ប្រទេសថៃ ៖ ពលករខ្មែរ ដែលគ្មានច្បាប់អនុញ្ញាត សរុបចំនួន២១នាក់ ត្រូវបានសមត្ថកិច្ចថៃ ឃាត់ខ្លួនដើម្បីប្រមូលផ្តុំយកទៅសាកសួរ បន្ទាប់ពីពួកគេទាំងអស់គ្នាខំប្រឹងធ្វើដំណើរតាមរយៈការដឹកនាំផ្លូវរបស់មេខ្យល់អស់រយៈពេលជាច្រើនថ្ងៃ ដោយកាត់ព្រៃ កាត់ភ្លៀង និងឆ្លងកាត់ជាច្រើនខេត្ត ទីបំផុតត្រូវបានមេខ្យល់នោះគេចខ្លួនបាត់ស្រមោល។
ការឃាត់ខ្លួនពលករខ្មែរទាំង២១នាក់នេះ បានធ្វើឡើងកាលនៅថ្ងៃទី២០ ខែកក្កដា ឆ្នាំ ២០១៨ វេលាម៉ោង ៧ និង ៣០ នាទី ព្រឹក នៅចំណុចក្នុងព្រៃមួយកន្លែង ក្នុងខេត្តឡាំភូន ប្រទេសថៃ ដោយពលករទាំងអស់ភាគច្រើនទៅពីខេត្តបាត់ដំបង និងខេត្តកំពង់ចាម។
តាមការរៀបរាប់ពីស្ត្រីខ្មែរម្នាក់ឈ្មោះ ម៉ៅ ណាត អាយុ៤០ឆ្នាំ រស់នៅក្នុងស្រុកបវេលខេត្តបាត់ដំបង បានអោយដឹងថា ពួកគេទាំងអស់គ្នា បានលួចឆ្លងដែនខុសច្បាប់នៅច្រករបៀង ក្នុងទឹកដីស្រុកកំរៀង ខេត្តបាត់ដំបង ដែលត្រូវបានមេខ្យល់នាំចូលទៅកាន់ ខេត្តច័ន្ទបុរី ប្រទេសថៃ ហើយក្នុងម្នាក់ៗត្រូវបង់អោយមេខ្យល់ចំនួន ៥ ០០០ បាត។
ពលកររូបនោះ បានបន្តថា ការលបចូលនេះ ត្រូវដើរកាត់អូរកាត់ព្រៃ បានដើរឆ្លងដែនចូលដល់ក្នុងទឹកដីថៃ ហើយក៏បានស្នាក់នៅក្នុងព្រៃអស់រយៈពេល៨ថ្ងៃ រួចបានធ្វើដំណើរទៅដល់ ខេត្តឈៀងរ៉ាយ ទើបសម្រាក ៣ថ្ងៃ រួចហើយបានធ្វើដំណីរទៅដល់ ខេត្តឡាំភូន បាន១យប់ ដល់ព្រឹកឡើងស្រាប់តែមេខ្យល់ដែលបាននាំផ្លូវ បានរត់គេចខ្លួនបាត់ ទើបត្រូវសមត្ថកិច្ចថៃចុះមកចាប់តែម្តង។
ពលករទាំងនោះមានឈ្មោះ ១. រ៉ងលីន ភេទស្រី អាយុ ២៥ឆ្នាំ នៅក្រចេះ ២. ម៉ៅ ណាត ភេទស្រី អាយុ ៤០ឆ្នាំ នៅប្រវេល ៣. ចាន់ រាប អាយុ១៩ឆ្នាំ នៅប្រវេល ៤. វៀប ចាន់ ភេទស្រី អាយុ ៣០ឆ្នាំ នៅកំពង់ចាម ៥. កៀប ភេទស្រី អាយុ ៣៧ឆ្នាំ នៅប្រវេល ៦. មុំ ភេទស្រី អាយុ ៣៣ឆ្នាំ នៅតាកែវ ៧. មិន ធី ភេទស្រី អាយុ ២៨ឆ្នាំ នៅបាត់ដំបង ៨. សៃ ភៀវ ភេទស្រី អាយុ ២២ឆ្នាំ នៅកំពង់ចាម ៩. រិម ណា ភេទស្រី អាយុ ២២ ឆ្នាំ នៅបាត់ដំបង ១០.ក្មេងស្រីឈ្មោះ មិន ត្រា អាយុ ២ឆ្នាំ មានឈ្មោះ មិនត្រា ១១. វង់ សុថេប ភេទប្រុស អាយុ ២៨ឆ្នាំ នៅកំពង់ចាម ១២. ផល សុផែ ភេទប្រុស អាយុ ឆ្នាំ នៅបាត់ដំបង ១៣. រី ចំរើន ភេទប្រុស អាយុ ៣២ឆ្នាំ នៅកំពង់ចាម ១៤. ចាប់ ធី ភេទប្រុស អាយុ ២៤ឆ្នាំ នៅកំពង់ចាម ១៥. សុវាន់ណា ភេទប្រុស អាយុ៤១ ឆ្នាំ នៅកំពង់ចាម ១៦. ឆេមនី ភេទប្រុស អាយុ ១៨ឆ្នាំ នៅកំពង់ចាម ១៧. ចោះ សំណាង ភេទប្រុស អាយុ ២៩ឆ្នាំ នៅ កំពង់ចាម ១៨. ធីប តូ ភេទប្រុស អាយុ ៣៥ ឆ្នាំ នៅស្តៅ ១៩.ទាប ភេទប្រុស អាយុ៤៤ឆ្នាំ នៅបាត់ដំបង ២០. ប្រុស ភេទប្រុស អាយុ ៣៨ឆ្នាំ នៅបាត់ដំបង និង ២១. ឈ្មោះ វី ភេទប្រុស អាយុ ៣២ឆ្នាំ នៅកំពង់ចាម។
បច្ចុប្បន្នពលករដែលឆ្លងដែនគ្មានច្បាប់ទាំងអស់ ត្រូវបានកម្លាំងតម្រួតថៃ នាំខ្លួនយកទៅកាន់អង្គភាពដើម្បីប្រគល់ទៅអោយការិយាល័យជំនាញ សាកសួរតាមនីតិវិធី៕
Source: Kampuchea Thmey Daily
0 Comments