អូស្ត្រាលី​រៀបចំ​សមយុទ្ធ​កងទ័ពអាកាស​ធំ​បំផុត​មួយ​នៅ​តំបន់​អាស៊ី​ប៉ាស៊ីហ្វិក

នៅ​ថ្ងៃ​សៅរ៍ ផ្ទៃមេឃ​នៅលើ​ឆ្នេរសមុទ្រ​ភាគ​ខាងជើង​ប្រទេស​អូស្ត្រាលី​គឺ​ពោរពេញ​ទៅដោយ​អាកាសយានិក​កងទ័ពអាកាស​មកពី​១៦​ប្រទេស​សម្រាប់​សមយុទ្ធ​ហ្វឹកហ្វឺន​កងទ័ពអាកាស​ដ៏​ធំ​បំផុត​មួយ​នៅ​តំបន់​អាស៊ី​ប៉ាស៊ីហ្វិក​។​
​
ទីក្រុង Darwin ភាគ​ខាងជើង​នឹង​ទទួល​បុគ្គលិក​ចំនួន​៤​ពាន់​នាក់​និង​យន្តហោះ​១៤០​គ្រឿងក្នុង​រយៈពេល​បី​សប្តាហ៍​ខាងមុខនេះ​ខណៈដែល​កងកម្លាំង​អាកាស​មកពី​ជុំវិញ​ពិភពលោក​ចូលរួម​ក្នុង​សមយុទ្ធ Pitch Black ។​
​
ការហ្វឹកហ្វឺន​នេះ​រួមមាន​ការហោះហើរ​នៅពេល​យប់​និង​ការចាក់​បំពេញ​ប្រេង​លើ​អាកាស​ហើយ​ជួយ​ឲ្យ​ប្រទេស​នានា​មានឱកាស​រៀនសូត្រ​ពីគ្នា​ទៅវិញទៅមក​និង​លើកកម្ពស់​សមាហរណកម្ម​កងកម្លាំង​របស់​ពួកគេ​ដោយ​ប្រើ​តំបន់​ហ្វឹកហាត់​អាកាស​ធំ​បំផុត​មួយ​នៅក្នុង​ពិភពលោក​។​
​
កងកម្លាំង​អាកាស​អូស្ត្រាលី​បាន​និយាយ​នៅក្នុង​សេចក្តីថ្លែងការណ៍​មួយ​លើ​គេហទំព័រ​របស់ខ្លួន​ថា “​សមយុទ្ធ Pitch Black ពីរ​ឆ្នាំ​ម្តង​បានចាប់ផ្តើម​ក្នុង​ឆ្នាំ​១៩៩០​រវាង​ប្រទេស​អូស្ត្រាលី​និង​សិង្ហ​បុរី​ដោយ​ឆ្លុះបញ្ចាំង​ពី​លក្ខណៈ​ជាការ​គំរាមកំហែង​ជាក់ស្តែង​ដែល​អាច​ត្រូវបាន​រកឃើញ​នៅក្នុង​បរិយាកាស​នៃ​សមរភូមិ​សម័យ​ទំនើប​”​។​
​
កងកម្លាំង​អាកាស​អូស្ត្រាលី​បាន​និយាយថា “​សកម្មភាព​នានា​ដូចជា​សមយុទ្ធ Pitch Black គឺ​បានទទួល​ស្គា​ល់ពី​ទំនាក់ទំនង​ដ៏​រឹងមាំ​របស់​អូស្ត្រាលី​ជាមួយ​បណ្តា​ប្រទេស​ដែល​ចូលរួម​និង​មានតម្លៃ​ខ្ពស់​លើ​បញ្ហា​សន្តិសុខ​ក្នុង​តំបន់​ហើយ​ជាការ​ជំរុញ​ទំនាក់ទំនង​កាន់តែ​ជិតស្និទ្ធ​នៅ​ទូទាំង​តំបន់​អាស៊ី​ប៉ាស៊ីហ្វិក​”​។​
​
កងកម្លាំង​អាកាស​ដែល​ចូលរួម​គឺ​មកពី​សហរដ្ឋអាមេរិក កាណាដា បារាំង អាល្លឺម៉ង់ ឥណ្ឌា ឥណ្ឌូនេស៊ី ជប៉ុន កូរ៉េខាងត្បូង ម៉ាឡេស៊ី ហូ​ឡង់ ហ្វីលីពីន សិង្ហ​បុរី ស៊ុយអែត ថៃ នូ​វែ​ល​ហ្សេ​ឡង់​និង​អូស្ត្រាលី​៕ REUTERS

​

[caption id="attachment_954137" align="alignnone" width="700"]  [/caption]

Source: Kampuchea Thmey Daily