នី សុភី អ្នកប្រដាល់ក្លិបសាលវ័ន្តកីឡា បានសងសឹកអ្នកប្រដាល់ថៃ Jai Su បានសម្រេច ក្នុងការជួបប្រកួតសងសឹក កាលពីយប់ថ្ងៃទី២០ ខែកក្កដា ឆ្នាំ២០១៨ នៅលើសង្វៀនបាយ័នស្ទឹងមានជ័យ។
Jai Su ដែលមានកម្ពស់១,៨០ម៉ែត្រនោះ ជួបជាមួយនី សុភី លើកនេះ គេវាយហាក់ដូចជាអត់ចេញនិងអត់ចំគោលដៅល្អដូចជាការជួបប្រកួតគ្នាលើកមុនដែលវាយឈ្នះសុភីដោយពិន្ទុនោះទេ ។ Chai Suoនេះ ធ្លាប់មកប្រកួតនៅភ្នំពេញ២-៣លើកហើយកន្លងមក ដែលក្នុងនោះ២លើក ជួបប្រកួតជាមួយនី សុភីនេះឯង ហើយក្នុងការជួប២ដងនេះ នី សុភី បានត្រឹមស្មើ១លើកនិងចាញ់ពិន្ទុ១លើក និង១លើកចុងក្រោយ Jai Su វាយចាញ់ធឿន ធារ៉ា ក្លិបខេត្តកោះកុងដោយពិន្ទុ។
នី សុភី បានប្រើកណ្តាប់បានល្អ ដោយបានដាល់ត្រូវមុខ Jai Su ជាច្រើនដៃ ដែលធ្វើអោយ Jai Su ចាញ់ពិន្ទុសុភីសឹងតែគ្រប់ទឹក ។ ហេតុនេះហើយ ទើបចប់ការប្រកួត៥ទឹកនោះ Jai Su ចាញ់នី សុភី ដោយពិន្ទុ។
ចំពោះ អ្នកប្រដាល់ជើងចាស់ ចាន់ ប៊ុនលាភ ក្លិបនិរោធមានជ័យ បានវាយចាញ់ អ្នកប្រដាល់ថៃ Chak Phetch ដោយពិន្ទុ បន្ទាប់ពីប្រកួតគ្នា៥ទឹកពេញនោះ ។ ពីរនាក់នេះ ប្រកួតគ្នាក្នុងទម្ងន់ ៦៥ គីឡូក្រាម។
Chak Phetch នេះ កាលពីមកលើកមុន គេក៏វាយចាញ់ចាន់ ប៊ុនហឿន អ្នកប្រដាល់ក្លិបនិរោធមានជ័យ ដែលជាសិស្សប្អូនរបស់ចាន់ ប៊ុនលាភ ដោយពិន្ទុ ។
ចាន់ ប៊ុនលាភ ចាញ់ Chak Phetch នេះ ពុំមែនចាញ់ដោយសារបច្ចេកទេសទេ គឺចាញ់នឹងការអស់កម្លាំងកាយសម្បទាតែប៉ុណ្ណោះ ។ ប៊ុនលាភ បានអស់ស៊ុហ្វ ចាប់តាំងពីក្នុងចុងទឹកទី៣មកម្ល៉េះ ដែលនាំអោយការប្រើកណ្តាប់ដៃ ជើង ជង្គង់ និងកែងរបស់គេ រាងទន់ខ្សោយប៉ក់ល្វើយ ។ ទោះជាយ៉ាងណា ចាន់ ប៊ុនលាភ បានខិតខំប្រឹងតស៊ូជាមួយ Chak Phetch រហូតដល់ចប់ទឹក៥ដែរ និងចាញ់ត្រឹមពិន្ទុប៉ុណ្ណោះ ។
ចំពោះការប្រកួតក្នុងព្រឹត្តិការណ៍ជម្រុះរកអ្នកខ្លាំង ដើម្បីឈានទៅចូលរួមប្រកួតដណ្តើមខ្សែក្រវាត់គូបូតារដូវកាលថ្មីទម្ងន់៥៤គ.ក្រជាមួយអ្នកប្រដាល់ថៃវិញនោះ បឺត សង្ឃឹម អ្នកប្រដាល់ក្លិបរ៉ាហាប់ស្វាយប៉ាកថិតក្នុងពូលA បានវាយចាញ់ ខេម ចាន់ អ្នកប្រដាល់ក្លិបកងពលតូចទ័ពឆ័ត្រយោង៩១១ពូលB ក្នុងទឹកទី៣ បន្ទាប់ពីត្រូវខេម ចាន់ វាយអោយអាជ្ញាកណ្តាលរាប់៨ពីរលើក និងដួលមួយលើកទៀត ក៏ត្រូវអាជ្ញាកណ្តាលបញ្ឈប់លែងឲ្យបន្តការប្រកួតទៀត។
ហើយមួយគូទៀត សយ សី អ្នកប្រដាល់ក្លិបវិបុលដារិទ្ធពោធិសែនជ័យថិតក្នុងពូលB ត្រូវប៊ុន សុធា សមាគមកីឡាប្រដាល់ក្រសួងការពារជាតិពូលB វាយអោយបោះបង់ចោលការប្រកួតក្នុងទឹ្ទី២ ដោយសារតែត្រូវសុធា ទាត់អោយខូចជើងនោះ។
ជាមួយលទ្ធផលការប្រកួតជុំចុងក្រោយនេះ ខេម ចាន់ដែលថិតក្នុងពូលA បានកក់កៅអីបាន១កន្លែងហើយ សម្រាប់ឡើងទៅប្រកួតដណ្តើមខ្សែក្រវាត់ហើយជាមួយថៃ ខណះដែលក្នុងពូលAនេះ ចាន់ សាន់ គេកក់កៅអីបាន១កន្លែងមុននោះ។
ចំពោះពូលវិញ ប៊ុនសុធា គេបានឡើងទៅប្រកួតដណ្តើមខ្សែក្រវាត់ដែរ ក្នុងនាមជាប់លេខ១ក្នុងពូលBនេះ ខណះដែល ផាន ផាត់យុទ្ធ ក្លិបសាលវ័ន្តកីឡា ជាប់លេខ២ក្នុងពូល ។
បឺត សង្ឃឹម និង សយ សី ពួកគេទាំងពីរនឹងជួបប្រកួតគ្នា ដើម្បីប្រជែងឡើងទៅប្រកួតជាមួយថៃដណ្តើមខ្សែក្រវាត់ដែរ ក្នុងនាមលេខ៣ពូលAជួបលេខ៣ពូលB ដើម្បីយកម្នាក់បង្គ្រប់៥នាក់ទៅ ជួបជាមួយថៃ៥នាក់នោះ៕
Source: Kampuchea Thmey Daily
0 Comments