ភ្នំពេញ ៖ ពាក្យចាស់និយាយថា “ផោមក្នុងទឹកគង់គេដឹង” មានន័យទង្វើដែលអ្នកបានធ្វើមិនអាចលាក់កំបាំងបានទេ យូរ ឬឆាប់ គង់តែធ្លាយដល់អ្នកដទៃបានដឹងជាក់ជាមិនខាន ដូច្នេះហើយអ្នកមិនគួរមានគំនិតបោកប្រាស់ប្រជាពលរដ្ឋ ដោយមើលស្រាលថា ពួកគាត់អន់ ល្ងង់ ឬមានចំណេះដឹងមិនស្មើខ្លួននោះឡើយ។
ជាក់ស្តែងសារឆ្លើយឆ្លងរវាងទណ្ឌិត សម រង្ស៊ី អតីតប្រធានអតីតគណបក្សសង្គ្រោះជាតិ ជាមួយអតីតមន្ត្រីជាន់ខ្ពស់អតីតគណបក្សសង្គ្រោះជាតិ គឺលោក ឡុង រី ក្នុងគំរោងបោកប្រាស់ប្រជាពលរដ្ឋ ក៏ដូចជាអតីតសកម្មជនរបស់ខ្លួន ដើម្បីកេងចំណេញនយោបាយ ត្រូវបានទម្លាយឲ្យដឹងកាលពីពេលថ្មីៗនេះ តាមរយៈមន្ត្រីរបស់ខ្លួន ដែលមិនចូលចិត្តទង្វើបែបនេះ។ សារឆ្លើយឆ្លងរវាងលោក សម រង្ស៊ី និងលោក ឡុង រី នេះ គឺទាក់ទងការរៀបចំផែនការបោកប្រាស់ប្រជាពលរដ្ឋឲ្យទៅទទួលលោក សម រង្ស៊ី នៅថ្ងៃទី២៨ ខែកក្កដា ខាងមុខ ដែលគំរោងនេះ រៀបចំឡើងក្នុងបំណងតែមួយគត់ គឺដើម្បីទប់ស្កាត់មិនឲ្យប្រជាពលរដ្ឋ ឬសកម្មជនរបស់ខ្លួនទៅបោះឆ្នោត ដែលនឹងធ្វើឡើងនៅថ្ងៃទី២៩ ខែកក្កដា ឆ្នាំ២០១៨ ខាងមុខ។
តាមសារឆ្លើយឆ្លង ដែលត្រូវបានផ្សព្វផ្សាយនៅក្នុងផេកហ្វេសប៊ុកមួយ ដែលមានឈ្មោះថា SAJ លោក សម រង្ស៊ី បានសរសេរទៅកាន់លោក ឡុង រី ដែលជាអតីតប្រធានអង្គរក្សរបស់ខ្លួននោះថា “សុខសប្បាយទេ” លោក ឡុង រី បានតបថា “បាទអត់សុខសប្បាយទេ លោកប្រធាន” លោក សម រង្ស៊ី បានសរសេរទៀតថា “ខ្ញុំមានគំនិតថ្មីមួយ។ សូមរីឯងឲ្យបណ្តាញយើងផ្សព្វផ្សាយព័ត៌មានចិត្តសាស្ត្រមួយថា ខ្ញុំនឹងទៅភ្នំពេញថ្ងៃទី២៨ កក្កដា នេះហើយ” លោក ឡុង រី បានតបថា “លោកប្រធានមកមែនឬ ? លោក សម រង្ស៊ី តបថា “អត់ទេ ខ្ញុំមិនភ្លើត្រឡប់ ទៅស្រុកខ្មែរឲ្យហ៊ុន សែន ចាប់ខ្ញុំដាក់គុកនោះទេ ហើយប្រពន្ធខ្ញុំ ក៏មិនឲ្យខ្ញុំប្រថុយទៅដែរ” លោក ឡុង រី ថា “ចឹងលោកប្រធានឲ្យខ្ញុំផ្សព្វផ្សាយរឿងហ្នឹងធ្វើអី?” លោក សម រង្ស៊ី តបវិញថា “នេះជាចិត្តសាស្ត្រដើម្បីទប់ស្កាត់រារាំងសកម្មជន និងអ្នកគាំទ្របក្សយើងកុំឲ្យទៅបោះឆ្នោតប៉ុណ្ណោះ។ ហើយជំហានបន្ទាប់យើងនាំគ្នាបំផុសថា មិនចាច់ទៅបោះឆ្នោតទេ ប៉ុន្តែត្រូវនាំគ្នាត្រៀមខ្លួនមកចាំទទួលខ្ញុំការពារខ្ញុំហ្នឹងណា។” លោក ឡុង រី តបថា “បាទលោកប្រធានខ្ញុំយល់ហើយ ចាំខ្ញុំចាត់ចែងតាមហ្នឹង”។
