បន្ទាយមានជ័យ ៖ លោកកែ គឹមយ៉ានប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ បានធ្វើការអំពាវនាវឲ្យប្រជាពលរដ្ឋត្រៀមឯកសារទៅបោះឆ្នោតជ្រើសតាំងតំណាងរាស្ត្រ នាថ្ងៃទី២៩ ខែកក្កដា ឆ្នាំ២០១៨ខាងមុខឲ្យបានគ្រប់ៗគ្នា ពិសេសបោះឆ្នោតជូនគណបក្សប្រជាជនកម្ពុជានៅលេខរៀងទី២០ ដើម្បីឲ្យសម្តេចតេជោធ្វើជានាយករដ្ឋមន្ត្រីបន្ត ព្រោះសំអាងថា គណបក្សប្រជាជនកម្ពុជាមានស្នាដៃជាច្រើនក្នុងការកសាងជាតិរយៈពេលជាង៣០ឆ្នាំកន្លងមក រួមមានប្រទេសជាតិដោយរក្សាបាននូវស្ថិរភាព សុខសន្តិភាព ជំរុញការអភិវឌ្ឍឥតឈប់ឈរលើគ្រប់វិស័យ ជាពិសេសបានធ្វើឲ្យជីវភាពរស់នៅ របស់ប្រជាពលរដ្ឋកាន់តែមានការផ្លាស់ប្តូររីកចម្រើនធូរធារជាលំដាប់ផងដែរថ្លែងក្នុងពិធីចុះសួរសុខទុក្ខប្រជាពលរដ្ឋជិត៣.០០០នាក់នៅព្រឹក ថ្ងៃទី៣០ ខែមិថុនា ឆ្នាំ២០១៨នេះនៅក្នុងបរិវេណសាលាស្រុកអូរជ្រៅ ភូមិកូបលិច ឃុំកូប ស្រុកអូរជ្រៅ ខេត្តបន្ទាយមានជ័យ។
ពិធីនេះមានការចូលរួមពី លោក សួនបវរ អភិបាលខេត្តបន្ទាយមានជ័យ លោកឧញ៉ា អ្នកតំណាងរាស្ត្រត្រៀមឈរឈ្មោះ មន្ត្រីជាន់ខ្ពស់ នគរបាល អាវុធហត្ថ សិស្ស សហភាពសហព័ន្ធយុវជនកម្ពុជា និងប្រជាពលរដ្ឋជាង២.៧១៨នាក់ បានចូលរួមផងដែរ។
លោកឧបនាយករដ្ឋមន្ត្រី កែ គឹមយ៉ានបានប្រាប់ប្រជាពលរដ្ឋឲ្យដឹងថា ថ្ងៃទី២៩ ខែកក្កដា ឆ្នាំ២០១៨ខាងមុខនេះ គឺជាថ្ងៃបោះឆ្នោតជ្រើសតាំងតំណាងរាស្ត្រនីតិកាលអាណត្តិទី៦ដូច្នេះប្រជាពលរដ្ឋ ដែលមានឈ្មោះក្នុងបញ្ជីបោះឆ្នោតនៅទូទាំងខេត្តបន្ទាយមានជ័យ ត្រៀមនូវឯកសារទៅបោះឆ្នោតឲ្យបានគ្រប់ៗគ្នា ដើម្បីថែរក្សាសុខសន្តិភាព និងបន្តការអភិវឌ្ឍមូលដ្ឋានឲ្យកាន់តែ រីកចម្រើនថែមទៀត។
លោកឧបនាយករដ្ឋមន្ត្រី កែ គឹមយ៉ាន បានគូសបញ្ជាក់ថា ចាប់ពីមួយអាណត្តិ ទៅមួយអាណត្តិរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីបានដឹកនាំប្រទេសជាតិដោយរក្សាបាននូវស្ថិរភាព សុខសន្តិភាព ជំរុញការអភិវឌ្ឍឥតឈប់ឈរលើគ្រប់វិស័យ ជាពិសេសបានធ្វើឲ្យជីវភាពរស់នៅ របស់ប្រជាពលរដ្ឋកាន់តែមានការផ្លាស់ប្តូររីកចម្រើនធូរធារជាលំដាប់។ លោកឧបនាយរដ្ឋមន្ត្រីបន្តថា ការបណ្តុះបណ្តាលធនធានមនុស្សដល់កូន ចៅជំនាន់ក្រោយ គឺដើម្បីបន្តវេនជាការងារអាទិភាព ដែលប្រមុខរាជរដ្ឋាភិបាល បានខិតខំកសាងនូវសាលារៀនគ្រប់កម្រិតសិក្សានៅគ្រប់ទីកន្លែងដោយបង្ខិតសាលារៀនឲ្យមកជិតផ្ទះប្រជាពលរដ្ឋ និងបានជំរុញពង្រឹងគុណភាពអប់រំនៅគ្រប់កម្រិតសិក្សា តភ្លើងពីក្រុងដល់ជនបទ មានទឹកស្អាតនៅតាមក្រុង ស្រុក មន្ទីរពេទ្យព្យាបាលដោយមិនយកកំរៃ បន្តកសាងផ្លូវក្រាលគ្រួសក្រហម និងចាក់បេតុងនៅតានមូលដ្ឋានបានមួយចំនួនធំទៀតផង។
លោកបានជំរុញដល់បងប្អូនប្រជាពលរដ្ឋចាប់យកឱកាសមាសនេះ ដោយត្រូវ ជំរុញបញ្ជូនកូនចៅដែលគ្រប់អាយុឲ្យទៅបោះឆ្នោតឲ្យបានគ្រប់ៗគ្នាដើម្បីអភិវឌ្ឍន៍គ្រួសារ និងសង្គមជាតិឲ្យបានរុងរឿងបន្តទៀត។
លោកឧបនាយករដ្ឋមន្ត្រីក៏បានថ្លែងអំណរគុណដល់ប្រជាពលរដ្ឋខេត្តបន្ទាយមានជ័យទាំងអស់ដែលបានរួមគ្នាថែរក្សាសន្តិភាព និងសូមបន្តថែរក្សានូវតម្លៃនៃសន្តិភាព នេះឲ្យបានគង់វង្សហើយអញ្ជើញទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨នេះ ដើម្បីជ្រើសរើសអ្នកដឹកនាំនិងបន្ដអភិវឌ្ឍន៍នាវាកម្ពុជាឲ្យកាន់តែរីកចម្រើនឆាប់រហ័សបន្ថែមទៀត។ ជាមួយនេះដែរ លោកឧបនាយករដ្ឋមន្ត្រី កែ គឹមយ៉ាន បាននាំយកថវិកា និងអំណោយចែកជូនប្រជាពលរដ្ឋចំនួន២.៧១៨នាក់ ដោយម្នាក់ៗ ទទួលសារុង១និងបន្តជួយកសាងផ្លូវលំចាក់គ្រួសក្រហមនៅតាមមូលដ្ឋានហើយបានជួយកសាងវត្ត និងសាលារៀនបន្តទៀត៕
Source: Kampuchea Thmey Daily
0 Comments