ភ្ញៀវ​ទេសចរ​ជាង​២,០០០​នាក់ ​ត្រូវ​ជម្លៀស​ចេញ​ បន្ទាប់ពី​ការ​រញ្ជួយ​ដី​នៅ​ឥណ្ឌូនេស៊ី​សម្លាប់​មនុស្ស​៩៨​នាក់

ប្រទេស​ឥណ្ឌូនេស៊ី​កាលពី​ថ្ងៃ​ចន្ទ​បាន​បញ្ជូន​អ្នក​ជួយសង្គ្រោះ​ជាច្រើន​នាក់​ទៅ​កោះ Lombok និង​បាន​ជម្លៀស​អ្នកទេសចរ​ជាង​២,០០០​នាក់​បន្ទាប់ពី​ការរញ្ជួយ​ដី​ដ៏​ខ្លាំង​មួយ​បានសម្លាប់​មនុស្ស​យ៉ាងតិច​៩៨​នាក់​និង​បាន​បំផ្លិចបំផ្លាញ​អគារ​រាប់ពាន់​ខ្នង។

ការរញ្ជួយ​ដី​កម្រិត​៦.៩​រ៉ិ​ច​ទ័​របា​នប​ង្ក​ឲ្យ​មានការ​ភ័យខ្លាច​ក្នុងចំណោម​ភ្ញៀវទេសចរ​និង​អ្នកស្រុក​ក្នុង​រយៈពេល​ត្រឹម​តែមួយ​សប្តាហ៍​ប៉ុណ្ណោះ​បន្ទាប់ពី​ការរញ្ជួយ​ដី​មួយទៀត​បាន​វាយប្រហារ​កោះ Lombok ដោយបាន​សម្លាប់​មនុស្ស​ចំនួន​១៧​នាក់​។​
​
កាលពី​ថ្ងៃ​ចន្ទ ក្រុម​អ្នក​ជួយសង្គ្រោះ​បាន​ស្វែងរក​អ្នក​រស់រានមានជីវិត​នៅក្នុង​គំនរ​បាក់បែក​នៃ​លំនៅដ្ឋាន វិហារ​ឥស្លាម​និង​សាលារៀន​ដែល​ត្រូវបាន​បំផ្លាញ​នៅក្នុង​គ្រោះមហន្តរាយ​ចុងក្រោយ​បំផុត​កាលពី​ល្ងាច​ថ្ងៃអាទិត្យ​។​
​
អ្នកនាំពាក្យ​ទីភ្នាក់ងារ​គ្រោះមហន្តរាយ​ជាតិ​លោក Sutopo Purwo Nugroho បាន​និយាយថា មានការ​ភ័យខ្លាច​ថា មនុស្ស​ជាច្រើន​ត្រូវ​ជាប់​នៅក្នុង​សំណង់​បាក់បែក​នៃ​វិហារ​ឥស្លាម​មួយ​ដែល​បាក់​នៅក្នុង​ភូមិ Lading-Lading ភាគ​ខាងជើង​។​
​
កង្វះ​គ្រឿង​បរិក្ខារ​ធុន​ធ្ងន់​និង​ផ្លូវថ្នល់​ដែល​ខូចខាត​កំពុង​រារាំង​ដល់​កិច្ចខិតខំ​ប្រឹងប្រែង​ដើម្បី​ជួយ​ជនរងគ្រោះ​នៅ​តំបន់ភ្នំ​ភាគ​ខាងជើង​និង​ភាគ​ខាងកើត​នៃ​កោះ​នេះ​ដែល​រង​ការវាយប្រហារ​ខ្លាំង​បំផុត។

លោក Najmul Akhyar ចៅហ្វាយស្រុក North Lombok បាន​ប៉ាន់ប្រមាណ​ថា ៨០​ភាគរយ​នៃ​តំបន់​នោះ​ត្រូវបាន​បំផ្លាញ​ដោយ​ការរញ្ជួយ​ដី​។​

គាត់ Nugroho និយាយថា មនុស្ស​រហូតដល់​ទៅ​២០,០០០​នាក់​ប្រហែលជា​បោះបង់​ចោលផ្ទះ​របស់​ពួកគេ​នៅ​កោះ Lombok ហើយ​គ្រូពេទ្យ ស្បៀងអាហារ​និង​ថ្នាំពេទ្យ​គឺ​ត្រូវការ​ជា​ចាំបាច់​។​

អ្នកនាំពាក្យ​រូបនេះ​បាន​និយាយថា ក្រុម​អ្នកស្វែងរក​និង​ជួយសង្គ្រោះ​ក៏បាន​ជួយសង្គ្រោះ​អ្នកទេសចរ​ពី​២,០០០​ទៅ​២,៧០០​នាក់​ចេញពី​កោះ Gili នៃ​ភាគ​ខាងជើង​កោះ Lombok ផងដែរ​។​

គួរបញ្ជាក់​ជាថ្មី​ថា ប្រទេស​ឥណ្ឌូនេស៊ី​ដែលជា​ប្រជាជាតិ​ងាយ​រងគ្រោះ​នឹង​គ្រោះមហន្តរាយ​បំផុត​នៅលើ​ផែនដី​គឺមាន​ទីតាំង​ស្ថិតនៅលើ​ខ្សែក្រវ៉ាត់​ភ្នំភ្លើង “Ring of Fire” ប៉ាស៊ីហ្វិក​ដែលជា​កន្លែង​ផ្ទាំង tectonic បុក​គ្នា​ហើយ​ការផ្ទុះ​ភ្នំភ្លើង​និង​ការរញ្ជួយ​ដី​ជាច្រើន​នៅលើ​ពិភពលោក​កើតឡើង​។​

កាលពី​ឆ្នាំ​២០០៤ រលក​យក្ស​ស៊ូណាមិ​ដែល​បង្កឡើង​ដោយ​ការរញ្ជួយ​ដី​ក្រោម​សមុទ្រ​កម្រិត ៩.៣​រ៉ិ​ច​ទ័​រលើ​ឆ្នេរសមុទ្រ​កោះ​ស៊ូ​ម៉ា​ត្រា​ភាគ​ខាងលិច​ប្រទេស​ឥណ្ឌូនេស៊ី​បានសម្លាប់​មនុស្ស ២២០,០០០​នាក់​នៅតាម​បណ្តា​ប្រទេស​ជុំវិញ​មហាសមុទ្រ​ឥណ្ឌា​រួមទាំង​១៦៨,០០០​នាក់​នៅក្នុង​ប្រទេស​ឥណ្ឌូនេស៊ី​ផងដែរ​៕ AFP

​

Source: Kampuchea Thmey Daily