ភ្នំពេញ ៖ យុវជនម្នាក់ ត្រូវបានកម្លាំងនគរបាលប៉ុស្តិ៍ស្ទឹងមានជ័យ២នៃអធិការដ្ឋានខណ្ឌមានជ័យចាប់ខ្លួនកាលពីយប់រំលងអធ្រាត្រឈានចូលថ្ងៃទី២៦ ខែកក្កដា ពាក់ព័ន្ធករណីឃាតកម្មទៅលើឪពុកបង្កើត។
យោងតាមប្រភពពីលោកអនុសេនីយ៍ឯក គឹម កល្យាណ មន្ត្រីនគរបាលផ្នែកព្រហ្មទណ្ឌខណ្ឌមានជ័យបានឲ្យដឹងថា កាលពីយប់រំលងអធ្រាត្រឈានចូលថ្ងៃទី២៦ ខែកក្កដានេះ មានស្ត្រីម្នាក់ឈ្មោះពុធ កញ្ញា អាយុ២៧ឆ្នាំស្នាក់នៅបន្ទប់ជួលភូមិព្រែកទាល់១ សង្កាត់ស្ទឹងមានជ័យ២ខណ្ឌមានជ័យ បានទូរស័ព្ទមកនគរបាលប៉ុស្តិ៍ឲ្យចាប់ខ្លួនឈ្មោះផល ឆាយ៉ា ភេទប្រុស អាយុ២៥ឆ្នាំដែលត្រូវជាប្អូនជីដូនមួយ បានមកសំងំនៅបន្ទប់ជួលជាមួយនាង បន្ទាប់ពីជននេះបានកាប់ឪពុកបង្កើតឈ្មោះសុខ មន អាយុ៥២ឆ្នាំរស់នៅភូមិព្រែតាធឹក ឃុំគគីរសោម ស្រុកស្វាយទាបខេត្តស្វាយរៀងកាលពីវេលាម៉ោង១៨និង៣០នាទីយប់ ថ្ងៃទី២៥ ខែកក្កដានេះ រួចរត់មកលាក់ខ្លួននៅបន្ទប់ជួលស្ទឹងមានជ័យ២នេះ។
លោកកល្យាណបន្តថា ពេលទទួលបានព័ត៌មាននេះភ្លាម កម្លាំងនគរបាលប៉ុស្តិ៍ស្ទឹងមានជ័យ២ បានទំនាក់ទំនងទៅអធិការដ្ឋានស្រុកស្វាយទាបថា តើមានករណីឃាតកម្មកូនប្រុសសម្លាប់ឪពុកបង្កើតមែនឬអត់។ទើបនគរបាលបាលស្រុកស្វាយទាបឆ្លើយថា មានមែន ទើបនគរបាលប៉ុស្តិ៍ចុះទៅចាប់ខ្លួនយុវជនដែលសម្លាប់ឪពុកបង្កើតយកមកស្នាក់ការប៉ុស្តិ៍ដើម្បីធ្វើការសាកសួរ ទើបជនសង្ស័យសារភាពថា បានសម្លាប់ឪពុកបង្កើតរបស់ខ្លួនមែន។ ជនសង្ស័យជាឃាតករត្រូវបានប្រគល់ទៅឲ្យលោកវរសេនីយ៍ទោ គឹមឡៃ ប្រធានការិយាល័យព្រហ្មទណ្ឌកម្រិតធ្ងន់ខេត្តស្វាយរៀងដើម្បីចាត់ការតាមផ្លូវច្បាប់។ ពិតជាឈាមស្រែកស្បែកហៅមែន ដែលឃាតកជាកូនបង្កើតសម្លាប់ឪពុកបង្កើតនៅខេត្តស្វាយរៀង រួចខំគេចមកភ្នំពេញមិនបានប៉ុន្មានម៉ោងផង ទីបំផុតជាខ្នោះដដែល៕
Source: Kampuchea Thmey Daily
0 Comments