ភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី០៦ ខែសីហា ឆ្នាំ២០១៨បានសម្រេចចេញដីកាឃុំខ្លួនប្រធានអង្គLCDI ម្នាក់ និង អាជីវករម្នាក់ ដាក់ពន្ធនាគារPJជាបណ្ដោះអាសន្ន ក្រោមការចោទប្រកាន់ពីបទ.ប៉ុនប៉ងឆបោក និង បទ.ប្រើប្រាស់ឯកសារសាធារណៈក្លែង ប្រព្រឹត្តនៅហាងកាហ្វេអ៊ិនថៈនីន ផ្លូវ៣៦០ សង្កាត់បឹងកេងកង១ ខណ្ឌចំការមន កាលពីថ្ងៃទី៣១ ខែកក្កដា ឆ្នាំ២០១៨ តាមមាត្រា៣៧៧ មាត្រា៣៧៨ និង មាត្រា៦៣០ នៃក្រមព្រហ្មទណ្ឌ។
ដីកាសម្រេចឲ្យឃុំខ្លួនឈ្មោះ គឹម គន្ធា ហៅ ធា ភេទប្រុស អាយុ៣៩ឆ្នាំ មុខរបបជាប្រធានអង្គការ LCDI មានស្រុកកំណើតខេត្តកំពត និង សព្វថ្ងៃស្នាក់នៅផ្ទះលេខ៦អឺហ្សិត ផ្លូវលេខ៩ សង្កាត់ទន្លេបាសាក់ខណ្ឌចំការមន និង ឈ្មោះ គួយ ភារម្យ ហៅ វង្ស រ៉ាយុត ហៅ ខេម ភេទប្រុស អាយុ២៩ឆ្នាំ មុខរបបលក់ដូរ មានស្រុកកំណើតនៅខេត្តតាកែវ និង ស្នាក់នៅជាមួយឈ្មោះ គឹម គន្ធ ដែរ។
ជនសង្ស័យទាំង២នាក់ត្រូវបានសមត្ថកិច្ចការិយាល័យបទល្មើសព្រហ្មទណ្ឌ នៃកងរាជអាវុធហត្ថរាជធានីភ្នំពេញ ធ្វើការឃាត់ខ្លួន កាលពីវេលាម៉ោង៥ល្ងាចថ្ងៃទី៣១ ខែកក្កដា ឆ្នាំ២០១៨ តាមពាក្យបណ្តឹងរបស់ឈ្មោះ ចាំង សុផាត ភេទប្រុស អាយុ៤១ឆ្នាំ មុខរបបជាមន្ត្រីនគរបាលជាតិ មានទីលំនៅភូមិ៥ សង្កាត់ទំនប់ទឹក ខណ្ឌចំការមន។
ទាក់ទិន នឹង ការឃុំខ្លួនជនសង្ស័យ២នាក់ខាងលើនេះ ត្រូវបានសមត្ថកិច្ចបង្ហើបឲ្យដឹងថា កាលពីថ្ងៃទី២៥ កក្កដា ការិយាល័យបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានទទួលពាក្យបណ្តឹងជនរងគ្រោះឈ្មោះ ចាំង សុផាត ដែលបានប្តឹងទៅលើជនសង្ស័យ ២នាក់នោះ ពីបទ.ឆបោកជាប្រពន្ធ និង ប្រើប្រាស់ឯកសារសាធារណៈក្លែង។ តាមពាក្យបណ្តឹងរបស់ជនរងគ្រោះបានបញ្ជាក់ថា នោក្នុងអំឡុងខែកក្កដា ២០១៨ គឺជនសង្ស័យ២នាក់ បានយកប្លង់ដីមួយកន្លែងនៅសង្កាត់ព្រៃស ខណ្ឌដង្កោ រាជធានីភ្នំពេញ ដែលមានចំនួន១ហិតាកន្លះ ដែលសុទ្ធសឹងជាឯកសារក្លែង បំណងយកទៅដាក់បញ្ចាំឲ្យខ្លួន លើទឹកប្រាក់ចំនួន៥០ម៉ឺនដុល្លារអាមេរិក។ ប៉ុន្តែក្រោយមកជនសង្ស័យ និង ដើមបណ្តឹងបានជួបចរចាត្រូវរ៉ូវគ្នា នៅត្រឹម៣០ម៉ឺនដុល្លារទេ ហើយបានណាត់គ្នាប្រគល់ប្រាក់។ លុះពេលកំពុងរាប់លុយនៅហាងកាហ្វេមួយក្នុងខណ្ឌទួលគោក ក៏ស្រាប់តែកម្លាំងសមត្ថកិច្ចឃាត់ខ្លួន ជនសង្ស័យទាំងពីរនាក់នោះ ដោយពិនិត្យលើឯកសារសុទ្ធតែក្លែងក្លាយទាំងអស់។
ក្រោយពីឃាត់ខ្លួនជនសង្ស័យបានសារភាព ដោយមានភាពស៊ីសង្វាក់គ្នា ទៅនឹងពាក្យបណ្តឹង ដូច្នោះសមត្ថកិច្ចបានកសាងសំណុំរឿងបញ្ជូនជនសង្ស័យទៅកាន់សាលាដំបូងរាជាធានីភ្នំពេញប្រគល់អោយអយ្យការអមតុលាការធ្វើការចោទប្រកាន់ ហើយចៅក្រមស៊ើបសួរបានសម្រេចចេញដីកាឃុំខ្លួនជនត្រូវចោទដាក់ពន្ធនាគារជាបណ្ដោះអាសន្នដើម្បីធ្វើការអង្កេតតាមនីតិវិធី៕
Source: Kampuchea Thmey Daily
0 Comments