ភ្នំពេញ ៖ នៅវេលាម៉ោង១រសៀល ថ្ងៃទី២៨ ខែកក្កដា ឆ្នាំ២០១៨នេះ លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ទទួលជួបគណៈប្រតិភូ អ្នកសង្កេតការណ៍អន្តរជាតិជាន់ខ្ពស់ចំនួន៣២នាក់ ដែលមានសមាជិកព្រឹទ្ធសភា សមាជិករដ្ឋសភា មកពីសហគមន៍អឺរ៉ុប ដែលជំនួបនេះធ្វើឡើងនៅសណ្ឋាគារកាំបូឌីយ៉ាណា ក្នុងបំណងស្វែងយល់ពីការរៀបចំ និងការប្រព្រឹត្តទៅនៃការបោះឆ្នោតនៅកម្ពុជា មុនពេលចូលរួមសង្កេតការណ៍បោះឆ្នោតនៅថ្ងៃទី២៩ ខែកក្កដា ស្អែកនេះ។
សូមបញ្ជាក់ថា បន្ទាប់ពីផុតកំណត់នៃការទទួលពាក្យសុំចុះឈ្មោះអ្នកសង្កេតការណ៍ជាតិ កាលពីថ្ងៃទី១៨ ខែកក្កដា ឆ្នាំ២០១៨ គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចទទួលស្គាល់ជាផ្លូវការអ្នកសង្កេតការណ៍ជាតិ នៃសមាគម អង្គការមិនមែនរដ្ឋាភិបាលសរុប ៧៩.៦១២ នាក់ មកពី១១២ ស្ថាប័ន ដើម្បីចូលរួមសង្កេតការបោះឆ្នោតជ្រើសតាំងតំណាងរាស្ត្រ នីតិកាលទី៦នេះ។
ចំណែកអ្នកសង្កេតការណ៍បោះឆ្នោតអន្តរជាតិ ក្រោយពីបញ្ចប់ការទទួល កាលពីថ្ងៃទី២៥ ខែកក្កដា ឆ្នាំ២០១៨ គ.ជ.ប ក៏បានទទួលស្គាល់ជាផ្លូវការនូវអ្នកសង្កេតការណ៍បោះឆ្នោតអន្តរជាតិចំនួន៣២២នាក់ មកពីប្រទេស ស្ថាប័ន និងស្ថានទូតចំនួន៤២ ក្នុងនោះរួមមាន AIPA-APA-ICAPP-CDI-EUROPEAN COUNCIL TOURISM និង TRADE-EUROPEAN COUNCIL ON INTERNATIONAL RELATIONS ជាដើម។ ជាមួយគ្នានោះ គ.ជ.ប ក៏កំពុងពិនិត្យអ្នកសង្កេតការណ៍អន្តរជាតិចំនួន២១៦ នាក់ ទៀតមកពី២៨ ស្ថាប័ន ក្នុងនោះមាន CENTRIST DEMOCRAT INTERNATIONAL-RUSSIA CIVIC CHAMBER ជាដើម។
យោងតាមប្រការ ៣.៤.៣ នៃបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ គ.ជ.ប ត្រូវពិនិត្យ និងសម្រេចលើពាក្យសុំចុះឈ្មោះអ្នកសង្កេតការណ៍អន្តរជាតិ ក្នុងរយៈពេលយ៉ាងយូរ៣ថ្ងៃ បន្ទាប់ពីបានទទួលពាក្យស្នើសុំ ត្រូវនឹងថ្ងៃទី២៨ ខែកក្កដា ឆ្នាំ២០១៨។ អ្នកសង្កេតការណ៍ជាតិ និងអន្តរជាតិ នៃសមាគម អង្គការមិនមែនរដ្ឋាភិបាល គឺជាសាក្សីនៃការបោះឆ្នោតដោយសេរី ត្រឹមត្រូវ និងយុត្តិធម៌ និងត្រូវផ្តល់របាយការណ៍ជាលាយលក្ខណ៍អក្សរស្តីពីការសង្កេតការណ៍ និងសេចក្តីសន្និដ្ឋានរបស់ខ្លួននៅក្នុងដំណើរការបោះឆ្នោត ផ្ញើជូន គ.ជ.ប បន្ទាប់ពីដំណើរការបោះឆ្នោតចប់សព្វគ្រប់៕
Source: Kampuchea Thmey Daily
0 Comments