រដ្ឋមន្ត្រីការបរទេស​កម្ពុជា នឹង​ដឹកនាំ​គណៈប្រតិភូ​ទៅ​បំពេញ​ទស្សនកិច្ច​ផ្លូវការ​នៅ​សាធារណរដ្ឋ​សិង្ហ​បុរី រយៈពេល​៣​ថ្ងៃ

ភ្នំពេញ​ ៖ លោក​ទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និង​សហប្រតិបត្តិការ​អន្តរជាតិ នៃ​ព្រះរាជាណាចក្រ​កម្ពុជា នឹង​ដឹកនាំ​គណៈប្រតិភូ​អញ្ជើញ​ទៅ​បំពេញ​ទស្សនកិច្ច​ផ្លូវការ​នៅ​សាធារណរដ្ឋ​សិង្ហ​បុរី ពីថ្ងៃ​ទី​២៩ ដល់​ថ្ងៃទី​៣១ ខែសីហា ឆ្នាំ​២០១៨ តប​តាម​ការអញ្ជើញ​របស់ លោក​បណ្ឌិត វី​វៀន បា​ឡាក់​គ្រី​ស្ហ្ស​ណាន់ (Vivian Balakrishnan) រដ្ឋមន្ត្រីការបរទេស​នៃ​សាធារណរដ្ឋ​សិង្ហ​បុរី​។

តាម​សេចក្តីប្រកាស​ព័ត៌មាន​របស់​ក្រសួងការបរទេស ចុះ​ថ្ងៃទី​២៧ ខែសីហា ឆ្នាំ​២០១៨ បាន​ឲ្យ​ដឹងថា ក្នុងអំឡុងពេល​ដំណើរ​ទស្សនកិច្ច​នេះ លោក​ទេសរដ្ឋមន្ត្រី ប្រាក់ សុខុន នឹង​ជួប​សម្តែង​ការគួរសម​ជាមួយ​លោក លី សៀន លុង (Lee Hsien Loong) នាយករដ្ឋមន្ត្រី​នៃ​សាធារណរដ្ឋ​សិង្ហ​បុរី ហើយ​លោក​ទេសរដ្ឋមន្ត្រី ប្រាក់ សុខុន នឹង​ជួបប្រជុំ​ទ្វេភាគី​ជាមួយ​លោក​បណ្ឌិត វី​វៀន បា​ឡាក់​គ្រី​ស្ហ្ស​ណាន់ ដោយ​ពិភាក្សា​អំពី​វិស័យ​ជាច្រើន​នៃ​កិច្ចសហប្រតិបត្តិការ​ទ្វេភាគី និង​ផ្លាស់ប្តូរ​យោបល់​ផងដែរ អំពី​បញ្ហា​តំបន់ និង​អន្តរជាតិ ដែលមាន​ការចាប់អារម្មណ៍​ដូចគ្នា​។

ដំណើរ​ទស្សនកិច្ច​ផ្លូវការ​របស់លោក​ទេសរដ្ឋមន្ត្រី ប្រាក់ សុខុន មាន​គោលបំណង​ពង្រឹង​បន្ថែមទៀត​នូវ​ចំណងទាក់ទង​ទ្វេភាគី និង​រិះរក​វិស័យ​ថ្មីៗ​ទៀត ដើម្បី​ធ្វើ​កិច្ចសហប្រតិបត្តិការ​សំដៅ​នាំមក​នូវ​ផលប្រយោជន៍​ទៅវិញទៅមក សម្រាប់​ប្រជាជាតិ​ទាំងពីរ​៕

Source: Kampuchea Thmey Daily