អ្នក​វិនិយោគិន​កូរ៉េ មាន​ចំណាប់អារម្មណ៍​ក្នុងការ​វិនិយោគ ជា​រោងចក្រ​ផលិត​ចំណី​សត្វ​មាន់​និង​កសិដ្ឋាន​ចិញ្ចឹម​មាន់នៅ​កម្ពុជា

ប្រទេស​កូរ៉េ​ ៖ អ្នក​វិនិយោគិន​កូរ៉េ មាន​ចំណាប់អារម្មណ៍​ក្នុងការ​វិនិយោគ ជា​រោងចក្រ​ផលិត​ចំណី​សត្វ​មាន់ ​និង​កសិដ្ឋាន​ចិញ្ចឹម​មាន់នៅ​កម្ពុជា ខណៈដែល​ប្រទេស​កម្ពុជា​កំពុងមាន​ការអភិវឌ្ឍ​រីកចម្រើន សម្បូរ​វត្ថុធាតុដើម សម្រាប់ធ្វើ​ការផលិត​ជា​ចំណី​សត្វ មាន​តម្លៃថោក​ប្រៀបធៀប​នឹង​ប្រទេសជិតខាង រួមជាមួយ​នឹង​ថ្លៃ​កម្លាំង​ពលកម្ម​សមរម្យ​ផងដែរ​នោះ។

ការបង្ហាញ​ពី​ចំណាប់អារម្មណ៍​របស់​អ្នក​វិនិយោគិន​កូរ៉េ​នេះ​ ធ្វើឡើង​កាលពី​ព្រឹក​ថ្ងៃទី​២៨ ខែសីហា ឆ្នាំ​២០១៨​នេះ ខណៈដែល ឯកអគ្គរាជទូត​កម្ពុ​ជាប្រចាំ​នៅ​ប្រទេស​កូរ៉េខាងត្បូង​លោក​ឡុង ឌី​ម៉​ង់ និង​ទីប្រឹក្សា​ពាណិជ្ជកម្ម អម​ស្ថានទូត បាន​អញ្ជើញ​ធ្វើ​ទស្សនកិច្ច​នៅ​រោងចក្រ​កែច្នៃ​សាច់មាន់​មួយកន្លែង​នៅ​ទីក្រុង​ណាំ​យ៉ាង​ជូ របស់​ក្រុមហ៊ុន ACE Food Co.,Ltd. ដែលមាន​សមត្ថភាព​កែច្នៃ​មាន់បាន​ចំនួន ១២.០០០​ក្បាល​ក្នុង​មួយថ្ងៃ ដើម្បី​សិក្សា​ស្វែងយល់​ពី​បច្ចេកវិទ្យា និង​តម្រូវការ​ទីផ្សារ​សាច់មាន់​របស់​កូរ៉េ​។​

ក្នុង​ជំនួប​ពិភាក្សា​ជាមួយនឹង​លោក Yoon, Jun-hyun ប្រធាន​ក្រុមហ៊ុន ACE Food Co.,Ltd. លោក​ឯកអគ្គរាជទូត​បាន​បង្ហាញ​ពី​សក្ដានុពល​របស់​កម្ពុ​ជា ​ដែល​រាជរដ្ឋាភិបាល​បាន​បង្ក​លក្ខណៈ​ងាយស្រួល​ដល់​វិនិយោគិន​បរទេស​ក្នុង​ការ​បណ្ដាក់ទុន​រក​ស៊ី​នៅ​កម្ពុជា ជាពិសេស​កម្ពុជា​សម្បូរ​វត្ថុធាតុដើម សម្រាប់​ធ្វើ​ការផលិត​ជា​ចំណី​សត្វ ដែល​មាន​តម្លៃថោក​ប្រៀបធៀប​នឹង​ប្រទេសជិតខាង រួម​ជាមួយ​នឹង​ថ្លៃ​កម្លាំង​ពលកម្ម​សមរម្យ​ផងដែរ។

ជាការ​ឆ្លើយតប​លោក Yoon ថា​លោក​ពិត​មាន​ចំណាប់អារម្មណ៍​ជាមួយនឹង​ឱកាស​វិនិយោគ​នៅ​កម្ពុជា រួម​នឹង​សក្តានុពល​ទីផ្សារ​ដែល​កម្ពុ​ជា​មាន លោ​ក​ថា​នឹង​ធ្វើ​ការសិក្សា​បន្ថែម​ឱ្យ​បាន​ស៊ីជម្រៅ ដោយ​លោក​នឹង​ត្រូវ​ចុះទៅ​សិក្សា និង​ពិនិត្យ​ជាក់ស្ដែង​នៅពេល​ខាងមុខ។

បច្ចុប្បន្ន​នេះ​ ប្រជាជន​កូរ៉េ​បាន​និង​កំពុង​ប្រើប្រាស់​សាច់មាន់​ប្រមាណ ៤​លាន​ក្បាល​ក្នុង​មួយថ្ងៃ ដែល​គិត​ជា​មធ្យម មនុស្ស​ម្នាក់​ទទួលទាន​សាច់មាន់​ប្រមាណ ១៥kg ក្នុង​មួយឆ្នាំ​​ ហើយ​កូរ៉េ​បច្ចុប្បន្ន​បាន​នាំ​យក​សាច់មាន់​៣០​ភាគរយ​នៃ​តម្រូវការ​ប្រើប្រាស់​ក្នុងស្រុក​របស់​ខ្លួន​ពី​បរទេស​រួមមាន ប្រេ​ស៊ី​ល និង​អាមេរិក ជាដើម៕

​

Source: Kampuchea Thmey Daily