ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រមុខគណបក្សប្រជាជនកម្ពុជាបានរំលឹកថា នៅសល់តែ៣ថ្ងៃទៀតប៉ុណ្ណោះ ការបោះឆ្នោតជ្រើសរើសតំណាងរាស្ត្រ ឈានចូលមកដល់ហើយ ដោយសម្តេចតេជោ ហ៊ុន សែន បានអំពាវនាវឲ្យពលរដ្ឋត្រៀមខ្លួនទៅបោះឆ្នោតឲ្យបានគ្រប់គ្នា។
សម្តេចតេជោហ៊ុន សែន បានអំពាវនាវបែបនេះនៅក្នុងទំព័រហ្វេសប៊ុកផ្ទាល់របស់សម្តេច នៅថ្ងៃទី ២៦ ខែកក្កដា នេះ ដែលនៅសល់តែ៣ ថ្ងៃទៀតប៉ុណ្ណោះការបោះឆ្នោតនឹងចូលមកដល់។ សម្តេចតេជោ ហ៊ុន សែន បានបង្ហោះសារនយោបាយខ្លីនៅក្នុងហ្វេសប៊ុកសម្តេចថា ៖ «គណបក្សប្រជាជនកម្ពុជា លេខរៀងទី២០ ។ នៅសល់ តែ៣ថ្ងៃទៀតប៉ុណ្ណោះថ្ងៃបោះឆ្នោតជាប្រវត្តិសាស្ត្រនឹងមកដល់ ។ សូមបងប្អូនត្រៀមខ្លួនទៅបោះឆ្នោតអោយបានគ្រប់ៗគ្នា! អរគុណបងប្អូនជនរួមជាតិដែលមានជំនឿជឿជាក់និងទុកចិត្តគណបក្សប្រជាជនតាំងពីដើមរហូតមក ។ បងប្អូនយល់ច្បាស់ណាស់ថា គណបក្សប្រជាជនកម្ពុជាគឺជារបស់យើងទាំងអស់គ្នា។ គ្រប់អ្វីៗទាំងអស់ដែលគណបក្សប្រជាជនកំពុងខិតខំធ្វើ គឺដើម្បីផលប្រយោជន៍កម្ពុជាទាំងមូល។
ខ្ញុំ(សម្តេចតេជោ)សូមអរគុណសមាជិកសមាជិកាគណបក្សប្រជាជនកម្ពុជា និង កូនក្មួយយុវជនដែលបានចូលរួមឃោសនាពន្យល់ដល់បងប្អូនប្រជាពលរដ្ឋអោយបានយល់ច្បាស់នូវគោលនយោបាយរបស់គណបក្សប្រជាជនកម្ពុជា និង សិទ្ធិសេរីភាពព្រមទាំងកាតព្វកិច្ចជាពលរដ្ឋល្អក្នុងការចូលរួមបោះឆ្នោតជ្រើសរើសមេដឹកនាំដែលខ្លួនពេញចិត្ត ។ ព្រោះថាការបោះឆ្នោតគឺពង្រឹងនូវសិទ្ធិសេរីភាព លទ្ធិប្រជាធិបតេយ្យ ដែលនាំអោយប្រទេសជាតិយើងកាន់តែរីកចម្រើន។
យើងទាំងអស់គ្នាបោះឆ្នោតគាំទ្រគណបក្សប្រជាជនកម្ពុជាលេខរៀងទី២០ នៅថ្ងៃទី ២៩ កក្កដា ខាងមុខនេះ។»
នៅថ្ងៃសុក្រនេះ គណបក្សប្រជាជនកម្ពុជាដែលដឹកនាំដោយសម្តេចតេជោ ហ៊ុន សែន ប្រមុខគណបក្សប្រជាជនកម្ពុជា ដឹកនាំក្បួនឃោសនាបោះឆ្នោតរបស់គណបក្សប្រជាជនកម្ពុជានៅរាជធានីភ្នំពេញ ដើម្បី បិទបញ្ចប់យុទ្ធនាការឃោសនាបោះឆ្នោត ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានឲ្យដឹងនៅថ្ងៃទី២៦ ខែ កក្កដា ឆ្នាំ២០១៨ ថា គណបក្សប្រជាជនកម្ពុជានឹងធ្វើការហែក្បួនបិទយុទ្ធនាការបោះឆ្នោតទ្រង់ទ្រាយធំនៅរាជធានីភ្នំពេញ ដែលដឹកនាំដោយសម្តេចតេជោ ហ៊ុន សែន ប្រធានគណបក្សផ្ទាល់តែម្តង។ លោកបញ្ជាក់ថា “តាមគម្រោងគណៈកម្មការគណបក្សក្រុងភ្នំពេញសមាជិកចូលរួមនៅថ្ងៃបិទបញ្ចប់យុទ្ធនាការមានចំនួន ២៥ ម៉ឺននាក់ ដោយប្រមូលផ្តុំគ្នានៅកោះពេជ្រ ហើយសម្តេចប្រធានប្រកាសបិទបញ្ចប់យុទ្ធនាការដោយធ្វើ វិឌីអូខនហ្វីរិន ទៅតាមបណ្តាខេត្តទូទាំងប្រទេសទៀតផង ។ អីចឹងនៅខេត្ត-ក្រុងក៏គេប្រមូលផ្តុំគ្នាផងដែរ សរុបសមាជិក ៥លាននាក់” ។
