ភ្នំពេញ ៖ សមត្ថកិច្ចនគរបាលខណ្ឌសែនសុខ បានចាប់ខ្លួនបក្ខពួកក្រុមចោរឆក់ទ្រព្យសម្បត្តិគេបានម្នាក់ ខណៈដែលពួកគេកំពុងធ្វើសកម្មភាពឆក់កាបូបលុយពីស្ត្រីម្នាក់ កាលពីរសៀលថ្ងៃទី២៤ ខែសីហា ឆ្នាំ២០១៨ នៅតាមបណ្តោយផ្លូវសាធារណៈមួយស្ថិតក្នុងសង្កាត់ភ្នំពេញថ្មី ខណ្ឌសែនសុខ។
ប៉ូលិសបានឲ្យដឹងថា ជនសង្ស័យជាចោរខាងលើឈ្មោះជា វណ្ណដា ហៅ នាងវណ្ណដា ភេទប្រុស អាយុ១៨ឆ្នាំ គ្មានមុខរបរ មានទីលំនៅផ្ទះសង់ថ្មី ភូមិរោងចក្រ សង្កាត់គោកឃ្លាង ខណ្ឌសែនសុខ។
តាមចម្លើយសារភាពរបស់ជនល្មើសខាងបានអះអាងថា នៅក្នុងពេលធ្វើសកម្មភាពឆក់កាបូបលុយគេនេះ ខ្លួនមានបក្ខពួកចំនួន២នាក់ផ្សេងទៀត គឺឈ្មោះ ហែមសុគន្ធ និងឈ្មោះ ត្រេន ដែលបានជិះម៉ូតូគេចខ្លួនបាត់ក្នុងពេលនេះដែរ ជិះម៉ូតូ២គ្រឿង ម៉ាកស្កូពី និងម៉ាកសង់ (ហុងដាឌ្រីម សេ១២៥)។
ជនរងគ្រោះ ក្នុងករណីនេះឈ្មោះ ម៉េង ម៉ាឡន ភេទស្រីអាយុ៣៨ឆ្នាំ មុខរបរលក់ដូរ មានទីលំនៅក្បែរកើតហេតុខាងលើ(ផ្លូវលេខ១០១១កែងផ្លូវលេខ ១៩៧៨)។
ប៉ូលិសនិយាយថា នៅពេលកើតហេតុ ខាងកងកម្លាំងយាមល្បាតក្នុងភូមិសាស្ត្រមកដល់ចំណុចកើតហេតុខាងលើបានប្រទះឃើញក្រុមជនល្មើសមានគ្នា៣នាក់ ជិះម៉ូតូ២គ្រឿងមកឆក់កាបូបលុយពីស្ត្រីរងគ្រោះម្នាក់ខាងលើ បណ្តាលឲ្យជនរងគ្រោះដួលរបួសរលាត់ក្បាលជង្គង់និងដៃ តែយកកាបូបលុយមិនបានទេដោយគ្រាន់តែដាច់កាបូបជនរងគ្រោះ ហើយជនល្មើសបានធ្លាក់ពីលើម៉ូតូឃាត់ខ្លួនបានភ្លាមៗ តែបក្ខពួករបស់គេ២នាក់ទៀតគេចខ្លួន។
អំពើឆក់ទ្រព្យសម្បត្តិអ្នកដំណើរតាមម៉ូតូត្រូវសមត្ថកិច្ច សម្រេចបង្កើនទោសទណ្ឌទៅលើអ្នកប្រព្រឹត្តបទល្មើសករណីនេះ ចោទពីបទ "មនុស្សឃាតដោយចេតនា " ដែលជាទោស ឧក្រិដ្ឋ ស្មើនឹងទោសដែលបានសម្លាប់មនុស្សដោយចេតនា ព្រោះតែ មានជនរងគ្រោះជាម្ចាស់ទ្រព្យសម្បត្តិ ជាច្រើនបានស្លាប់ដោយដួលបោកធ្លាក់ក្បាលពីម៉ូតូ ខ្លះស្លាប់ភ្លាមៗនិងខ្លះទៀតស្លាប់នៅពេលសម្រាកនៅមន្ទីរពេទ្យបានមួយរយៈខ្លី៕
Source: Kampuchea Thmey Daily
0 Comments