វង្ស ណយ អ្នកប្រដាល់កម្ពុជា នៃក្លិបកុលបុត្រគុនខ្មែរ និង អ៊ូច ធារិទ្ធ អ្នកប្រដាល់ក្លិបអាណាចក្រគុនខ្មែរ ត្រូវគេផ្គូអោយជួបប្រកួតជាមួយអ្នកប្រដាល់ថៃ នៅលើសង្វៀនបាយ័នស្ទឹងមានជ័យ នាយប់ថ្ងៃសុក្រទី២៧កក្កដា២០១៨នេះ ។
សម្រាប់ការផ្គូផ្គងនេះ គូប្រកួតរបស់វង្ស ណយ មិនត្រូវបានគេទម្លាយអោយស្គាល់ឈ្មោះនិងប្រវត្តិនោះឡើយ ដោយគ្រាន់តែដឹងថា វង្សណយ ត្រូវជួបប្រកួតជាមួយថៃក្នុងទម្ងន់៧០គីឡូក្រាម ។បើតាមអ្នកដឹកនាំកីឡាករថៃមកប្រកួតអោយដឹងថា អ្នកប្រដាល់ថៃដែលជាគូរបស់វង្ស ណយនោះ ជាអ្នកប្រដាល់ល្បីឈ្មោះមួយរូបប្រចាំនៅទូរទស្សន៍ក្នុងប្រទេសថៃ ដូច្នេះសូមលាក់ឈ្មោះសិន ហើយនៅពេលដែលថ្លឹងទម្ងន់រួចរាល់ នឹងបានដឹងច្បាស់ពីឈ្មោះអ្នកប្រដាល់ថៃរូបនោះហើយ។
ចំណែក អ៊ូច ធារិទ្ធ អ្នកប្រដាល់ក្លិបអាណាចក្រគុនខ្មែរ ត្រូវគេផ្គូផ្គងអោយជួបប្រកួតជាមួយអ្នកប្រដាល់ថៃឈ្មោះFamai Pisanuracharn ដោយប្រកួតគ្នាក្នុងទម្ងន់៥៧ គ.ក្រ ។ ពីរនាក់នេះ ពុំធ្លាប់ដែលប៉ះគ្នាម្តងណានៅឡើយទេកន្លងមក។
អ៊ូច ធារិទ្ធ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់ ។ គេបានឆ្លងកាត់ការប្រកួតជាមួយអ្នកប្រដាល់ថៃ ៦ លើក និងឡាវ១លើកប៉ុណ្ណោះ ។ ដូច្នេះ លើកនេះជាលើកទី ៧ ដែលគេជួបប្រកួតជាមួយថៃនោះ។ កាលពីជួបប្រកួតជាមួយថៃលើកចុងក្រោយនោះ (២៤មិថុនា២០១៨) គេបានវាយឈ្នះថៃ Khong Far ដោយពិន្ទុ។
ធារិទ្ធ មានប្រវត្តិប្រកួតប្រមាណជា៥០លើក ក្នុងនោះវាយឈ្នះ៣៦លើក ចាញ់១០ លើក និងស្មើ ០៤លើក ។ គេជាអ្នកប្រដាល់ជើងខ្លាំងស្រករក្រោយដោយមានចិត្តធំ កម្លាំងខ្លាំង វាយមិនសំចៃដៃឡើយ ។ ប៉ុន្តែយ៉ាងណាការប្រកួតលើកនេះ មិនដឹងថា ធារិទ្ធអាចយកឈ្នះ Famai បានឬក៏អត់នោះទេ? ។
Famai Pisanuracharn ជាជើងខ្លាំង ដែលមានស្នៀតទាត់ និងកណ្តាប់ដៃល្អ ។ ដូច្នេះ អ៊ូច ធារិទ្ធប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះ មានស្នៀតប្រដាល់ល្អនិងខ្លាំង ។ តែបើអាចឈ្នះបាន គឺមានតែការវាយប្តូរកែងមួយមុខគត់ ដែលប្រថុយដូរជាមួយនឹងជ័យជំនះ ។ អ្នកប្រដាល់ថៃរូបនេះ មានប្រវត្តិប្រកួតចំនួន៦៩លើក ឈ្នះ៥៨លើក ចាញ់១០លើក និង ស្មើ០១លើក ។ ចាំមើល រវាងអ៊ូច ធារិទ្ធ និង Famai តើនរណាជាអ្នកឈ្នះនៅក្នុងការជួបគ្នានេះ ? ។
