សារព័ត៌មានតំបន់ឲ្យដឹងថា កសិករថៃនៅទូទាំងប្រទេសនៅឆ្នាំនេះមានការរីករាយជាខ្លាំង ដោយកសិករដាំអំពៅ ជាក្រុមដែលមានការសប្បាយរីករាយជាងគេ ដោយសារតែមានការឡើងថ្លៃស្ករក្នុងពិភពលោក (តាមការសិក្សាឲ្យដឹង)។
ការសិក្សាធ្វើឡើងដោយមជ្ឈមណ្ឌលស្រាវជ្រាវនៃ ធនាគារកសិកម្ម និងសហករណ៍កសិកម្ម បង្ហាញឲ្យដឹងថា កសិករថៃពីគ្រប់តំបន់ មានចិត្តក្លៀវក្លា ដោយសារតែតួលេខនៃការរីករាយជាមធ្យមរបស់ពួកគេឈរនៅ ៣,១១ ក្នុងតារាងណពិន្ទុ ៤ (តាមការអះអាងរបស់លោកនាយក Apiradee Yimlamai)។
លទ្ធផលនៃការសិក្សាបង្ហាញថា កសិករដាំអំពៅ មានពិន្ទុខ្ពស់ជាងគេ៣,២២/៤។ កម្រិតនៃសុភមង្គលរបស់ក្រុមនេះ ជាប់ទាក់ទងផ្ទាល់ទៅនឹងការឡើងថ្លៃស្ករជាសកល កាលពីខែវិច្ឆិកា ដែលបានបង្កើនឡើង ៥,៦% ពីខែមុន និងកំពុងតែមាននិន្នាការវិជ្ជមាន។ កសិករដូងប្រេងថៃ ឈរនៅលំដាប់ទីពីរ ដោយមានពិន្ទុសុភមង្គលមធ្យម៣,១៩ បន្ទាប់ទៅក្រុមចិញ្ចឹមមាន់ ដែលមាន ៣,១៧។ ថ្លៃប្រេងដូងបន្តឡើង ដោយសារតែមានសេចក្តីត្រូវការទាំងក្នុងការប្រើប្រាស់ហូបចុក និងក្នុងឧស្សាហកម្ម ក្នុងនោះមានផលិតកម្មជីវម៉ាស៊ូតផង។
តម្លៃសាច់មាន់ ក៏ឡើងច្រើនដែរ ដោយសារតែមានសេចក្តីត្រូវការច្រើន នៅក្នុងរដូវមានអ្នកទេសចរច្រើន និងរដូវបុណ្យទាន។ ការសិក្សាបង្ហាញថា កសិករដែលត្រូវបានជួលធ្វើការងារដោយដៃ នៅតាមចម្ការធញ្ញជាតិនានា និងវាលស្រែ បានទទួលនូវពិន្ទុសុភមង្គលទាបជាងគេ ៣,០១ ធៀបទៅក្រុមដទៃ៕
0 Comments