អ្នកប្រដាល់ជើងខ្លាំងរបស់កម្ពុជាឡៅ ចិត្រា ក្លិបកងពលតូចទ័ពឆ័ត្រយោង៩១១ និង ចាន់ ប៊ុនហឿន អ្នកប្រដាល់ក្លិបនិរោធមានជ័យ បានវាយឈ្នះអ្នកប្រដាល់ឡាវនិងថៃដូចគ្នា នៅក្នុងការជួបប្រកួតគ្នាក្នុងកម្មវិធីប្រដាល់មិត្តភាពអន្តរជាតិ កាលពីយប់ថ្ងៃអាទិត្យទី២២ ខែកក្កដា ឆ្នាំ២០១៨ នៅសង្វៀនបាយ័នស្ទឹងមានជ័យ។
ឡៅ ចិត្រា បានផ្តួល Khunpholnoy Surarith អោយសន្លប់ក្នុងទឹកទី២ ។ អ្នកប្រដាល់ឡាវរូបនេះ មានកម្ពស់ចង់ខ្ពស់ជាងចិត្រាទៅទៀត ដែលក្នុងការប្រកួតទឹកដំបូង ចិត្រា ពិបាកផ្តួលគេបាន តែមកដល់ទឹក២ ទើបចិត្រាផ្តួលគេបាន តាមរយៈការវាយកែងចំចង្ការាប់៨ម្តង និងលើកទី២ អុកត្រូវ១ជង្គង់ចំចុងដង្ហើម បណ្តាលឲ្យ Khunpholnoyសន្លប់តែម្តង។
Khunpholnoy ជាអ្នកប្រដាល់ជើងខ្លាំងនៅស្រុកឡាវ ដោយមានប្រវត្តិចំនួន ៨៨លើក ក្នុងនោះ វាយឈ្នះ៦៥លើក ចាញ់១៩លើកនិងស្មើ០៤លើក ។ ចំណែក ឡៅ ចិត្រា មានប្រវត្តិប្រកួត៧១លើក ឈ្នះ៦៩ លើកនិងចាញ់៥លើក មិនដែលស្មើ ។ ចិត្រា គេធ្លាប់ផ្តួលអ្នកប្រដាល់ថៃច្រើននាក់ហើយ ជាពិសេសក្នុងចំណោមការប្រកួតជាមួយថៃជិត៤០លើកកន្លងមកនេះ គឺចិត្រាចាញ់តែ២លើកប៉ុណ្ណោះ។
ចំណែក ចាន់ ប៊ុនហឿន ដែលប៉ះជាមួយជើងខ្លាំងថៃ Famichai Thaharphran26 វិញនោះ គឺឈ្នះដោយលំបាក ព្រោះ Famichai គេដើរចូលជានិច្ច គ្រាន់តែស្ថានភាពពេលនោះ គឺ Famichai ចូលទៅឲ្យតែប៊ុនហឿនវាយប៉ុណ្ណោះ ដោយសារតែយ៉ាងនេះហើយ ទើបចាន់ ប៊ុនហឿន បានឈ្នះពិន្ទុនោះ។ Famichai ត្រូវអាជ្ញាកណ្តាលរាប៨ពីរដងក្នុងទឹកទី៣ និងក្នុងទឹកទី៤ ត្រូវបែកឈាមដោយសារកែងរបស់ប៊ុនហឿន។
ចំណែក ការប្រកួតរវាងអ្នកប្រដាល់រួមជាតិវិញ ចាន់ វ៉ារិទ្ធ អ្នកប្រដាល់ក្លិបនិរោធមានជ័យ បានផ្តួលអ្នកប្រដាល់ស៊ឹម សំ ក្លិបយុវវាលស្បូវខណ្ឌច្បារអំពៅ អោយបោះបង់ការប្រកួតក្នុងទឹកទី៣ បន្ទាប់ពីត្រូវកែងចំមុខនោះ ។ ពីរនាក់នេះ ជួបគ្នាក្នុងប្រភេទទម្ងន់៦០គីឡូក្រាម៕
Source: Kampuchea Thmey Daily
0 Comments