បាត់ដំបង ៖ អគ្គិភ័យមួយបានលេបត្របាក់តូបមួយចំនួន ក្នុងផ្សារថៃ ដែលស្ថិតនៅជាប់ នឹងព្រំប្រទល់ ខេត្តបាត់ដំបង ដោយបានបំផ្លាញទ្រព្យសម្បត្តិរបស់អាជីវករខ្មែរជិត ១ លាន បាតដែលទំនងមកពីការឆ្លងចរន្តអគ្គិសនី បន្ទាប់ពីមានការឆេះផ្សាររោងក្លឿ ក្នុងស្រុកអារញ្ញរួចមក។
ហេតុការណ៍នេះ បានកើតឡើង នា ថ្ងៃទី២១ ខែសីហា ឆ្នាំ២០១៨ វេលាម៉ោង ១១និង ៣០ នាទី ថ្ងៃត្រង់ នៅក្នុងចំណុចក្នុងផ្សារ ស៊ីភេន ជាប់នឹងច្រកទ្វារអន្តរជាតិខៅឌិន ក្នុងស្រុកខ្លងហាត ខេត្តស្រះកែវ ប្រទេសថៃ ដែលស្ថិតនៅតាមបណ្តោយខ្សែបន្ទាត់ព្រំដែនត្រង់ស្រុកសំពៅលូន ខេត្តបាត់ដំបង។
អគ្គិភ័យដែលបានឆាបឆេះឡើងនេះ បានបំផ្លាញតូបអាជីវកររបស់ខ្មែរដែលជួលថៃលក់ទំនិញផ្សេងៗអស់ចំនួន ៦ តូប ដែលគេកំពុងសង្ស័យថា អាចបណ្តាលមកពីការឆ្លងចរន្តអគ្គិសនី ដោយនៅពេលនោះដែរ រថយន្តពន្លត់អគ្គិភ័យរបស់ភាគីថៃ បានសម្រុកជួយបាញ់ទប់ស្កាត់នូវការរាលដាល រហូតស្ងប់ទៅវិញ។
ការឆាបឆេះនេះដែរ ក៏បានបំផ្លាញនូវទំនិញរបស់ ប្រជាពលរដ្ឋខ្មែរម្នាក់ ឈ្មោះ ង៉ែត ចំរើន ភេទប្រុស អាយុ ២៨ឆ្នាំ រស់នៅ ភូមិឈើទាល ឃុំសិរីមានជ័យ ស្រុកសំពៅលូន ខេត្ត បាត់ដំបង ដែលទំនិញក្នុងនោះភាគច្រើនគឺជាអីវ៉ាន់ចាប់ហួយ និងគ្រឿងទេស បើសរុបជាទឹកប្រាក់ ប្រហែល ៨ សែន បាត។
គួរបញ្ជាក់ដែរថា ការឆាបឆេះនេះ គឺបានកើតឡើងបន្ទាប់ពីមានការឆាបឆេះនៅក្នុងផ្សាររោងក្លឿ ដែលស្ថិតក្នុងស្រុកអារញ្ញប្រាថេត ខេត្តស្រះកែវដូចគ្នា ដែលក្នុងនោះដែរទំនិញរបស់អាជីវករខ្មែរ ត្រូវបានបំផ្លាញដោយអគ្គិភ័យយ៉ាងច្រើនសន្ធឹកសន្ធាប់ផងដែរ ដែលបញ្ហានេះ គឺប្រភពនានាបានលើកឡើងថា អាចបណ្តាលមកពីការទុស្សេចរន្ត៕
Source: Kampuchea Thmey Daily
0 Comments