ប្រព័ន្ធផ្សព្វផ្សាយរដ្ឋរបស់កូរ៉េខាងជើង បានដាក់សម្ពាធបន្ថែមទៀតទៅលើប្រទេសកូរ៉េខាងត្បូងឲ្យអនុវត្តកិច្ចព្រមព្រៀងនៃកិច្ចប្រជុំកំពូលអន្តរកូរ៉េរបស់ខ្លួនដើម្បីធ្វើការឆ្ពោះទៅរក “កិច្ចការជាប្រវត្តិសាស្ត្រ” នៃការបញ្ចប់សង្គ្រាមកូរ៉េ។ នេះបើតាមសេចក្តីរាយការណ៍របស់ទីភ្នាក់ងារព័ត៌មានកូរ៉េខាងត្បូង Yonhap កាលពីថ្ងៃចន្ទ។
ដោយដកស្រង់ប្រភពរបស់ Uriminzokkiri ដែលជាគេហទំព័រឃោសនាខាងក្រៅរបស់កូរ៉េខាងជើង, Yonhap បានរាយការណ៍ថា “វាគឺជាកិច្ចការជាប្រវត្តិសាស្ត្រមួយដែលមិនអាចត្រូវពន្យារពេលទៀតទេដើម្បីកសាងរបបសន្តិភាពដ៏រឹងមាំមួយដោយបញ្ចប់នូវស្ថានភាពជារដ្ឋនៃបទឈប់បាញ់នាបច្ចុប្បន្ននៅលើឧបទ្វីបកូរ៉េ”។
រឿងនេះបានកើតឡើងបន្ទាប់ពីមេដឹកនាំកូរ៉េខាងជើងលោកគីមជុងអ៊ុននិងប្រធានាធិបតីអាមេរិកដូណាល់ត្រាំបានជួបប្រជុំគ្នានៅប្រទេសសិង្ហបុរីសម្រាប់កិច្ចប្រជុំកំពូលជាប្រវត្តិសាស្ត្រកាលពីថ្ងៃទី១២ខែមិថុនា។ កិច្ចប្រជុំនោះបានធ្វើឡើងបន្ទាប់ពីលោកគីមបានជួបប្រធានាធិបតីកូរ៉េខាងត្បូងលោកមូនចេអ៊ីននៅថ្ងៃទី២៧ខែមេសាក្នុងតំបន់គ្មានយោធាដែលបែងចែកប្រទេសរបស់ពួកគេ។
ក្នុងអំឡុងកិច្ចប្រជុំកាលពីខែមេសា មេដឹកនាំទាំងពីរបានសន្យាថានឹងធ្វើការឆ្ពោះទៅរក “ការរំសាយអាវុធនុយក្លេអ៊ែរពេញលេញចេញពីឧបទ្វីបកូរ៉េ” និងធ្វើការជាមួយសហរដ្ឋអាមេរិកនិងចិនដើម្បីប្រកាសពីការបញ្ចប់ជាផ្លូវការនៃសង្គ្រាមកូរ៉េទសវត្សរ៍ឆ្នាំ១៩៥០។
ប្រព័ន្ធផ្សព្វផ្សាយផ្សេងទៀតរបស់កូរ៉េខាងជើងដូចជា Meari ជាដើមក៏បានជំរុញផងដែរឲ្យរដ្ឋាភិបាលកូរ៉េខាងត្បូងធ្វើការនៅផ្នែករបស់ខ្លួនដើម្បីបញ្ចប់សង្គ្រាមកូរ៉េ។ ប្រព័ន្ធផ្សព្វផ្សាយបានបន្ថែមថា កិច្ចប្រជុំរវាងមេដឹកនាំទាំងពីរកាលពីខែមេសានឹងបាត់បង់សារៈសំខាន់របស់ខ្លួនប្រសិនបើការផ្លាស់ប្តូរមិនត្រូវបានអនុវត្តក្នុងពេលឆាប់ៗនេះទេនោះ។
បន្ទាប់ពីកិច្ចព្រមព្រៀងមួយចំនួនត្រូវបានធ្វើឡើងក្នុងអំឡុងកិច្ចប្រជុំកំពូលអន្តរកូរ៉េនោះ ផែនការនានាត្រូវបានធ្វើឡើងដើម្បីបន្តការជួបជុំគ្រួសារដែលត្រូវបានបំបែកដោយសង្គ្រាមកូរ៉េឡើងវិញនៅក្នុងខែសីហា។
ក្រសួងបង្រួបបង្រួមរបស់ក្រុងសេអ៊ូលបានបញ្ជាក់ជាថ្មីអំពីបំណងរបស់រដ្ឋាភិបាលក្នុងការប្រកាសបញ្ចប់សង្គ្រាមកូរ៉េនៅដំណាច់ឆ្នាំនេះនិងបានសន្យាធ្វើការយ៉ាងជិតស្និទ្ធជាមួយអាមេរិកនិងកូរ៉េខាងជើងអំពីរបៀបដើម្បីសម្រេចបានគោលបំណងនេះ៕ CAN
Source: Kampuchea Thmey Daily
0 Comments