ភ្នំពេញ ៖ ស្ត្រីវ័យ៥៨ឆ្នាំម្នាក់ មានជីវិតរស់ជាថ្មីម្តងទៀត ខណៈតូចចិត្តប៉ងលោតទឹកពីលើស្ពានជ្រោយចង្វាថ្មីសម្លាប់ខ្លួន តែត្រូវបានប្រជាពលរដ្ឋធ្វើដំណើរឃើញទាន់ក៏ឃាត់ប្រគល់ទៅឲ្យសណ្តាប់ធ្នាប់ខណ្ឌជ្រោយចង្វារនាំមកកាន់ប៉ុស្តិ៍ជ្រោយចង្វារធ្វើការណែនាំ ហើយរង់ចាំសាច់ញាតិមកទទួល។
ហេតុការណ៍ភ្ញាក់ផ្អើលខាងលើនេះ បានកើតឡើងកាលពីវេលាម៉ោង១និង១៥នាទីរសៀលថ្ងៃទី២៣ ខែកក្កដា ឆ្នាំ២០១៨ ចំណុចលើស្ពានជ្រោយចង្វារថ្មី ភូមិដើមគ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
ស្ត្រីខាងលើឈ្មោះសាន អាយុ៥៨ឆ្នាំ ស្នាក់នៅផ្ទះជួលម្តុំរង្វង់មូលគួចកាណុង ក្នុងសង្កាត់ស្រះចកខណ្ឌដូនពេញ។
ប្រភពបានឲ្យដឹងថា គាត់ធ្លាប់មានប្រវត្តិដួលផ្ងារក្រោយអស់រយៈពេលមួយឆ្នាំមកហើយតាំងពីពេលដែលគាត់ដួលមកអាការៈក្នុងខ្លួនរបស់គាត់ចេះតែកន្ត្រាក់ៗផ្ទៃមុខរបស់គាត់ដូចមានអ្វីម្យ៉ាងមកចាកដោត។
ស្ត្រីខាងលើបន្តថា ដោយមានជំងឺប្រចាំកាយរ៉ាំរ៉ៃដូច្នេះហើយ ទើបគាត់ធ្វើដំណើរមកស្ពានជ្រោយចង្វារថ្មីប៉ងលោតទឹកសម្លាប់ខ្លួនតែម្តង។
គួររំលឹកដែរថា ស្ត្រីខាងលើកុំតែបានប្រជាពលរដ្ឋប្រទះឃើញហើយបានឃាត់គាត់កុំឲ្យលោតពីលើស្ពានជ្រោយចង្វារទាន់ពេលវេលាម្ល៉េះមិនដឹងថា គាត់ទៅជាយ៉ាងណានោះទេ។
ក្រោយពេលកើតហេតុកម្លាំងសណ្តាប់ធ្នាប់ខណ្ឌជ្រោយចង្វារបានឌុបគាត់តាមម៉ូតូមកឲ្យសម្រាកនៅប៉ុស្តិ៍នគរបាលរដ្ឋបាលជ្រោយចង្វារ រួចសមត្ថកិច្ចក៏ទាក់ទងទៅសាច់ញាត់ស្ត្រីរងគ្រោះមកទទួលគាត់ត្រឡប់ទៅវិញ៕
Source: Kampuchea Thmey Daily
0 Comments