លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានអះអាងថា សហព័ន្ធនឹងបង្កើនសកម្មភាពធ្វើយ៉ាងណាឲ្យកុមារកម្ពុជាជាច្រើនអាចចេះហែលទឹកបាននិងជៀសវាងពីការលង់ទឹកដោយសហព័ន្ធសហការជាមួយក្លឹបកីឡានានា ដែលមានអាងទឹកទាំងអស់ចូលរួមចលនាបង្រៀនក្មេងៗឲ្យចេះហែលទឹក។
លោកអគ្គលេខាធិការបានបន្តថា សហព័ន្ធនឹងស្វែងរកអ្នកឧបត្ថម្ភដល់គ្រូៗរបស់យើងទៅតាមអ្វីដែលអាចធ្វើទៅបាន។ ចលនានេះនឹងមិនធ្វើតែមួយឆ្នាំហើយឈប់នោះទេយើងនឹងបន្តដំណើររហូតដល់ឆ្នាំ២០២៣និងលើសពីនោះទៅទៀត ដើម្បីកីឡាហែលទឹកនិងដើម្បីសុខមាលភាព សុខភាពរបស់ក្មេងៗជំនាន់ក្រោយៗរបស់យើង។
សហព័ន្ធសន្យានឹងផ្ដល់ជូនដោយសាលាមួយទទួល១០នាក់ ព្រោះសហព័ន្ធ និងគ្រូព្រមទាំងក្លិបត្រូវការរកទទួលទានដែរ។ក្លិបផ្សេងៗដែលចង់បានគ្រូទៅជួយបង្ហាត់នោះសហព័ន្ធមានគ្រប់គ្រាន់ទាំងអស់។សហព័ន្ធខ្មែរកីឡាហែលទឹកក៏សុំប្រកាសថា សហព័ន្ធយើងនឹងប្រារព្ធការប្រកួតជាលក្ខណអន្តរជាតិមួយនៅឆ្នាំក្រោយនេះ នោះគឺជាការប្រកួតតាមអាយុរបស់គ្រប់ប្រទេសអាស៊ាន (Sea Age)។
ការចាប់ផ្តើមដំបូងនេះ គឺនៅអាងហែលទឹកក្លឹបការ៉ាកុលដែលស្ថិតនៅខណ្ឌច្បារអំពៅដោយសហព័ន្ធជាអ្នកផ្តល់គ្រូបង្រៀននិងក្លឹបជាអ្នកផ្តល់ទីតាំង។ហេតុនេះសាលាឯកជនក្តីសាលារដ្ឋក្តីអាចដាក់សំណើមកសហព័ន្ធឬដាក់សំណើទៅកាន់ក្លឹបផ្ទាល់ដើម្បីបញ្ចូលសិស្សរបស់ខ្លួនទៅ ក្នុងកម្មវិធីសិក្សាផ្នែកអប់រំកាយនិងកីឡាដោយយកជំនាញ ហែលទឹក។
សហព័ន្ធខ្មែរកីឡាហែលទឹកបានដាក់ផែនការឲ្យក្មេង១ពាន់យ៉ាងហោចណាស់ក៏មាន១នាក់ចេះហែលទឹកក្នុងឆ្នាំសិក្សា២០១៨ - ២០១៩នេះ។ ផែនការធ្វើបានសម្រេចបានលុះណាតែសាលាអប់រំនិងមណ្ឌលសិក្សាទាំងអស់ចូលរួមសហការ។ ព្រោះសាលាមិនមានខាតបង់អ្វីឡើយគឺគ្រាន់តែសាលា ឬ សិស្សត្រូវដោះស្រាយមធ្យោបាយធ្វើដំណើរដោយខ្លួនឯងប៉ុណ្ណោះ ។
សិស្សទាំងអស់ អាចរៀនក្នុង១អាទិត្យគឺ១ម៉ោង។ឆ្នាំសិក្សាយើងមានប្រហែល១០ខែដូច្នេះក្មេងអាចរៀនបាន១០ដងយ៉ាងតិច គឺគេប្រាកដជាអាចហែលទឹកបានដោយមិនភ័យពីការលិចលង់ទៀតឡើយ។
លោកហែម គីរី អគ្គលេខាធិការសហព័ន្ធខ្មែរ កីឡាហែលទឹក បានចាត់ទុកថា ការចេះហែលទឹក វាមិនមែនជារបត់ជីវិតនោះទេ តែវាជារឿងចាំបាច់ ដើម្បីសង្គ្រោះខ្លួនឯងពីគ្រោះថ្នាក់ នៃការលង់ទឹកនៅពេលធ្វើដំណើរតាមផ្លូវទឹក ឬ អាចជួយសង្គ្រោះដល់អ្នកលង់ទឹកទៀតផង សម្រាប់ព្រឹត្តិការណ៍នេះ វាមិនត្រឹមតែផ្ដល់ឱកាស ឲ្យកុមារស្គាល់ពីទឹក រៀនហែលទឹកនោះទេតែសហព័ន្ធអាច នឹងរកបានអ្នកបន្តវេនក្មេងៗ ប្រកបដោយសមត្ថភាព ទៀតផង ៕
Source: Kampuchea Thmey Daily
0 Comments