃស្អាតធ្វើអ្វី ២៩ កក្កដាជ្រលក់ម្រាមដៃ បោះជូនលេខ ២០ បានក្តីសុខសាន្ត។
តារាស្រីអ្នកនាង ម៉េង កែវពេជ្ជតា បានបញ្ជាក់ថា ជូនបងប្អូនរួមជាតិជាទីស្រលាញ់នេះជាការយល់ឃើញរបស់ខ្ញុំក្នុងនាមជាពលរដ្ឋម្ចាស់សន្លឹកឆ្នោតម្នាក់ មិនទាក់ទងនឹងអាជីពជាតារាទេ បើបងប្អូនណាមានមតិរិះគន់សូមគោរពសិទ្ធិឯកជន និងរក្សាតម្លៃជាតារារបស់ខ្ញុំផង ទើបមតិរបស់បងប្អូនមានតម្លាភាព និងចាត់ចូលក្នុងជំពូកអ្នកចេះដឹងជាអ្នកគោរពសិទ្ធិលទ្ធិប្រជាធិបតេយ្យ។
កុំភ្លេចថា ខ្ញុំនៅតែរក្សាកន្លែងរបស់បងប្អូនជាមិត្តខ្ញុំក្នុងហ្វេសប៊ុកក្នុងផេកដដែល ទោះដឹងថា បងប្អូននៅកន្លែងណាក៏ដោយ លើកលែងតែបងប្អូនចាកចេញដោយខ្លួនឯងនោះពិបាកនឹងចូលវិញហើយ ជួយមិនបានទេ។ សូមអរគុណដោយស្មោះ។ នេះជាសម្តីរៀបរាប់បន្ថែមរបស់តារាចម្រៀងសំឡេងស្រទន់អ្នកនាង ម៉េង កែវពេជ្ជតា។
សូមបញ្ជាក់ថា ចំពោះការបោះឆ្នោតថ្នាក់ជាតិដើម្បីជ្រើសរើសថ្នាក់ដឹកនាំប្រទេសកម្ពុជានឹងប្រព្រឹត្តិទៅនាថ្ងៃអាទិត្យ ទី២៩ ខែកក្កដា ឆ្នាំ២០១៨នេះ។ ដូច្នេះសូមបងប្អូនខ្មែរគ្រប់រូបត្រូវតែចូលរួមឲ្យបានគ្រប់គ្នាដើម្បីការបោះឆ្នោតនៅគ្រប់រាជធានីខេត្ត-ក្រុងទូទាំងប្រទេស៕
Source: Kampuchea Thmey Daily
0 Comments