ប្រធានាធិបតីអាមេរិកលោក Donald Trump កាលពីថ្ងៃពុធ បានពន្យារពេលកិច្ចប្រជុំកំពូលលើកទី២ជាមួយលោក Vladimir Putin របស់ប្រទេសរុស្ស៊ី ខណៈដែលអ្នកការទូតជាន់ខ្ពស់របស់គាត់បានការពារគាត់អំពីឥរិយាបថរបស់គាត់បន្ទាប់ពីជំនួបដ៏ចម្រូងចម្រាសរបស់មេដឹកនាំទាំងពីរនៅក្នុងទីក្រុងហេលស៊ីនគី។
ខណៈពេលប្រឈមមុខនឹងការអំពាវនាវឲ្យបញ្ចេញព័ត៌មានលម្អិតអំពីកិច្ចពិភាក្សាបិទទ្វារបស់លោក Trump ជាមួយលោក Putin, រដ្ឋបាលអាមេរិកបានបង្កើនប្រតិបត្តិការគ្រប់គ្រងការខូចខាតរបស់ខ្លួនដោយរដ្ឋមន្ត្រីក្រសួងការបរទេសលោក Mike Pompeo នឹងបង្ហាញខ្លួននៅចំពោះមុខសភាដើម្បីនិយាយការពារមេរបស់គាត់។
យោងតាមទីប្រឹក្សាសន្តិសុខជាតិលោក John Bolton បានឲ្យដឹងថា បន្ទាប់ពីរងការរិះគន់អំពីផែនការអញ្ជើញលោក Putin មកកាន់សេតវិមាននារដូវស្លឹកឈើជ្រុះ, លោកប្រធានាធិបតីខ្លូនឯងបានសម្រេចចិត្តពន្យារពេលរហូតដល់ឆ្នាំ២០១៩នៅពេលដែលលោក Robert Mueller បញ្ចប់ការស៊ើបអង្កេតរបស់គាត់ចូលក្នុងការជ្រៀតជ្រែករបស់ក្រុងមូស្គូក្នុងការបោះឆ្នោត។
លោក Pompeo បាននិយាយថា គាត់នឹងគាំទ្រកិច្ចខិតខំប្រឹងប្រែងរបស់គណបក្សទាំងពីរនៅក្នុងសភាដើម្បីដាក់ទណ្ឌកម្មថ្មីលើប្រទេសរុស្ស៊ីក្នុងការឆ្លើយតបចំពោះការជ្រៀតជ្រែករបស់ពួកគេនៅក្នុងការបោះឆ្នោតអាមេរិកឆ្នាំ២០១៦និងជាការរារាំងមិនឲ្យចូលជ្រៀតជ្រែកក្នុងឆ្នាំនេះឬនៅឆ្នាំ២០២០។
លោកបានថ្លែងនៅក្នុងសេចក្តីថ្លែងការណ៍បើករបស់គាត់ថា “ខ្ញុំសូមបញ្ជាក់ឲ្យរុស្ស៊ីដឹងច្បាស់ថា ពួកគេនឹងមានផលវិបាកធ្ងន់ធ្ងរចំពោះការជ្រៀតជ្រែកក្នុងដំណើរការប្រជាធិបតេយ្យរបស់យើង”។ ប៉ុន្តែលោក Pompeo នៅតែមិនច្បាស់អំពីសំណួរធំបំផុតដែលគេចោទសួរថា តើអ្វីដែលបានកើតឡើងនៅក្នុងកិច្ចប្រជុំជាលក្ខណៈឯកជនរវាងលោក Trump និងលោក Putin?
ចំណែកពាក់ព័ន្ធបញ្ហាប្រទេសកូរ៉េខាងជើងវិញ លោក Pompeo ក៏បានបង្ហាញជំហរយ៉ាងម៉ឺងម៉ាត់ផងដែរដោយព្រមានថា ក្រុងវ៉ាស៊ីនតោនមិនអនុញ្ញាតឲ្យការចរចានុយក្លេអ៊ែរបន្តដោយគ្មានជោគជ័យនោះទេស្របពេលមានការរិះគន់ថា ជំនួបកំពូលរបស់លោក Trump នៅប្រទេសសិង្ហបុរីកាលពីមិថុនាជាមួយលោកគីមជុងអ៊ុនបានផ្តល់លទ្ធផលតិចតួចគិតមកទល់ពេលនេះ។
សមាជិកសភានិងសម្ព័ន្ធមិត្តរបស់អាមេរិកនៅជុំវិញពិភពលោកមានបំណងចង់ដឹងពីព័ត៌មានលម្អិតនៃកិច្ចប្រជុំរបស់លោក Trump កាលពីថ្ងៃទី១៦ខែកក្កដាជាមួយនឹងលោក Putin រួមទាំងថាតើលោក Trump បានធ្វើការសន្យាជាសម្ងាត់ណាមួយដល់លោក Putin ឬកិច្ចព្រមព្រៀងពាក្យសំដីដែរឬក៏អត់ផងដែរ៕ AFP
Source: Kampuchea Thmey Daily
0 Comments