រដ្ឋបាលរាជធានីភ្នំពេញដាក់ឱ្យដំណើរការអង្គភាពច្រកចេញ ចូលតែមួយ ដើម្បីបម្រើសេវាសាធារណៈជូនប្រជាពលរដ្ឋ ឲ្យបានលឿន មានប្រសិទ្ធភាព និងប្រសិទ្ធផល

ភ្នំពេញ ៖ ដើម្បីបង្កភាពងាយស្រួលជូនប្រជាពលរដ្ឋទូទៅ រដ្ឋបាលរាជធានីភ្នំពេញបានប្រកាសបើកដំណើរ អង្គភាពច្រកចេញ ចូលតែមួយ នៅថ្នាក់រាជធានី ក្នុងគោលបំណង ជំរុញឲ្យការអនុវត្តលើការងារ ផ្តល់សេវានេះ បានកាន់តែល្អប្រសើរឡើង មានប្រសិទ្ធភាព និងប្រសិទ្ធផល។

នេះជាការបញ្ជាក់ពីលោក ឃួង ស្រេង អភិបាលរាជធានីភ្នំពេញកាលពីរសៀលថ្ងៃទី២៤ ខែកក្កដា ឆ្នាំ២០១៨ ក្នុងឱកាសចុះពិនិត្យ បញ្ជរ និងកន្លែងធ្វើការរបស់ អង្គភាពច្រកចេញ ចូលតែមួយពោលគឺ ក្រោយបញ្ចប់កិច្ចជុំជាមួយមន្ត្រីច្រកពាក់ព័ន្ធនឹងការងារ ផ្តល់សេវាប្រជាពលរដ្ឋ ក្នុងការពង្រឹងការអនុវត្ត ការងារ មួយចំនួន ដែលក្រសួងមហាផ្ទៃបានដាក់ជូន។

លោកអភិបាលរាជធានីបានបញ្ជាក់ថា ការបើកឲ្យដំណើរការ អង្គភាពច្រកចេញ ចូលតែមួយនៅថ្នាក់រាជធានី ដើម្បីបម្រើជូននូវសេវាសាធារណៈផ្សេងៗជូនប្រជាពលរដ្ឋឲ្យបានល្អប្រសើរ មានប្រសិទ្ធភាព ចំណេញពេលវេលា ខណៈដែលការិយាល័យច្រកចេញ ចូលតែមួយនៅតាមបណ្តាលខណ្ឌទាំង១២ នូវមានភាពចន្លោះប្រហោង ក្នុងការបម្រើសេវាសាធារណជូនប្រជាពលរដ្ឋ មិនទាន់បានល្អប្រសើរនៅឡើយ។

លោកបានបន្ដថា ការបើកដាក់ឲ្យដំណើរការ សេវាច្រកចេញចូលតែមួយ នៅរដ្ឋបាលរាជធានីភ្នំពេញនេះ ដើម្បីលុបបំបាត់ចោលនូវការលើកឡើងពីមជ្ឈដ្ឋានខាងក្រៅ និង ប្រជាពលរដ្ឋដែលតែងតែមាន ការរិះគន់ មកលើមន្ត្រីរដ្ឋបាលរបស់យើងក្នុងពេលដែលពួកគាត់ ទៅរកសេវាកម្មម្តងៗ។ កាលពីមុនប្រជាពលរដ្ឋចង់ស្នើសុំសេវាកម្មអ្វីមួយ គឺមានភាពសាំញ៉ាំ មានការពាក់ព័ន្ធច្រើនកន្លែង ឥឡូវពួកគាត់លែងពិបាកហើយ ប៉ុន្តែតម្រូវឲ្យប្រជាពលរដ្ឋ មករកសេវាតម្រូវការដែលខ្លួនចង់បានដោយខ្លួនឯងផ្ទល់ ដើម្បីជៀសវាងការចំណាយប្រាក់កាសលើសេវារត់ការ តាមរយៈអ្នកដទៃ យើងដឹងហើយថា ប្រសិនបើយើងពឹងគេ គេនឹងយកសេវាជើងសាពីបងប្អូនក្នុងតម្លៃណាដែលព្រមព្រៀងគ្នាតាមការស្ម័គ្រចិត្ត ប៉ុន្តែបើបងប្អូនចំណាយពេលតែបន្តិច ហើយមកស្វែងរកសេវាកម្មដោយខ្លួនឯងគឺ លឿនអស់លុយតិច ព្រោះការិយាល័យច្រកចេញចូលតែមួយមានគ្រប់សេវាតាមប្រកាសក្រសួងមហាផ្ទៃ ។ រាល់ទម្រង់បែបបទ និងលិខិតផ្សេងៗសម្រាប់ផ្តល់ជូនប្រជាពលរដ្ឋដើម្បីបំពេញ ត្រូវបានរៀបចំឲ្យមានលក្ខណៈសាមញ្ញ ខ្លី ច្បាស់លាស់ និងងាយយល់។

គួររំលឹកថា រាជរដ្ឋាភិបាលកម្ពុជា តាមរយៈក្រសួងមហាផ្ទៃបានបង្កើត និងដាក់ឲ្យដំណើរការជាផ្លូវកានូវការិយាល័យច្រកចេញចូលតែមួយ និងការិយាល័យប្រជាពលរដ្ឋនៅក្នុងស្រុក/ខណ្ឌ ក្រុង, គោលដៅចំនួន៤០រួចហើយ ការិយាល័យនេះ នឹងត្រូវពង្រីកនៅតាមខណ្ឌ និងស្រុកគោលដៅផ្សេងៗទៀត ដើម្បីផ្តល់សេវា ដែលជាតម្រូវការចាំបាច់របស់ប្រជាពលរដ្ឋ។

សូមជម្រាបផងដែរ ការិយាល័យច្រកចេញចូលតែមួយ រាជធានីភ្នំពេញ នឹងដាក់ឲ្យដំណើរការជាផ្លូវ ចាប់ពីថ្ងៃព្រហស្បតិ៍ទី២៦ ខែកក្កដា ឆ្នាំ២០១៨ខាងមុខនេះតទៅ៕