ព្រះសីហនុ ៖ រថយន្តស្តារ៉ិច មួយគ្រឿងសង្ស័យអ្នកបើកបរ បើកក្នុងល្បឿនលឿនលើផ្លូវកោង និងសើមផង ក៏បានរេចង្កូតធ្លាក់ចិញ្ចើម ហើយទៅបុកបង្គោលចំណាំងផ្លាតបាក់អស់៣ដើម ក្រឡាប់ជាច្រើនត្រឡប់ធ្លាក់ចូលក្នុងព្រៃដេកបះជើងទៅមុខលែងរួច។
ក្រោយកើតហេតុគេបានឃើញអ្នកបើកបរលូនចេញតាមបង្អួចរថយន្ត ដែលបែកកញ្ចក់ ទាំងមានស្នាមឈាមហូរប្រឡាក់អាវ។
ករណីបង្កគ្រោះថ្នាក់ដោយខ្លួនឯងនេះ បានកើតមានឡើងនៅម៉ោងជិត១រសៀលថ្ងៃទី២០ ខែកក្កដា ឆ្នាំ២០១៨ នៅលើផ្លូវជាតិលេខ៤ចន្លោះ គីឡូម៉ែត្រលេខ១៦៥-១៦៦ ទិសដៅពីភ្នំពេញទៅខេត្តព្រះសីហនុ ស្ថិតក្នុងភូមិសាស្ត្រ តានៃ ឃុំតានៃ ស្រុកព្រៃនប់ ខេត្តព្រះសីហនុ។
សមត្ថកិច្ចបានប្រាប់ថា រថយន្តនេះម៉ាក ស្តារ៉ិច ពណ៌ស ពាក់ស្លាកលេខ 2AQ 2641 បើកបរដោយឈ្មោះ ចិន ធៀនហ្វា ភេទប្រុស អាយុ៤៩ឆ្នាំ ស្នាក់នៅភ្នំពេញ (របួសស្រាល)។ ក្រោយពេលកើតហេតុ អ្នករងរបួស សមត្ថកិច្ចបានបញ្ជូនទៅមន្ទីរពេទ្យ ដោយឡែករថយន្ត បានស្ទូចយកទៅរក្សាទុកនៅអធិការដ្ឋាននគរបាលស្រុកព្រៃនប់ជាបណ្ដោះអាសន្ន៕
Source: Kampuchea Thmey Daily
0 Comments