ក្រុមឃ្លាំមើលមួយនិងប្រភពក្រុមប្រឆាំងបាននិយាយកាលពីថ្ងៃព្រហស្បតិ៍ថា ក្រុមឧទ្ទាមស៊ីរីបានយល់ព្រមប្រគល់តំបន់ដ៏រសើបមួយដែលមានព្រំប្រទល់ជាប់នឹងតំបន់ Golan Heights ដែលត្រូវបានកាត់យកដោយប្រទេសអ៊ីស្រាអ៊ែល។ នេះជាការអះអាងចុងក្រោយមួយនៅក្នុងកិច្ចព្រមព្រៀងជាច្រើនដែលពង្រីកការគ្រប់គ្រងរបស់រដ្ឋាភិបាលលើទឹកដីដ៏សំខាន់មួយនេះ។
កិច្ចព្រមព្រៀងនេះបានធ្វើឡើងបន្ទាប់ពីមានកិច្ចព្រមព្រៀងមួយទៀត ដែលអនុញ្ញាតឲ្យប្រជាពលរដ្ឋរាប់ពាន់នាក់ជម្លៀសនៅព្រឹកថ្ងៃព្រហស្បតិ៍ចេញពីទីប្រជុំជនគាំទ្ររដ្ឋាភិបាលចំនួនពីរនៅភាគខាងជើងប្រទេសស៊ីរីដែលត្រូវជាប់ក្នុងការឡោមព័ទ្ធដោយក្រុមឧទ្ទាមជាយូរមកហើយ។
កិច្ចព្រមព្រៀងទាំងពីរនេះដែលត្រូវបានចរចាដោយសម្ព័ន្ធមិត្តរបស់រដ្ឋាភិបាលគឺប្រទេសរុស្សីគឺនឹងត្រូវបានគេមើលឃើញថាជាជ័យជម្នះសម្រាប់លោកប្រធានាធិបតី Bashar al-Assad លើការបះបោររយៈពេលប្រាំពីរឆ្នាំដែលធ្លាប់គំរាមកំហែងដល់ការគ្រប់គ្រងរបស់គាត់។
ដោយមានអំណាចយោធាចម្រុះនិងការចុះចាញ់តាមកិច្ចចរចានោះ កងកម្លាំងរបស់គាត់នៅខែនេះបានដណ្តើមកាន់កាប់ជាង៩០ភាគរយនៃខេត្ត Daraa ដែលជាខេត្តភាគខាងត្បូងនិងជាកន្លែងការតវ៉ាប្រឆាំងរូបគាត់បានផ្ទុះឡើងជាលើកដំបូងក្នុងឆ្នាំ២០១១។
បន្ទាប់មកពួកគេបានចាប់ផ្តើមទម្លាក់គ្រាប់បែកយ៉ាងខ្លាំងទៅលើក្រុមឧទ្ទាមនៅខេត្ត Quneitra ដែលបានភ្ជាប់គ្នារវាងខេត្ត Daraa និងតំបន់ទ្រនាប់ជាមួយ Golan ដែលកាន់កាប់ដោយអ៊ីស្រាអែលនៅភាគខាងលិច។
អ្នកចរចារបស់ក្រុមប្រឆាំងនិងក្រុមឃ្លាំមើលមួយបានប្រាប់ AFP កាលពីថ្ងៃព្រហស្បតិ៍ថា ក្រោមសម្ពាធ, ពួកឧទ្ទាមបានយល់ព្រមប្រគល់ខេត្ត Quneitra និងតំបន់ទ្រនាប់ទៅឲ្យកងកម្លាំងរដ្ឋាភិបាល។
លោក Rami Abdel Rahman ប្រធានក្រុមឃ្លាំមើលសិទ្ធិមនុស្សស៊ីរីដែលជាក្រុមឃ្លាំមើលមួយមានមូលដ្ឋាននៅចក្រភពអង់គ្លេសបាននិយាយថា “កិច្ចព្រមព្រៀងនេះបានផ្តល់នូវបទឈប់បាញ់ ប្រគល់អាវុធធុនធ្ងន់និងធុនមធ្យមនិងការវិលត្រឡប់របស់ស្ថាប័នរដ្ឋាភិបាលទៅតំបន់នោះវិញ”។
លោកបានបន្ថែមថា កងកម្លាំងស៊ីរីនឹងកាន់កាប់ទឹកដីរបស់ក្រុមប្រឆាំងនៅក្នុងតំបន់ទ្រនាប់ហើយពួកឧទ្ទាមមួយចំនួននឹងត្រូវគេដឹកតាមឡានក្រុងទៅកាន់ទឹកដីរបស់ក្រុមប្រឆាំងនៅភាគខាងជើងប្រទេសស៊ីរី។
យោងតាមក្រុមឃ្លាំមើលបានឲ្យដឹងថា កិច្ចព្រមព្រៀងនេះមិនរាប់បញ្ចូលក្រុម Hayat Tahrir al-Sham ដែលជាសម្ព័ន្ធភាពដឹកនាំដោយពួកជីហាដដែលបានកាន់កាប់ដែនដីនៅជាប់នឹងខេត្ត Quneitra និង Daraa នោះទេ៕ AFP
Source: Kampuchea Thmey Daily
0 Comments