ដោយឡែកកាលពីថ្ងៃទី២២ ខែកក្កដា ឆ្នាំ២០១៨ facebook មួយដែលមានឈ្មោះ “ទីប្រឹក្សានគរ” បានទម្លាយសារសំងាត់អតីតមន្ត្រីជាន់ខ្ពស់បក្សប្រឆាំងទាំង១១៨នាក់ ដែលបានឈ្លោះគ្នា និងវាយប្រហារមេដឹកនាំខ្លួនឯងពេញ Group Messenger។ តាម Facebook នោះបានសរសេររៀបរាប់ថា “ខ្ញុំជាមនុស្សម្នាក់ ដែលស្ថិតនៅក្នុងចំណោមអ្នកនយោបាយរបស់គណបក្សសង្គ្រោះជាតិ ទាំង១១៨នាក់ ដែលត្រូវបានតុលាការកំពូលហាមឃាត់, ហើយក៏កំពុងស្ថិតនៅក្នុង Group Messenger (118 Senior Leader of CNRP) ដោយឈឺចាប់យ៉ាងខ្លាំងនូវទង្វើវាយប្រហារគ្នា វាយប្រហារទាំងមេដឹកនាំ CNRP និងឈ្លោះប្រកែកគ្នាដូចឆ្កែ ដូចឆ្មា មិនឈប់មិនឈរ។ ដើម្បីបន្ថយការឈឺចាប់ជាទម្ងន់របស់ខ្ញុំ ថ្ងៃនេះខ្ញុំទម្លាយនូវពាក្យពេជន៍សារឆ្លងឆ្លើយគ្នារវាងមន្ត្រីជាន់ខ្ពស់របស់គណបក្សសង្គ្រោះជាតិ ដែលធ្វើការមិនស្របគ្នា ឈ្លោះគ្នា ខាំគ្នា ជាពិសេសវាយប្រហារមេដឹកនាំបក្សទៀតផង។ សារនេះសូមផ្ញើជូនអ្នកគាំទ្រគណបក្សសង្គ្រោះជាតិទាំងអស់ ដើម្បីបានដឹងរឿងពិតប្រាកដដែលកំពុងកើតឡើង យ៉ាងចម្រូងចម្រាសនៅពេលនេះ”។
នៅក្នុងសារមួយក្នុងចំណោមសារជាច្រើន ដែលត្រូវបានទម្លាយនោះបានបង្ហាញថា លោក គឹម យ៉ា បានសរសេររៀបរាប់ និងរិះគន់មេដឹកនាំរបស់ខ្លួន គឺលោក សម រង្ស៊ី តែម្តង, លោក គឹម យ៉ា បានសរសេរយ៉ាងដូច្នេះថា “រឿងដែលលោកប្រធាន សម រង្ស៊ី លើកនិយាយពី ហ៊ុន សែន នេះយើងទាំងអស់គ្នាដឹងពីយូរមកហើយ មិនមែនទើបតែដឹងថ្មីៗនេះទេ។ បើដឹងហើយហេតុអ្វីក៏លោក សម រង្ស៊ី ទៅឃុបឃិតជាមួយ ហ៊ុន សែន និងពង្រឹងអំណាចវាធ្វើអ្វី? កាលពីឆ្នាំ២០១៣ ប្រជាពលរដ្ឋងើបពេញប្រទេសធ្វើបាតុកម្មដោយសង្ឃឹម ក្លាហ៊ានលះបង់គ្រប់បែបយ៉ាងគណបក្សសង្គ្រោះជាតិ មានភាពស្របច្បាប់នឹងធ្វើសកម្មភាពនយោបាយ អំណាច ហ៊ុន សែន ទន់ជ្រាយរង្គើ។ តែលោក សម រង្ស៊ី គ្មានគំរោងទៅយកអំណាចទេ។ ពេលប្រជាពលរដ្ឋធ្វើបាតុកម្មពេញប្រទេស បែរជាគាត់មកដើរលេងនៅបរទេសរៀបការកូនស្រីរបស់គាត់ ដោយនឹកថា សំខាន់ជាងជីវិតជាតិ និងប្រជាពលរដ្ឋ។ គាត់សម្រេចចូលសភាដោយមិនប្រាប់សហការីទាំងអស់នៅខែកក្កដា ឆ្នាំ២០១៤ ហើយយកវប្បធម៌សន្ទនាដឹកដៃ ហ៊ុន សែន ដើរលេងគង់តែ ហ៊ុន សែន ចាប់សមាជិកបក្សដាក់គុកជាច្រើននាក់ ហើយគាបសង្កត់លោកអនុប្រធានក៏ដោយ”។
នៅក្នុងសារឆ្លើយឆ្លងជាច្រើន មន្ត្រីទាំងនោះ បានប្រកែកគ្នា ព្រមទាំងវាយប្រហារគ្នាទៅវិញទៅមក ដែលបញ្ជាក់ថា ពួកគេកំពុងស្រេកឃ្លានបុណ្យស័ក្តិ និងអំណាចយ៉ាងខ្លាំង ហើយបញ្ជាក់ថា ពួកគេគ្មានសាមគ្គីផ្ទៃក្នុងឡើយ។ ដូច្នេះពាក្យចាស់ដែលនិយាយថា “ផោមក្នុងទឹកគង់ដឹង” នោះ ពិតជាត្រឹមត្រូវដូច្នេះ។ មានន័យថា ទង្វើដែលពួកគេបានធ្វើមិនអាចលាក់កំបាំងបានទេ យូរ ឬឆាប់ គង់តែធ្លាយដល់អ្នកដទៃបានដឹងជាក់ជាមិនខាន៕
Source: Kampuchea Thmey Daily
0 Comments