ភ្នំពេញ ៖ ដីដែលជាដីកម្មសិទ្ធិឯកជនរបស់រដ្ឋចំនួន១៥៦៥ក្បាលដី នៅភូមិដំណាក់ធំ១ ភូមិឫស្សី៣ សង្កាត់ស្ទឹងមានជ័យ ខណ្ឌមានជ័យត្រូវបានរដ្ឋបាលរាជធានីភ្នំពេញសម្រេចកាត់និងប្រទានកម្មជូនប្រជាពលរដ្ឋ និងបានបិទផ្សាយទិន្នន័យជាសាធារណៈនូវឯកសារនៃការវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធ ដើម្បីឲ្យបងប្អូនមកពិនិត្យមើល ជៀសវាង ខុសអក្ខរាវិរុទ្ធ ខុសឈ្មោះ ឬ បាត់ទំហំដីជាដើម។
ពិធីបិទផ្សាយទិន្នន័យជាសាធារណៈនេះបានធ្វើឡើងនាព្រឹកថ្ងៃទី២០ កក្កដា ឆ្នាំ២០១៨ នៅក្នុងបរិវេណវត្តនន្ទមុនី សង្កាត់ស្ទឹងមានជ័យ ខណ្ឌមានជ័យក្រោមវត្តមានលោកឃួង ស្រេងអភិបាលនៃគណៈអភិបាលរាជធានីភ្នំពេញអាជ្ញាធរដែនដី មន្ទីរពាក់ព័ន្ធនិងមានការចូលរួមពីប្រជាពលរដ្ឋរាប់រយនាក់។
លោកសារិន វណ្ណា ប្រធានមន្ទីររៀបចំដែនដីសំណង់និងរុយោដីរាជធានីភ្នំពេញបានមានប្រសាសន៍លើកឡើងថា រាជរដ្ឋាភិបាលកម្ពុជាក្រោមការងារដឹកនាំរបស់សម្តេចតេជោហ៊ុន សែនជានាយករដ្ឋមន្ត្រី បានចំណាយដីឯកជនរបស់រដ្ឋជិត១០០ហិកតា ជូនប្រជាពលរដ្ឋ មានសិទ្ធិកាន់កាប់ស្របច្បាប់។ ជាក់ស្តែងនៅពេលនេះសម្តេចបានសម្រេចប្រគល់ដីចំនួន ៩០៥ ក្បាលដីនៅភូមិតំណាក់ធំ និង៦៦០ក្បាលដីនៅភូមិឫស្សី៣ សង្កាត់ស្ទឹងមានជ័យ ខណ្ឌមានជ័យ ដែលសរុបទាំងអស់ចំនួន១៥៦៥ក្បាលដី។
លោកបន្តថា នេះជាតំណាក់កាលចុងក្រោយ មុនយកទៅបោះពុម្ពជាប័ណ្ណកម្មសិទ្ធិប្រគល់ជូនបងប្អូនប្រជាពលរដ្ឋ។ ការបិទក្បាលដីនេះមានរយៈពេល១៥ថ្ងៃ ដូច្នេះទេ សូមបងប្អូនមកពិនិត្យមើលក្បាលដីរបស់ខ្លួនឲ្យបានច្បាស់លាស់ ជៀសវាង ខុសអក្ខរាវិរុទ្ធ កម្មសិទ្ធិរួម ជាប្តី ជារបស់ប្រពន្ធជាដើម ឬ ការបាត់ទំហំដីជាដើម្បីឲ្យមន្ត្រីជំនាញរបស់យើងត្រូវចុះពិនិត្យនិងកែសម្រួលឡើងវិញឲ្យមានតម្លាភាព។
លោកក៏បានបញ្ជាក់ថា ក្បាលដីជានឹងប្រគល់ជូនបងប្អូនប្រជាពលរដ្ឋនេះជាអតីតដីរបស់វិទ្យុជាតិ នៃក្រសួងព័ត៌មាន ហើយ ការងារនេះនៅក្រោយការបោះឆ្នោតនឹងប្រគល់ជូនបងប្អូន មិនមែនសន្យាខ្យល់នោះទេ។
លោកឃួង ស្រេង បានមានប្រសាសន៍លើកឡើងថា ប្រជាពលរដ្ឋរស់នៅក្រោមអង់តែនដីរបស់វិទ្យុជាតិ នៃក្រសួងព័ត៌មាននេះ កន្លងមកនេះពិតជារស់នៅដោយការភ័យព្រួយ ដោយសារតែបងប្អូនរស់នៅលើដីឯកជនរបស់រដ្ឋ មិនដឹងថា ថ្ងៃណាត្រូវគេដេញចេញនោះទេ។ ប៉ុន្តែនៅពេលនេះមិនត្រឹមតែមិនដេញចេញប៉ុណ្ណោះទេ សម្តេចតេជោហ៊ុន សែននាយករដ្ឋមន្ត្រី នៅបានប្រគល់ជូនជាកម្មសិទ្ធិស្របច្បាប់ថែមទៀត។ នេះជាការយកចិត្តទុកដាក់របស់សម្តេច ចំពោះបងប្អូនប្រជាពលរដ្ឋ ដែលតែងតែគិតគូរជានិច្ចពីសុខទុក្ខរបស់ប្រជាពលរដ្ឋ។
លោកឃួង ស្រេង ក្នុងឱកាសនោះក៏បានស្នើឲ្យបងប្អូនប្រជាពលរដ្ឋទាំងអស់មកពិនិត្យក្បាលដីរបស់ខ្លួនឲ្យបានច្បាស់លាស់ ជៀសវាង ខុសអក្ខរាវិរុទ្ធ កម្មសិទ្ធិ ឬបាត់ទំហំដីជា ដើម្បីអោយមន្ត្រីរបស់យើងពិនិត្យនិងកែសម្រួលឡើងវិញឲ្យមានតម្លាភាព៕
Source: Kampuchea Thmey Daily
0 Comments