ភ្នំពេញ ៖ សម្ភារៈអេឡិចត្រូនិក និង IT ដែលមានតម្លៃសរុបចំនួន៥០០.០០០ RMB ប្រហែល៧៥.៥៨៥ ដុល្លារអាមេរិក ដែលជាអំណោយដ៏ថ្លៃថ្លារបស់សាធារណរដ្ឋប្រជាមានិតចិន ត្រូវបានប្រគល់ជូនដល់វិទ្យាស្ថានជាតិការទូត និងទំនាក់ទំនងអន្តរជាតិ កាលពីព្រឹកថ្ងៃទី២៤ ខែកក្កដា ឆ្នាំ២០១៨ នៅក្រសួងការបរទេស ក្រោមអធិបតីភាពលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា ព្រមទាំងមានការចូលរួមជាកិត្តិយសពីលោក Xiong Bo ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំប្រទេសកម្ពុជា ជាតំណាងរបស់ភាគីចិន ជាអ្នកប្រគល់ជំនួយជាសម្ភារៈទាំងអស់នេះ។
លោក ឈីវ យីស៊ាង អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា និងជាវិទ្យាស្ថានជាតិការទូត និងទំនាក់ទំនងអន្តរជាតិ បានថ្លែងថា ការប្រគល់សម្ភារៈនេះ ធ្វើឡើងតាមសំណើរបស់វិទ្យាស្ថាន ដែលបានស្នើទៅស្ថានទូតចិន ដើម្បីជួយសម្រួលដល់ដំណើរការរបស់វិទ្យាស្ថាន និងការរៀបចំវគ្គបណ្តុះបណ្តាលមន្ត្រីការទូត និងក្រសួងស្ថាប័នពាក់ព័ន្ធរបស់កម្ពុជា បន្ទាប់ពីវិទ្យាស្ថានត្រូវបានដាក់សម្ពោធជាផ្លូវការក្រោមអធិបតីភាពដ៏ខ្ពង់ខ្ពស់របស់លោកទេសរដ្ឋមន្ត្រី ប្រាក់ សុខុន កាលពីថ្ងៃទី២២ ខែកុម្ភៈ ឆ្នាំ២០១៨ កន្លងទៅ។
លោកបន្តថា អំណោយរបស់ប្រទេសចិននៅពេលនេះ បានចូលរួមចំណែកដល់ការធ្វើឲ្យគំនិតផ្ដួចផ្ដើមរបស់លោកទេសរដ្ឋមន្ត្រី មានចីរភាព និងពង្រឹងសមត្ថភាពដំណើរការរបស់វិទ្យាស្ថាន ហើយការគាំទ្ររបស់ប្រទេសចិន បានឆ្លើយតបទៅនឹងតម្រូវការរបស់វិទ្យាស្ថានក្នុងការពង្រឹងសមត្ថភាពអ្នកការទូតអាជីពរបស់កម្ពុជា លើផ្នែក ICT, Digital Economy និងការទូត ព្រមទាំងអនុញ្ញាតឲ្យវិទ្យាស្ថានពង្រឹងសកម្មភាពទំនាក់ទំនងសាធារណៈ និងសកម្មភាពបណ្ដុះបណ្ដាលស្ដីពី Communication Skill (បំនិនខាងគមនាគមន៍) ការថ្លែងជាសាធារណៈ និងភាសាបរទេស។
តាមលោក ឈីវ យីស៊ាង អំណោយរបស់ប្រទេសចិននេះ គឺជាសក្ខីភាពនៃការគាំទ្ររបស់ប្រទេសចិន នៅក្នុងការអភិវឌ្ឍសង្គម សេដ្ឋកិច្ចរបស់កម្ពុជា ជាពិសេសការអភិវឌ្ឍផ្នែកធនធានមនុស្ស និងហេដ្ឋារចនាសម្ព័ន្ធ។ ការគាំទ្រនេះ ចូលរួមចំណែកក្នុងការប្រារព្ធខួបលើកទី៦០ឆ្នាំនៃការបង្កើតទំនាក់ទំនងការទូតកម្ពុជា-ចិននៅឆ្នាំ២០១៨នេះ។
គួររំលឹកថា បន្ទាប់ពីលោកទេសរដ្ឋមន្ត្រី ប្រាក់ សុខុន បានចូលកាន់តំណែងជារដ្ឋមន្ត្រីក្រសួងការបរទេស កាលពីខែមេសា ឆ្នាំ២០១៦ លោកទេសរដ្ឋមន្ត្រី បានផ្តួចផ្តើមគំនិតឲ្យមានការបង្កើតវិទ្យាស្ថានបណ្តុះបណ្តាលអ្នកការទូតនេះឡើង។ គំនិតផ្តួចផ្តើមនេះ ត្រូវបានអនុម័តដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោកបន្តថា ការបង្កើតវិទ្យាស្ថាននេះ គឺជាផ្នែកដ៏សំខាន់នៃការធ្វើការកែទម្រង់ផ្ទៃក្នុងក្រសួងការបរទេស ក្នុងនោះមានការកែសម្រួលរចនាសម្ព័ន្ធគ្រប់គ្រងរបស់ក្រសួងឡើងវិញ ដើម្បីឲ្យក្រសួងអាចឆ្លើយតបទៅនឹងការត្រៀមលក្ខណៈសម្បត្តិថ្មីរបស់រាជរដ្ឋាភិបាលកម្ពុជា លើវិស័យការបរទេស ដែលមានការប្រែប្រួលឥតឈប់ឈរ និងមិនអាចប្រមើលមើលជាមុនបាន ទាំងក្នុងតំបន់ និងពិភពលោក ហើយវិទ្យាស្ថាននេះ គឺជាស្ថាប័នបណ្តុះបណ្ដាលអ្នកការទូតដំបូងគេនៅក្នុងប្រវត្តិវិស័យការទូតរបស់ប្រទេសកម្ពុជា ហើយដែលត្រូវបានដាក់ឲ្យដំណើរការក្នុងរយៈពេលតែពីរឆ្នាំប៉ុណ្ណោះ។
គោលបំណងសំខាន់របស់វិទ្យាស្ថាន គឺកសាងសមត្ថភាពវិជ្ជាជីវៈក្នុងជួរមន្ត្រីការទូតកម្ពុជាឲ្យក្លាយជាយុទ្ធជនដ៏មុតស្រួច ដើម្បីឆ្លើយតបទៅនឹងតម្រូវការនៃការងារការទូតពិភពលោក ដែលមានលក្ខណៈកាន់តែស្មុគស្មាញឡើង ជាពិសេសដើម្បីលើកកម្ពស់ភាពជាម្ចាស់ការនិងតួនាទីដ៏សំខាន់និងសកម្មរបស់កម្ពុជាក្នុងកិច្ចការតំបន់ និងពិភពលោក ដើម្បីបម្រើផលប្រយោជន៍ជាតិ ប្រជាជន និងកិត្យានុភាពជាតិ ដើម្បីឲ្យបានស្មើភាព និងស្មើសិទ្ធិនៅលើវេទិកាអន្តរជាតិ៕
Source: Kampuchea Thmey Daily
0 Comments