ក្រុមបាល់ទាត់ណាហ្គាវើល ត្រូវប៉ះក្រុមភ្នំពេញក្រោន ខណៈក្រុមក្រសួងការពារជាតិ ទទួលក្រុមបឹងកេត នៅល្ងាចថ្ងៃសុក្រ ទី២៧ ខែកក្កដា ឆ្នាំ២០១៨ នេះក្នុងពានរង្វាន់បាល់ទាត់លីគកំពូលកម្ពុជា Metfone Cambodian League 2018 ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិកម្ពុជា(CNCC) សេនាធិការរបស់សហព័ន្ធកីឡាបាល់ទាត់កម្ពុជា។
សូមបញ្ជាក់ថា កាលពីពេលថ្មីៗ CNCC បានជូនដំណឹងពីការលើកពេលនៃការប្រកួតបាល់ទាត់២គូក្នុងពានរង្វាន់លីគកំពូលកម្ពុជា ដោយក្នុងនោះមានប្រកួតរវាងក្រុមណាហ្គាវើល ជួបក្រុមភ្នំពេញក្រោន នៅថ្ងៃទី២១ ខែកក្កដា ប្រចាំសប្ដាហ៍ទី១៥ និងសប្ដាហ៍ទី១៨ ក្រុមបឹងកេត ត្រូវជួបក្រុមម្ចាស់ផ្ទះក្រសួងការពារជាតិ នៅថ្ងៃទី០៥ ខែសីហា សុទ្ធតែត្រូវបានលើកមកប្រកួតនៅថ្ងៃទី២៧ ខែកក្កដា ខាងមុខហើយធ្វើនៅលើទីលានតែមួយគត់ គឺកីឡដ្ឋានស្ដាតចាស់។
ប្រភពព័ត៌មានបានបញ្ជាក់ថា ចំពោះការលើកការប្រកួតរបស់ក្រុមណាហ្គាវើល ជាមួយភ្នំពេញក្រោន ត្រូវលើកពេលដោយសារក្រុមណាហ្គាវើល ជាប់កម្មវិធីជាមួយក្រុមយុវជនខេត្តកំពង់ស្ពឺ ក្រោមអធិបតីភាពឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលធ្វើឡើងនៅខេត្តកំពង់ស្ពឺ។ ដោយឡែកក្រុមបឹងកេត ប៉ះក្រសួងការពារជាតិ វិញត្រូវលើកពេលដូចគ្នាព្រោះថាក្រុមបឹងកេត ត្រូវប្រកួតមិត្តភាពអន្ដរជាតិជាមួយក្រុមជម្រើសលីគជប៉ុន (Japan Football League) នៅដើមខែសីហាខាងមុខនេះ។
ក្រុមណាហ្គាវើល ត្រូវប៉ះក្រុមភ្នំពេញក្រោន នៅវេលាម៉ោង៣ល្ងាចលើទីលានកីឡដ្ឋានស្តាតចាស់ ព្រមទាំងមានផ្សាយផ្ទាល់តាមប៉ុស្តិ៍ BTV News ផងដែរ។ ក្រុមណាហ្គាវើល ត្រូវការពិន្ទុបន្ថែមដើម្បីប្រជែងកៅអីកំពូលតារាងជាបន្ត ខណៈក្រុមភ្នំពេញក្រោន ស្ទើតែអស់ឱកាសប្រជែងយកកៅអីជើងឯកទៅហើយនៅរដូវកាលនេះ។
ចំណែកក្រុមក្រសួងការពារជាតិ វិញត្រូវប៉ះក្រុមបឹងកេត នៅវេលាម៉ោង៦ល្ងាចលើទីលានកីឡដ្ឋានស្តាតចាស់ ព្រមទាំងមានផ្សាយផ្ទាល់តាមប៉ុស្ត៍ BTV News ដូចគ្នា។ ក្រសួងការពារជាតិ ជាក្រុមបេក្ខភាពមួយមិនអាចមើលរំលងបានក្នុងការប្រជែងយកជើងឯករដូវកាលនេះ ខណៈក្រុមកំពូលតារាងបឹងកេត ក៏ត្រូវការពិន្ទុបន្ថែមដើម្បីរក្សាកៅអីរបស់ខ្លួនដែរ៕
Source: Kampuchea Thmey Daily
0 Comments