នៅថ្ងៃព្រហស្បតិ៍ ទី២៦ខែកក្កដា សប្ដាហ៍នេះ គណៈកម្មការវិន័យរបស់សហព័ន្ធកីឡាបាល់ទាត់កម្ពុជា បានចេញសេចក្ដីសម្រេចចុះហត្ថលេខាពិន័យលោក ហៅ សុជាតិ គ្រូបង្វឹករបស់ក្រុមបឹងកេត មិនឱ្យចូលរួមដឹកនាំការប្រកួតក្នុងព្រឹត្តិការណ៍បាល់ទាត់នានាដែលរៀបចំដោយសហព័ន្ធកីឡាបាល់ទាត់កម្ពុជារយៈពេលមួយខែ និងពិន័យជាប្រាក់៥សែនរៀល ពីបទប្រើឥរិយាបថមិនសមរម្យដាក់មន្ត្រីការប្រកួត ដោយរុញព្រមទាំងប្រើសម្ដីមិនសមរម្យ។
ក្រោយទទួលបានលិខិតពិន័យលោក ហៅ សុជាតិ បានលើកឡើងថា លោកទទួលស្គាល់ខ្លួនពិតជាខុសមែនដែលរុញមន្ត្រីទី៤។ លោកបន្តថា ៖ «ពេលនោះខ្ញុំបានឃើញមន្ត្រីទី៤ដើរមកសម្របសម្រួលខាងខ្ញុំ បន្ទាប់ពីកីឡាករលេខ៣របស់សូលទីឡូ ទាត់ សាត រ៉ូហ្ស៊ីប ពីក្រោយ ហើយកីឡាករលេខ៣នោះកាលពីជើងទី១ក៏បានទាត់ពីក្រោយឱ្យ Paul Omogba របួសដែរ។ ពេលមន្ត្រីទី៤ដើរចូលមកក្បែរកន្លែងខាងក្រុមបឹងកេតអង្គុយ ខ្ញុំបានយកដៃរុញគាត់ហើយនិយាយថា ជួយមើលផង រួចមន្ត្រីទី៤បានប្រាប់ទៅអាជ្ញាកណ្ដាល ហើយអាជ្ញាកណ្ដាលមកបណ្ដេញខ្ញុំទៅខាងលើ។ ខ្ញុំមិនបានប្រតិកម្មអ្វីបន្ថែមទេ ខ្ញុំនៅស្ងៀមនិងដើរចេញតាមការបញ្ជាហើយក៏មិននិយាយអ្វីដែរ។ ខ្ញុំមិនមែនចង់គេចពីកំហុសទេ តែការពិន័យហាក់ធ្ងន់លើសពីកំហុសរបស់ខ្ញុំ»។
ចំណែកលោក បែ មករា អ្នកចាត់ការបឹងកេត វិញបានបង្ហាញពីមូលហេតុដែរក្លិបសម្រេចប្តឹងបន្តនោះគឺដោយសារថា ៖ «ម្យ៉ាងទៀត ការពិន័យរបស់សហព័ន្ធលើគាត់គឺពិន័យទាំងពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន គឺខុសពីករណីហិង្សានៅស្វាយរៀងថ្មីៗនេះ ដែលកើតឡើងក្នុងការប្រកួតលីគដូចគ្នា ប៉ុន្តែគណៈកម្មការវិន័យ ពិន័យពួកគេតែការប្រកួតលីគ ចំណែកបឹងកេតវិញត្រូវពិន័យគ្រប់ព្រឹត្តិការណ៍ដែលស.ប.ករៀបចំ មានន័យថាទាំងលីគកំពូលកម្ពុជានិងពានសម្ដេចហ៊ុនសែន។ យើងដាក់ពាក្យប្ដឹងនេះដើម្បីឱ្យគណៈកម្មការវិន័យពិនិត្យមើលឡើងវិញ»។
លោកបន្តថា ៖ «ពួកយើងទទួលស្គាល់ថា គ្រូរបស់យើងបានរុញមន្ត្រីទី៤មែន ក្រោយកីឡាករសូលទីឡូអង្គរទាត់ជើង សាត រ៉ូហ្ស៊ីប ពីក្រោយ ដោយសារតែគាត់ទ្រាំមិនបានចំពោះការសម្រេចចិត្តរបស់អាជ្ញាកណ្ដាលលើទីលានជាច្រើនលើក ប៉ុន្តែគាត់មិនបានជេរប្រមាថទេ។ គាត់គ្រាន់តែប្រាប់ឱ្យមន្ត្រីទី៤មើលហើយជួយប្រាប់អាជ្ញាកណ្ដាលផង»។
សូមបញ្ជាក់ថា ក្នុងប្រកួតបរាជ័យលើកដំបូងរបស់បឹងកេត ពេលចាញ់ក្រសួងការពារជាតិ ២ទល់០ នៅថ្ងៃសុក្រសប្ដាហ៍នេះក្នុងពានរង្វាន់លីគកំពូលកម្ពុជា គឺមិនមានវត្តមានរបស់លោក ហៅ សុជាតិ នៅលើទីលាននោះទេ ដោយលោក លី វ៉ាវី ដែលជាគ្រូជំនួយដើរតួធ្វើជាគ្រូបង្វឹកជំនួសវិញ៕
Source: Kampuchea Thmey Daily
0 Comments