បាត់ដំបង ៖ យុវវ័យចំនួន២នាក់ ដែលត្រូវជាសង្សារនឹងគ្នា ត្រូវបានកម្លាំងសមត្ថកិច្ច ជំនាញតាមស្រាវជ្រាវរហូតឈានដល់ការចាប់ខ្លួន ដើម្បីបញ្ជូនទៅកាន់តុលាការខេត្តតាកែវ បន្ទាប់ពីជនសង្ស័យទាំង២នាក់នេះ ហ៊ានធ្វើសកម្មភាពប្លន់យកម៉ូតូ ដោយបានសម្លាប់ក្មេងប្រុសម្នាក់ ដែលជាម្ចាស់ម៉ូតូ នៅឯខេត្តតាកែវ រួចនាំគ្នាគេចខ្លួនមករស់នៅតាមខ្សែឲ្យបន្ទាត់ព្រំដែនកម្ពុជា ថៃ ក្នុងទឹកដីនៃខេត្តបាត់ដំបង អស់រយៈពេលជិត២សប្ដាហ៍។
ការឃាត់ខ្លួននេះ បានធ្វើឡើងនាថ្ងៃទី២៦ ខែកក្កដា ឆ្នាំ២០១៨ វេលាម៉ោង៩និង១៥នាទី ព្រឹក ត្រង់ចំណុចភូមិដូង ឃុំបឹងរាំង ស្រុកកំរៀង ខេត្តបាត់ដំបង ដោយកម្លាំងនគរបាលខេត្តបាត់ដំបង បានសហការជាមួយកម្លាំង នគរបាល នៃនាយកដ្ឋានព្រហ្មទណ្ឌ ខេត្តតាកែវ បន្ទាប់ពីមានដីកាអោយចូលខ្លួនចំនួន២ ដែលមានលេខ០៨៤ និង០៨៥ដ ប ខ ចុះថ្ងៃទី២៤ ខែកក្កដា ឆ្នាំ២០១៨ របស់លោក ជីវ ចាន់តារា ព្រះរាជអាជ្ញាសាលាដំបូងខេត្តតាកែវរួចមក។
នៅក្នុងដីកាបង្គាប់អោយចូលខ្លួននោះគឺបានកំណត់ទៅលើ ឈ្មោះ ផាន់ បញ្ញារិទ្ធិ ភេទប្រុស អាយុ១៧ឆ្នាំ រស់នៅភូមិព្រៃផ្តៅខាងត្បូង ឃុំព្រៃផ្តៅ ស្រុកព្រៃកប្បាស ខេត្តតាកែវ និងឈ្មោះ ហុន ធីតា ភេទស្រី អាយុ១៧ឆ្នាំ រស់នៅភូមិព្រៃចំបក់ ឃុំតាំងយ៉ាប ស្រុកព្រៃកប្បាស ខេត្តតាកែវ។
យោងតាមរបាយការរបស់សមត្ថកិច្ចខេត្តតាកែវ បានបញ្ជាក់ថា កាលពីថ្ងៃទី១២ ខែកក្កដា ឆ្នាំ២០១៨ វេលាម៉ោង១២ថ្ងៃត្រង់ គឺឈ្មោះ ណុប លឹមហេង ភេទប្រុស អាយុ១២ឆ្នាំ រស់នៅភូមិព្រៃផ្តៅខាងត្បូង ឃុំព្រៃផ្តៅ ស្រុកព្រៃកប្បាស ខេត្តតាកែវ បានចេញទៅលាងម៉ូតូ ហើយក៏បាត់ដំណឹងឈឹងតាំងពីថ្ងៃនោះមក ។
លុះនៅថ្ងៃទី ១៩ ខែ ឆ្នាំ ដដែល វេលាម៉ោង ១២ និង ៣០ នាទី មានប្រជាពលរដ្ឋបានប្រទះឃើញសពក្មេងប្រុសខាងលើ ស្លាប់ដោយដាច់ក្បាល នៅចំណុចទួល ត្រពាំងទួល ភូមិស្មន់មុន្នី ឃុំព្រៃផ្តៅ ស្រុកព្រៃកប្បាស ខេត្តតាកែវ ដោយភិនភាគ និងការសន្និដ្ឋានក្មេងប្រុសត្រូវបានជនសង្ស័យចង កព្យួរទៅនឹងមែកឈើ ដោយសារវាមានរយៈពេលមួយសប្តាហ៍ សពនោះក៏រលេះរលួយ ដាច់ ក ធ្លាក់មកដីតែម្តង។
បន្ទាប់ពីបានធ្វើការស្រាវជ្រាវអស់មួយរយៈរួចមក ជនសង្ស័យទាំងពីរត្រូវបានចាប់ខ្លួនដែលពួកគេគឺជាសង្សារនឹងគ្នា ហើយបានយកម៉ូតូនោះមកដាក់បញ្ចាំនៅក្រុងភ្នំពេញព្រមទាំងបានបន្តដំណើរមករួមរស់ជាមួយគ្នា នៅក្នុងស្រុកកំរៀង ខេត្តបាត់ដំបង ប៉ុន្តែទោះបីជាពួកគេខំប្រឹងគេចខ្លួនយ៉ាងណាក៏ដោយ ក៏នៅតែជាប់អន្ទាក់ប៉ូលិសដដែល ដោយបច្ចុប្បន្នជនសង្ស័យខាងលើត្រូវបានកម្លាំងសមត្ថកិច្ចនាំយកទៅកាន់ស្នងការដ្ឋាន នគរបាលខេត្តតាកែវហើយ៕
Source: Kampuchea Thmey Daily
0 Comments