Friday, January 9, 2015

ការនាំចេញ​របស់​ថៃ​ទៅ​សហភាព​អឺរ៉ុប​ជួប​ការ​តានតឹង

សារព័ត៌មាន​តំបន់​ឲ្យដឹងថា​ ការនាំចេញ​របស់​ប្រទេស​ថៃ ទៅ​សហភាព​អឺរ៉ុប អាច​នឹង​រួញ​តូច​នៅ​ឆ្នាំនេះ ដោយសារតែ​ការបន្ត​មានការ​លំបាក​ខាង​សេដ្ឋកិច្ច​បន្តទៀត (តាម​ការ​អះអាង​របស់ មជ្ឈមណ្ឌល​ស្រាវជ្រាវ​កសិករ​ថៃ)។ ឱកាស​នៃ​ការ​ងើបឡើង​ខាង​សេដ្ឋកិច្ច​របស់​សហភាព​អឺរ៉ុប​ភ្លាមៗ មាន​តិចតួច ដោយ​មជ្ឈមណ្ឌល​អះអាង​ថា ប្រាក់​បាត​ឡើងថ្លៃ​ធៀប​នឹង​ប្រាក់​អឺរ៉ូ ប្រមាណ ១៥,៣% តាំងពី​ដើមឆ្នាំ ២០១៤ និង​បាត់បង់​ការប្រកួតប្រជែង​ជាមួយនឹង​ប្រាក់​ដុង របស់​វៀតណាម និង​ប្រាក់​រូពី របស់​ឥណ្ឌូណេស៊ី​។ សហភាព​អឺរ៉ុប ក៏បាន​បញ្ចប់​នូវ​ឯកសិទ្ធិ​ខាង​ពន្ធ ដែលមាន​តម្លៃ​ប្រមាណ ២៥២ លាន​ដុល្លារ សម្រាប់​ផលិតផល​ថៃ ក្រោម​ប្រព័ន្ធ​អនុគ្រោះ ទូទៅ​។​
បើសិនជា​សេដ្ឋកិច្ច​សហភាព​អឺរ៉ុប រីក​បាន ១,១% នៅ​ឆ្នាំនេះ ការនាំចេញ​របស់​ថៃ ទៅសហភាព​អឺរ៉ុប អាច​នឹង​កើន​ម្តុំ ០,៥% ទៅ ៣,៥% បើ​មិន​ដូច​នោះទេ ការនាំ​ចេញទៅ​សហភាព​អឺរ៉ុប អាច​នឹង​រំពឹង​ថា​មានការ​ធ្លាក់​ចុះ។ កាលពី​ឆ្នាំ​កន្លងទៅ ការ​នាំ​ចេញពី​ថៃ​ទៅ​សហភាព​អឺរ៉ុប បាន​កើន​ឡើង​៤,៦%​។ មជ្ឈមណ្ឌល បាន​ប្រាប់​ឲ្យ​ដឹង​ថា សហភាព​អឺរ៉ុប​អាច​ងាក​ទៅ​ទិញ​កៅស៊ូ​ធម្មជាតិ ផលិតផល​ពី​កៅស៊ូ សាច់​មាន់​កែច្នៃ ត្បូង​មានតម្លៃ គ្រឿងអលង្ការ ផលិតផល​គីមី និង​អាហារ​សមុទ្រ ពី​ប្រទេសជិតខាង​ថៃ។
យ៉ាងណាក្តី មជ្ឈមណ្ឌល រំពឹងថា អ្នក​នាំចេញ​កុំព្យូទ័រ ផ្នែក​នានា​នៃ​កុំព្យូទ័រ រថយន្ត ម៉ាស៊ីនត្រជាក់ និង​គ្រឿង​អគ្គិសនី​នានា អាច​នឹង​ទប់ទល់​សភាពការណ៍​បាន ​ដោយសារ​ជា​ផ្នែក​នៃ​សង្វាក់​ផលិតកម្ម​នៃ​ឧស្សាហកម្ម​​​ធំៗ និង​មាន​ភាព​បត់បែន​ក្នុង​ការ​គ្រប់គ្រង​ចំណាយ​។ ប្រាក់​អឺរ៉ូ បន្ត​បាត់បង់​តម្លៃ អ្នកប្រើប្រាស់​អឺរ៉ុប មាន​អារម្មណ៍​ថា​ផលិតផល​មកពី​ប្រទេស​ផ្សេង មានតម្លៃ​ថ្លៃ​ជាង​។ ផលិតផល​ថៃ ក្លាយ​ជា​របស់​មានតម្លៃ​កាន់តែ​ខ្ពស់ ដោយសារតែ​ការបញ្ចប់​នូវ​ឯក​សិទ្ធិ​ខាង​ពន្ធ​នៃ​ប្រព័ន្ធ​អនុគ្រោះ​ទូទៅ ដែល​ធ្វើឲ្យ​ផលិតផល​ថៃ មានការ​លំបាក​នឹង​ប្រកួតប្រជែង​ជាមួយ​ទំនិញ​នាំ​ចេញពី​វៀតណាម កម្ពុជា ឡាវ មី​យ៉ាន់​ម៉ា និង​ឥណ្ឌូណេស៊ី ដែល​នៅ​ទទួល​បាន​ប្រព័ន្ធ​អនុគ្រោះ​ទូទៅ​នៅឡើយ៕

0 comments:

Post a Comment