ពិភពលោក​មើល “​ព្រះចន្ទ្រ​​ឈាម​” ដែលជា​ចន្ទ្រគ្រាស​យូរ​បំផុត​ប្រចាំ​សតវត្ស​ទី​២១

ព្រះចន្ទ្រ​ពណ៌​ក្រហម​បាន​បង្ក​ភាព​ទាក់ទាញ​នៅ​ទូទាំង​ភាគច្រើន​នៃ​ពិភពលោក​កាលពី​ថ្ងៃ​សុក្រ​នៅ​ពេលដែល​វា​ធ្វើដំណើរ​ចូលក្នុង​ស្រមោល​ផែនដី​ក្នុងនាម​ជា “​បាតុភូត​ចន្ទ្រគ្រាស​” យូរ​បំផុត​ប្រចាំ​សតវត្សរ៍​ទី​២១​នេះ​។​
​
ចាប់ពី​តំបន់​អាហ្វ្រិក​ខាងត្បូង​ទៅដល់​មជ្ឈិមបូព៌ា​និង​ចាប់ពី​វិមាន​ក្រឹម​ឡាំង​ទៅដល់​កំពង់ផែ​ក្រុង​ស៊ីដនី​, មនុស្ស​រាប់​ម៉ឺន​នាក់​បាន​សម្លឹង​ទៅលើ​មេឃ​ដើម្បី​មើល​ព្រះ​ចន្ទ្រ​ដែល​ងងឹត​មុន​ពេល​បញ្ចេញ​ស្រមោល​ពណ៌​ទឹកក្រូច ពណ៌​ត្នោត​និង​ពណ៌​ក្រហម​។​
​
ចន្ទ្រ​គ្រាស​ទាំងស្រុង​នេះ​មាន​រយៈពេល​១​ម៉ោង​៤២​នាទី​និង​៥៧​វិនាទី​។ ប៉ុន្តែ​បើ​គិត​ទាំងពី​ពេល​ចាប់ផ្តើម​ដំបូង​រហូតដល់​ទៅ​ពេល​បញ្ចប់​ទាំងស្រុង​គឺ​ព្រះ​ចន្ទ្រ​នេះ​នឹង​ចំណាយពេល​សរុប​ជិត​៤​ម៉ោង​នៅក្នុង​ស្រមោល​របស់​ផែនដី​។ នេះ​បើ​យោងតាម​ការ​ឲ្យ​ដឹង​ពី​អង្គការ​ណា​សា​។​
​
ចន្ទ្រ​គ្រាស​ពេញ​បំផុត​នេះ​អាច​ត្រូវបាន​មើលឃើញ​ពី​អឺរ៉ុប រុស្ស៊ី អាហ្វ្រិក មជ្ឈិមបូព៌ា​និង​ភាគច្រើន​នៃ​ទ្វីបអាស៊ី​និង​ប្រទេស​អូស្ត្រាលី​ថ្វីបើ​ពពក​បាន​បិទ​ព្រះ​ចន្ទ្រ​នៅ​កន្លែង​ខ្លះ​ក៏ដោយ​។​
​
ចន្ទ្រ​គ្រាស​នេះ​មិនអាច​មើលឃើញ​ពី​អាមេរិក​ខាងជើង​ឬ​ភាគច្រើន​នៃ​តំបន់​ប៉ាស៊ីហ្វិក​នោះទេ​។​
Reuters បានកត់សម្គាល់​អំពី​ចន្ទ្រ​គ្រាស​នេះ​នៅ​ទូទាំង​ពិភពលោក​ដោយ​ចាប់យក​រូបភាព​ពន្លឺ​ពណ៌​ទឹកក្រូច​និង​ក្រហម​នៅលើ​ទីក្រុង​គែរ​, ប្រាសាទ Poseidon នៅ​តំបន់ Cape Sounion, នៅ​ជិត​ទីក្រុង​អា​តែ​ន​, ភូមិ Raisting របស់​តំបន់​បា​វ៉ា​រៀ​នៅ​ប្រទេស​អាឡឺម៉ង់​, ឆ្នេរសមុទ្រ Rio នៅ​ប្រេ​ស៊ី​ល​និង​ទីក្រុង Johannesburg​។
​
នៅ​ទីក្រុង Nairobi, ប្រជាជន​កេ​ន​យ៉ា​បាន​មើល​នៅពេល​ព្រះ​ចន្ទ្រ​នេះ​ទាំង​ងងឹត​។​
​នៅលើ​ច្រាំងទន្លេ Ganges របស់​ប្រទេស​ឥណ្ឌា​, ប្រាសាទ​នានា​ត្រូវបាន​បិទ​មុនពេល​ចន្ទ្រ​គ្រាស​កើតឡើង​។ អ្នកទស្សនា​បាន​មើល​តាម​កែវយឹត​នៅ​ផែ Marina South ក្នុងប្រទេស​សិង្ហ​បុរី​និង​នៅ​មន្ទីរ Al Sadeem ក្នុង​អគារ Al Wathba ជិត​ទីក្រុង Abu Dhabi ។​
​
មនុស្ស​រាប់រយ​នាក់​នៅ​ប្រទេស​អូស្ត្រាលី​បាន​បង់ប្រាក់​ដើម្បី​មើល​ចន្ទ្រ​គ្រាស​ពី​មជ្ឈមណ្ឌល​សង្កេត​ក្រុង​ស៊ីដនី​មុនពេល​ថ្ងៃ​រះ​។​
​
លោក Andrew Fabian សាស្ត្រាចារ្យ​ផ្នែក​តារាសាស្ត្រ​នៅ​សាកលវិទ្យាល័យ Cambridge បាន​ប្រាប់​រ៉​យ​ទ័​រថា “​វា​ត្រូវបាន​គេ​ហៅថា​ជា​ព្រះ​ចន្ទ្រ​ឈាម​ព្រោះ​ពន្លឺ​ពី​ព្រះអាទិត្យ​បាន​ឆ្លងកាត់​បរិយាកាស​ផែនដី​នៅលើ​ផ្លូវ​ទៅ​ឋាន​ព្រះ​ចន្ទ្រ​ហើយ​បរិយាកាស​ផែនដី​ប្រែ​ទៅជា​ពណ៌​ក្រហម​”​។​
​
គួរ​បញ្ជាក់ថា ចន្ទ្រ​គ្រាស​នាពេល​ក្រោយ​ដែលមាន​រយៈពេល​ដូចគ្នានេះ​នឹង​កើតឡើង​នៅក្នុង​ឆ្នាំ​២១២៣៕ REUTERS



Source: Kampuchea Thmey Daily