ព្រះសីហនុ ៖ រថយន្តដឹកទំនិញធុនធំមួយគ្រឿង សង្ស័យដឹកធ្ងន់លើសចំណុះ ហើយបើកក្នុងស្ថានភាពផ្លូវឡើងចំណោទ ប៉ុន្តែដល់ពេលឡើងចំណោតមិនរួច ក៏រអិលថយក្រោយ ទៅបុកនឹង ហាងលក់ហ្គាស៍ និង ម៉ូតូជាច្រើនគ្រឿង រងការខូចខាត ធ្ងន់ធ្ងរ ប៉ុន្តែសំណាងល្អ នៅក្នុងហេតុការណ៍នេះ មិនមាននរណាម្នាក់ រងគ្រោះថ្នាក់ដល់អាយុជីវិត នោះឡើយ។
ហេតុការណ៍នេះ បានកើតឡើង នៅព្រឹកថ្ងៃសុក្រទី២០ ខែកក្កដា ឆ្នាំ២០១៨ នៅចំនុចក្បែរអតីត មហោស្រពចាស់ ស្ថិតក្នុងសង្កាត់លេខ០២ ក្រុងព្រះសីហនុ។
ទាក់ទិនទៅនឹងករណីនេះ បើតាមសាក្សីនៅកន្លែងកើតហេតុ បានឲ្យដឹងថា នៅមុន កើតហេតុ មាន រថយន្តបង្កម៉ាក ហ៊ី ណូ ពណ៌ខៀវស ពាក់ស្លាកលេខ ស្វាយរៀង3A 1415 ដឹក ទុយោ ឡើងចំណោត ឆ្ពោះទៅផ្សារលើ ប៉ុន្តែមកដល់កន្លែងកើតហេតុ រថយន្តអកហ្សើ ឡើង មិនរួច ដោយសង្ស័យថា ដឹកលើសចំណុះ បានរអិលថយក្រោយយ៉ាងលឿន។ បន្ទាប់មកបាន រេគូទរថយន្តចូលក្នុងហាងលក់ហ្គាស៍ កិនលើធុងហ្គាស៍ និងម៉ូតូជាច្រើនគ្រឿង រួមជាមួយ រថយន្តដឹកហ្គាស៍ផងដែរ។
ក្រោយកើតហេតុ សមត្ថកិច្ចចរាចរណ៍បានសម្រួលចរាចរណ៍ និង បានយករថយន្តពន្លត់អគ្គិភ័យ មកត្រៀមលក្ខណៈ ក្រែងមានហេតុការណ៍ជាយថាហេតុ។ ចំពោះការការខូចខាតគេនៅពុំទាន់អាចវាយតម្លៃបាននៅឡើយទេ ប៉ុន្តែបើតាមការប៉ាន់ប្រមាណ ក្រៅផ្លូវការ សម្ភារៈខូចខាត អាច រាប់ម៉ឺនដុល្លា។ ចំពោះ តៃកុងរថយន្តក្រោយពេល កើតហេតុបានគេចខ្លួនពីកន្លែងកើតហេតុបាត់ស្រមោល តែទោះជាយ៉ាងក៏ដោយ សមត្ថកិច្ច បានស្គាល់អត្តសញ្ញាណតៃកុងហើយ និងកោះហៅមកការិយាល័យនៅពេលបន្ទាប់។
បច្ចុប្បន្ន រថយន្តបង្កត្រូវបាន សមត្ថកិច្ចប៉ូលិសចរាចរណ៍ជើងគោក ស្នងការដ្ឋាននគរបាលខេត្តនាំយកទៅរក្សាទុកដើម្បីដោះស្រាយតាមផ្លូវច្បាប់៕
Source: Kampuchea Thmey Daily
0 Comments