ភ្នំពេញ ៖ ប្រមុខគណបក្សប្រជាជនកម្ពុជាសម្តេចអគ្គមហាសេនាបតីតេជោ ហ៊ុន សែន បានចេញដឹកនាំក្បួនឃោសនារបស់គណបក្សប្រជាជនកម្ពុជានៅរាជធានីភ្នំពេញ ដែលមានសមាជិក សមាជិកាប្រមាណ ២៥ម៉ឺននាក់ ដើម្បីបិទយុទ្ធនាការឃោសនារកសំឡេងឆ្នោតនាថ្ងៃទី ២៧ ខែកក្កដា ឆ្នាំ២០១៨។
យោងតាមលិខិតសម្តេចវិបុលសេនាភក្តី សាយ ឈុំ អនុប្រធានគណបក្សប្រជាជនកម្ពុជាផ្ញើទៅកាន់ប្រធានគណៈកម្មាធិការគណបក្សប្រជាជនកម្ពុជាតាមរាជធានី-ខេត្តនាពេលកន្លងទៅបានឲ្យដឹងថា ការដឹកនាំក្បួនបិទយុទ្ធនាការឃោសនារកសំឡេងឆ្នោតនេះ បានធ្វើការជួបជុំព្រមទាំងដង្ហែក្បួនចេញពីមជ្ឈមណ្ឌលសន្និបាតនិងពិព័រណ៍កោះពេជ្រ។
លិខិតដដែលនេះបានគូសបញ្ជាក់ថា មុននឹងចេញដង្ហែក្បួន សម្តេចប្រមុខបក្សកាន់អំណាច បានថ្លែងសារនយោបាយជូនមហាជន ហើយការថ្លែងសារនេះ បានផ្សាយផ្ទាល់តាមទូរទស្សន៍ វិទ្យុ និងប្រព័ន្ធផ្សព្វផ្សាយដទៃទៀត ដែលបក្សបានជួលរួចរាល់ហើយនោះ។
ការចេញដឹកនាំក្បួនបិទយុទ្ធនាការឃោសនារកសំឡេងឆ្នោតនៅថ្ងៃទី២៧ ខែកក្កដា ឆ្នាំ២០១៨ របស់ប្រមុខគណបក្សប្រជាជនកម្ពុជា គឺជាការដឹកនាំក្បួនឃោសនារកសំឡេងឆ្នោតជាលើកទីពីរ។ កាលពីក្នុងយុទ្ធនាការឃោសនារកសំឡេងឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ នា ខែមិថុនា ឆ្នាំ២០១៧ សម្តេចតេជោ ហ៊ុន សែន ក៏បានចេញដឹកនាំបិទយុទ្ធនាការឃោសនារកសំឡេងឆ្នោតផងដែរ។
បើយោងតាមការជូនដំណឹងរបស់សាលារាជធានីភ្នំពេញនៅថ្ងៃទី២៧ ខែកក្កដា ឆ្នាំ២០១៨ គណបក្សប្រជាជនកម្ពុជានឹងធ្វើការជួបជុំ និង ដង្ហែក្បួនបិទយុទ្ធនាការឃោសនាបោះឆ្នោតជ្រើសតាំងតំណាងរាស្ដ្រនីតិកាលទី៦នៅមជ្ឈមណ្ឌលសន្និបាតនិងពិព័រណ៍កោះពេជ្រ ដោយមានការជួបជុំសមាជិករហូតដល់ប្រមាណ ២៥០ ០០០នាក់ ។
ក្នុងសេចក្តីប្រកាសព័ត៌មានរបស់សាលារាជធានីភ្នំពេញបានឲ្យដឹងថា ៖ បន្ទាប់ពីការជួបជុំសមាជិករួចគណបក្សប្រជាជន នឹងដង្ហែទៅតាមមហាវិថីកម្ពុជាក្រោម ,មហាវិថីសម្ដេចមុនីរ៉េត ,កំណាត់វិថីសម្ដេចសុធារស ,កំណាត់មហាវិថីម៉ៅសេទុង, កំណាត់មហាវិថីព្រះមុនីវង្ស, កំណាត់មហាវិថីព្រះសីហនុ, វិថីព្រះស៊ីសុវត្ថិ និង ផ្លូវសំខាន់ៗមួយចំនួនទៀតក្នុងរាជធានីភ្នំពេញ។
រដ្ឋបាលរាជធានីភ្នំពេញស្នើប្រជាពលរដ្ឋដែលគ្រោងធ្វើដំណើរទៅកន្លែងជួបជុំ និងតាមមហាវិថី តិរិវិថី និងផ្លូវសំខាន់ៗមួយចំនួនខាងលើមេត្តាបញ្ចៀសចរាចរជាបណ្ដោះអាសន្ន បើសិនមិនចាំបាច់ពុំគួរធ្វើដំណើរឆ្លងកាត់កន្លែងជួបជុំនិងផ្លូវដង្ហែរបស់គណបក្សទាំងនេះ។
ក្រៅពីគណបក្សប្រជាជនកម្ពុជាក៏មានគណបក្សនយោបាយ៥ផ្សេងទៀតបានចេញដង្ហែបិទយុទ្ធនាការឃោសនារកសំឡេងឆ្នោតផងដែរ។ នេះបើតាមរបាយការណ៍គណៈកម្មាធិការជាតិរៀបចំការបោះឆ្នោត។
របាយការណ៍បានឲ្យដឹងថាគណបក្សនយោបាយទាំង៥នោះរួមមានគណបក្សសម្ព័ន្ធដើម្បីប្រជាធិបតេយ្យ, គណបក្សសញ្ជាតិកម្ពុជា, គណបក្សខ្មែរក្រោក, គណបក្សខ្មែរអភិវឌ្ឍន៍សេដ្ឋកិច្ច និង គណបក្សហ្វ៊ុនស៊ិនប៉ិច។ បើតាមរបាយការណ៍ដដែលនេះបានឲ្យដឹងថា ការដង្ហែក្បួនបិទបញ្ចប់យុទ្ធនាការឃោសនារកសំឡេងឆ្នោតនៅក្នុងរាជធានីភ្នំពេញមានអ្នកចូលរួមសរុបទាំងអស់ជាង ៣២ម៉ឺននាក់ និងមានរថយន្តចំនួន ៣.៦៧០គ្រឿង ម៉ូតូកង់បីជិត ១ពាន់គ្រឿង និងម៉ូតូជាង ៨ពាន់គ្រឿង៕
Source: Kampuchea Thmey Daily
0 Comments