ដោយឡែក សម្រាប់ការប្រកួតជម្រុះរកអ្នកខ្លាំង ដើម្បីឈានទៅប្រកួតដណ្តើមខ្សែក្រវាត់គូបូតាទម្ងន់៥៤គីឡូក្រាម នៅក្នុងសប្តាហ៍នេះ គឺជាការប្រកួតចុងបញ្ចប់នៃការជ្រើសរើសកីឡាករកម្ពុជាម្នាក់ទៀត សម្រាប់បង្គ្រប់ចំនួន៥នាក់ ដើម្បីឈានទៅធ្វើការប្រកួតដណ្តើមខ្សែក្រវាត់ ជាមួយកីឡាករថៃ៥នាក់ដែរនោះ ។
ក្នុងការប្រកួតជម្រុះវិលជុំសន្សំពិន្ទុក្នុងពូលAនិងពូលB ដែលបានបញ្ចប់កាលពីថ្ងៃទី២០ខែកក្កដាកន្លងមកនេះ បានរកឃើញអ្នកប្រដាល់៤រូប ដែលត្រូវបានឡើងទៅប្រកួតដណ្តើមខ្សែក្រវាត់ជាមួយថៃនោះ គឺពូលA មានចាន់ សាន់ ក្លិបនិរោធមានជ័យ និង ខេម ចាន់ ក្លិបកងពលតូចទ័ពឆ័ត្រយោង៩១១ ដែលជាប់លេខ១លេខ២ក្នុងពូលA ។ ចំណែក អ្នកជាប់លេខ១លេខ២ក្នុងពូលB ដែលត្រូវឡើងទៅប្រកួតជាមួយថៃដែរនោះ គឺប៊ុន សុធា សមាគមកីឡាប្រដាល់ក្រសួងការពារជាតិ និងផាន ផាត់យុទ្ធ ក្លិបសាលវ័ន្តកីឡា ។
ដូច្នេះនៅខ្វះម្នាក់ទៀត ដែលត្រូវបង្គ្រប់ចំនួន៥រូបនោះ គឺតម្រូវឲ្យមានការប្រកួតយកម្នាក់បន្ថែម រវាងអ្នកដែលមានចំណាត់ថ្នាក់លេខ៣ក្នុងពូលនីមួយៗ ហើយអ្នកណាឈ្នះ គឺអ្នកនោះបានឡើងទៅប្រកួតដណ្តើមខ្សែក្រវាត់ជាមួយថៃ ។
សម្រាប់ការប្រកួតយកអ្នកទី៥នេះ គឺ រិទ្ធ អាទិត្យ អ្នកប្រដាល់ក្លិបអាណាចក្រគុនខ្មែរ លេខ៣ពូលA ត្រូវប្រកួតជាមួយលេខ៣ពូលB គឺ សយ សី អ្នកប្រដាល់ក្លិបពន្លឺវិបុលដារិទ្ធពោធិសែនជ័យ។
រវាងរិទ្ធ អាទិត្យ និង សយ សីនេះ ពួកគេទាំងពីរមិនធ្លាប់ជួបគ្នាទេកន្លងមក ។ការប្រកួតជម្រុះសន្សំពិន្ទុក្នុងពូលចំនួន៣ប្រកួតម្នាក់នោះ ពួកគេទាំងពីរបាន៥ពិន្ទុដូចគ្នា ក្នុងចំណោម៣ប្រកួត គឺឈ្នះ១ប្រកួតនិងចាញ់២ប្រកួតដូចគ្នា ។ ចាំមើល តើរិទ្ធ អាទិត្យ ឬ សយ សី ដែលជាអ្នកទី៥ បានឡើងទៅជួបជាមួយអ្នកប្រដាល់ថៃ ប្រកួតដណ្តើមខ្សែក្រវាត់គូបូតារដូវកាលថ្មីទម្ងន់៥៤គីឡូក្រាមនោះ?៕
Source: Kampuchea Thmey Daily
0 Comments