រដ្ឋាភិបាលបាននិយាយនៅថ្ងៃអង្គារថា រលកកម្ដៅ ដែលមិនធ្លាប់មានពីមុននៅក្នុងប្រទេសជប៉ុនបានសម្លាប់មនុស្សយ៉ាងតិច៦៥នាក់ក្នុងរយៈពេលមួយសប្តាហ៍ ខណៈភ្នាក់ងារអាកាសធាតុឥឡូវនេះ បានចាត់ទុកអាកាសធាតុបំបែកកំណត់ត្រានេះថាជា “គ្រោះមហន្តរាយធម្មជាតិ”។
ភ្នាក់ងារគ្រប់គ្រងអគ្គិភ័យនិងគ្រោះមហន្តរាយបាននិយាយនៅក្នុងសេចក្តីថ្លែងការណ៍មួយថា ក្នុងរយៈពេលមួយសប្តាហ៍គិតត្រឹមថ្ងៃអាទិត្យ មនុស្សយ៉ាងតិច៦៥នាក់បានស្លាប់ដោយសាររលកកំដៅខណៈ២២,៦៤៧នាក់ត្រូវសម្រាកនៅមន្ទីរពេទ្យ។
អ្នកនាំពាក្យភ្នាក់ងារនេះបានប្រាប់ AFP ថា តួលេខទាំងពីរនេះគឺ “អាក្រក់បំផុតមិនធ្លាប់មានសម្រាប់សប្ដាហ៍ណាមួយក្នុងអំឡុងរដូវក្តៅ” ចាប់តាំងពីទីភ្នាក់ងារនេះបានចាប់ផ្តើមកត់ត្រាចំនួនអ្នកស្លាប់ដោយសាររលកកំដៅក្នុងខែកក្កដាឆ្នាំ២០០៨មក។
ទីភ្នាក់ងារគ្រប់គ្រងអគ្គិភ័យនិងគ្រោះមហន្តរាយបាននិយាយនៅថ្ងៃអង្គារថា មនុស្សសរុបចំនួន៨០នាក់បានស្លាប់ដោយសារកំដៅចាប់តាំងពីដើមខែកក្កដាមកនិងជាង៣៥,០០០នាក់ត្រូវសម្រាកនៅមន្ទីរពេទ្យ។
ក្នុងចំណោមអ្នកស្លាប់គឺមានក្មេងប្រុសអាយុ៦ឆ្នាំម្នាក់ដែលបានបាត់បង់ស្មារតីនៅតាមដងផ្លូវ។
អ្នកនាំពាក្យរដ្ឋាភិបាលជាន់ខ្ពស់លោក Yoshihide Suga បានប្រាប់អ្នកយកព័ត៌មាននៅថ្ងៃអង្គារថា “ខណៈពេលរលកកំដៅនៅតែបន្តគ្របដណ្ដប់ប្រទេសនោះ វិធានការជាបន្ទាន់គឺត្រូវបានទាមទារដើម្បីការពារជីវិតរបស់ក្មេងៗសិស្សសាលា”។
រដ្ឋាភិបាលបាននិយាយថា ខ្លួននឹងផ្តល់មូលនិធិដើម្បីធានាថា សាលារៀនទាំងអស់ត្រូវបានបំពាក់ដោយម៉ាស៊ីនត្រជាក់ត្រឹមរដូវក្តៅខាងមុខនេះ។
កាលពីថ្ងៃចន្ទ ទីក្រុង Kumagaya នៃតំបន់ Saitama នៅខាងក្រៅទីក្រុងតូក្យូគឺបានបង្កើតកំណត់ត្រាកំដៅថ្នាក់ជាតិថ្មីមួយដោយមានសីតុណ្ហភាព៤១,១អង្សាសេ។ ហើយសីតុណ្ហភាពលើសពី៤០អង្សាត្រូវបានគេកត់ត្រាជាលើកដំបូងនៅក្នុងតំបន់រថភ្លើងក្រោមដីរបស់ទីក្រុងតូក្យូ។
មានភាពចុះត្រជាក់បន្តិចនៅថ្ងៃអង្គារប៉ុន្តែសីតុណ្ហភាពនៅតែខ្ពស់ជាងធម្មតានៅផ្នែកភាគច្រើននៃប្រទេសនេះ។
ភ្នាក់ងារអាកាសធាតុបានព្រមានថា ផ្នែកភាគច្រើននៃប្រទេសនេះនឹងបន្តកំដៅនៅសីតុណ្ហភាព៣៥អង្សាឬខ្ពស់ជាងនេះរហូតដល់ដើមខែសីហា។
ក្រុមមន្ត្រីបានជំរុញឲ្យប្រជាជនប្រើម៉ាស៊ីនត្រជាក់ ផឹកទឹកគ្រប់គ្រាន់និងសម្រាកឲ្យបានញឹកញាប់។
គួរបញ្ជាក់ថា រលកកម្ដៅនេះបានកើតឡើងបន្ទាប់ពីមានភ្លៀងធ្លាក់យ៉ាងខ្លាំងក្នុងកំណត់ត្រាដែលបានបំផ្លិចបំផ្លាញផ្នែកខ្លះនៃភាគខាងលិចនិងកណ្ដាលប្រទេសជប៉ុនហើយទឹកជំនន់និងការបាក់ដីបានសម្លាប់មនុស្សជាង២២០នាក់៕ AFP
Source: Kampuchea Thmey Daily
0 Comments