នៅថ្ងៃទី២៧ ខែកក្កដា ឆ្នាំ២០១៨ គណបក្សប្រជាជនកម្ពុជានឹងធ្វើការជួបជុំ និង ដង្ហែក្បួនបិទយុទ្ធនាការឃោសនាបោះឆ្នោតជ្រើសតាំងតំណាងរាស្ដ្រនីតិកាលទី៦នៅមជ្ឈមណ្ឌលសន្និបាតនិងពិព័រណ៍កោះពេជ្រ ដោយមានការជួបជុំសមាជិករហូតដល់ប្រមាណ ២៥០ ០០០នាក់ ។
ក្នុងសេចក្តីប្រកាសព័ត៌មានរបស់សាលារាជធានីភ្នំពេញបានឲ្យដឹងថា បន្ទាប់ពីការជួបជុំសមាជិករួចគណបក្សប្រជាជននឹងដង្ហែទៅតាមមហាវិថីកម្ពុជាក្រោម ,មហាវិថីសម្ដេចមុនីរ៉េត ,កំណាត់វិថីសម្ដេចសុធារស ,កំណាត់មហាវិថីម៉ៅសេទុង, កំណាត់មហាវិថីព្រះមុនីវង្ស, កំណាត់មហាវិថីព្រះសីហនុ, វិថីព្រះស៊ីសុវត្ថិ និង ផ្លូវសំខាន់ៗមួយចំនួនទៀតក្នុងរាជធានីភ្នំពេញ។ រដ្ឋបាលរាជធានីភ្នំពេញស្នើប្រជាពលរដ្ឋដែលគ្រោងធ្វើដំណើរទៅកន្លែងជួបជុំ និងតាមមហាវិថី តិរិវិថី និងផ្លូវសំខាន់ៗមួយចំនួនខាងលើមេត្តាបញ្ចៀសចរាចរណ៍ជាបណ្ដោះអាសន្ន បើសិនមិនចាំបាច់ពុំគួរធ្វើដំណើរឆ្លងកាត់កន្លែងជួបជុំនិងផ្លូវដង្ហែរបស់គណបក្សទាំងនេះ។
គួររំលឹកថា សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជាធា្លប់បានអញ្ជើញចូលរួមដង្ហែក្បួនគណបក្សប្រជាជនកម្ពុជាឃោសនារកសំឡេងឆ្នោតក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ក្នុងថ្ងៃបិទយុទ្ធនាការឃោសនា កាលខែមិថុនា ឆ្នាំ២០១៧ នៅរាជធានីភ្នំពេញផងដែរ។
គណៈកម្មាធិការជាតិរៀបចំការបោះឆ្នោត កាលពីថ្ងៃទី១៨ កក្កដា បានចេញផ្សាយលទ្ធផលផ្លូវការអំពីចំនួនភ្នាក់ងារគណបក្សនយោបាយចូលរួមសង្កេតការណ៍ការបោះឆ្នោតជ្រើសតាំងតំណាងរាស្ត្រនេះ។ គ.ជ.បឲ្យដឹងថា នឹងមានចំនួនភ្នាក់ងារគណបក្សនយោបាយសង្កេតការណ៍ការបោះឆ្នោតនៅទូទាំងប្រទេសសរុបទាំងអស់ចំនួន៧៩.៨៤៩ នាក់។ ក្នុងនោះគណបក្សប្រជាជនកម្ពុជាត្រៀមនឹងដាក់ភ្នាក់ងារសរុបជាង ៤៥.០០០នាក់, គណបក្សហ្វ៊ុនស៊ិនប៉ិច និង គណបក្សសម្ព័ន្ធដើម្បីប្រជាធិបតេយ្យមានភ្នាក់ងារជាង ១ម៉ឺននាក់ ,គណបក្សខ្មែររួបរួមជាតិមានជាង ៤ពាន់នាក់ ,គណបក្សប្រជាធិបតេយ្យមូលដ្ឋានមានជិត ៤ រយនាក់,គណបក្សដទៃទៀតមានចំនួនអ្នកសង្កេតការណ៍តិចជាង ១ រយនាក់ ឬគ្មានតែម្ដង។
តួលេខ ចុងក្រោយរបស់គណៈកម្មាធិការជាតិរៀបចំការបោះឆ្នោតឲ្យដឹងដែរថា មានក្រុមអ្នកសង្កេតការណ៍ជាជនជាតិបរទេសសរុបចំនួន ៣០៨ នាក់ ក្រុមសង្កេតការណ៍ក្នុងស្រុកមានសរុបមកពី ១០៧ ស្ថាប័ន សរុបអ្នកសង្កេតការណ៍ជាតិមានចំនួនប្រមាណជាង ៧៧.០០០នាក់។ ក្នុងចំណោមភ្នាក់ងារសង្កេតការណ៍ការបោះឆ្នោតដែលមានសមាជិកជាជនបរទេសនោះ គ.ជ.ប ក៏បានចុះឈ្មោះស្ថាប័នបរទេសមួយចំនួនរួមមានក្រុមប្រឹក្សាអឺរ៉ុបសម្រាប់ទំនាក់ទំនងអន្តរជាតិអឺរ៉ុប (European Council on International Relations) និងក្រុមប្រឹក្សាអឺរ៉ុបសម្រាប់វិស័យទេសចរណ៍ និង ពាណិជ្ជកម្មអឺរ៉ុប (European Council of Tourism and Trade) ដែលមានមូលដ្ឋាននៅទីក្រុងប៊ូការ៉េស (Bucharest) នៃប្រទេសរ៉ូមានី៕
Source: Kampuchea Thmey Daily
0 Comments