ភ្នំពេញ ៖ មានភាពភ្ញាក់ផ្អើលមួយបានកើតឡើងបន្ទាប់គេប្រទះឃើញស្ត្រីម្នាក់ដេកស្លាប់នៅក្នុងបន្ទប់ទឹកផ្ទះជួលមួយកន្លែងកាលពីវេលាម៉ោង ១និង២០នាទីតសៀល ថ្ងៃទី២៤ ខែកក្កដា ឆ្នាំ២០១៨ ស្ថិតនៅក្នុងចំណុចផ្ទះជួល ផ្លូវលំ ក្រុម១៥៦ ភូមិ១២ សង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា សពស្ត្រីរងគ្រោះឈ្មោះ មាស ស្រីលាន អាយុ ៤៥ឆ្នាំ មុខរបរ នៅផ្ទះ ស្នាក់នៅផ្ទះកើតហេតុខាងលើ និងមានស្រុកកំណើតនៅខេត្តកំពង់ចាម។
ប្រភពព័ត៌មានពីបងប្អូនប្រជាពលរដ្ឋរស់នៅជិតខាងបានប្រាប់ឲ្យដឹងថា មុនកើតហេតុនៅព្រឹកថ្ងៃទី២៤ ខែកក្កដា ឆ្នាំ២០១៨នេះបងប្អូនប្រជាពលរដ្ឋបានធ្វើការហៅស្ត្រីខាងលើ ព្រោះរាល់ដងព្រឹកឡើង ឃើញស្ត្រីរូបនេះបានបើកទ្វារពីប្រលឹម រួចចេញមកក្រៅ ដើម្បីទិញស្រាផឹកជារៀងរាល់ថ្ងៃ ស្រាប់តែព្រឹកនេះ មិនឃើញរូបគាត់ចេញមកខាងក្រៅនោះទេ។ ដោយមានការសង្ស័យបងប្អូនប្រជាពលរដ្ឋដែលរស់នៅជិតនោះ ក៏នាំគ្នាស្រែកហៅស្ត្រីរូបនោះ តែមិនមានការឆ្លើយតបរួចក៏នាំគ្នាតេទៅម្ចាស់ផ្ទះខាងលើឲ្យចុះមកកន្លែងកើតហេតុ ព្រោះថាទ្វារផ្ទះបានជាប់សោរទ្វារមិនអាចបើកបាននោះ។
ប្រភពព័ត៌មានបានបន្តទៀតថា ក្រោយមកម្ចាស់ផ្ទះបានមកដល់កន្លែងកើតហេតុបាននាំគ្នាស្រែកហៅស្ត្រីរូបនេះម្តងទៀត តែមិនមានការឆ្លើយតប ហើយម្ចាស់ផ្ទះក៏បានសម្រេចចិត្តដោយវាយបំបែកកញ្ជក់ទ្វារ រួចយកសោមកចាក់បើកទ្វារមើលក៏ស្រាប់តែបើកទ្វារផ្ទះឃើញស្ត្រីនោះបានដេកស្លាប់នៅក្នុងបន្ទប់ទឹកបាត់ទៅហើយ។
បន្ទាប់មកសមត្ថកិច្ចមូលដ្ឋានបានចុះមកដល់កន្លែងកើតហេតុនិងធ្វើការទំនាក់ទំនងទៅសមត្ថកិច្ចជំនាញផ្នែកកោសល្យវិច័យ ដើម្បីចុះមកពិនិត្យបញ្ជាក់ថា ស្ត្រីរងគ្រោះខាងលើ ពិតជាស្លាប់ដោយសារតែការខ្យល់គ។ បច្ចុប្បន្នសពជនរងគ្រោះត្រូវបានក្រុមគ្រួសារមកទទួលទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments